Bəhruz Quliyev: “Birbaşa maliyyə öhdəliyi götürməmək, əslində, məsuliyyətli dövlət davranışının göstəricisidir”
Bir məsələyə aydınlıq gətirmək istərdik. Belə ki, “Sülh Şurası”nın bugünkü iclasında səsləndirilən 7 milyard ABŞ dolları məbləğində Qəzzaya dair maliyyə layihəsində Azərbaycanın iştirakı nəzərdə tutulmur.
Bu barədə Prezidentin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev “X” hesabında bildirib.
Prezidentin köməkçisi qeyd edib ki, gələcəkdə Azərbaycan tərəfindən “Sülh Şurası” vasitəsilə Qəzzada sərmayə layihələrində iştirak nəzərdən keçirilə bilər.
“Azərbaycan təsisçi üzv dövlət kimi “Sülh Şurası”nın məqsəd və məramlarını dəstəkləyir”, - Hikmət Hacıyev vurğulayıb.
Əslində Azərbaycanın belə mövqe sərgiləməsi doğru yanaşmadır.
Sözügedən məsələni baki-xeber.com-a şərh edən “SƏS” qəzetinin baş redaktoru, politoloq Bəhruz Quliyevin fikrincə, bu, tam düşünülmüş və strateji əsaslara söykənən bir yanaşmadır: “ABŞ-da keçirilən “Sülh Şurası”nın iclasında Qəzzaya yönəlik 7 milyard dollar həcmində maliyyə paketində Azərbaycanın iştirakı ətrafında müzakirələr aparılır. Prezidentin köməkçisi Hikmət Hacıyevin açıqlaması göstərir ki, bu qərar təsadüfi deyil, tam düşünülmüş və strateji əsaslara söykənən bir yanaşmadır. Azərbaycan beynəlxalq təşəbbüslərdə iştirak edərkən hər zaman balanslı, prinsipial və milli maraqlara uyğun siyasət yürüdür. Qəzza məsələsi də istisna deyil. Mövcud mərhələdə regionda siyasi və təhlükəsizlik risklərinin yüksək olduğu şəraitdə birbaşa maliyyə öhdəliyi götürməmək, əslində, məsuliyyətli dövlət davranışının göstəricisidir. Eyni zamanda, Azərbaycanın “Sülh Şurası”nın təsisçi üzvü kimi bu platformanın məqsəd və prinsiplərini dəstəkləməsi ölkəmizin qlobal humanitar gündəmə sadiqliyini nümayiş etdirir. Azərbaycan heç vaxt humanitar məsələlərdən kənarda qalmayıb. Lakin bu iştirak hər zaman konkret şərtlərə, şəffaf mexanizmlərə və uzunmüddətli səmərəliliyə əsaslanıb. Burada əsas məqam ondan ibarətdir ki, Azərbaycan emosional deyil, rasional siyasət aparır. Qəzzada vəziyyətin sabitləşməsi, hüquqi və institusional çərçivənin formalaşması, eləcə də beynəlxalq təminatların gücləndirilməsi halında ölkəmizin investisiya və bərpa layihələrində iştirakı istisna edilmir. Bu da göstərir ki, Azərbaycan qapıları bağlamır, sadəcə tələsmir. Digər tərəfdən, Azərbaycanın özünün genişmiqyaslı bərpa və quruculuq proqramları həyata keçirdiyi bir dövrdə, xüsusilə, işğaldan azad olunmuş ərazilərdə aparılan işlər fonunda maliyyə resurslarının prioritet istiqamətlər üzrə bölüşdürülməsi tamamilə məntiqlidir. Dövlət ilk növbədə öz vətəndaşlarının rifahını və milli inkişaf strategiyasını təmin etməlidir. Hesab edirəm ki, Azərbaycanın “Sülh Şurası” çərçivəsində Qəzza layihəsinə bu mərhələdə qoşulmaması nə geri çəkilmə, nə də laqeydlikdir. Bu, beynəlxalq münasibətlərdə məsuliyyətli, praqmatik və milli maraqlara söykənən siyasətin bariz nümunəsidir”.
Vidadi ORDAHALLI
