Faiq Ələkbərli: “Kərkicahanda ermənilərin süni mağara yaratmalarına elə süni baxmaq lazımdır”
Xankəndidə işğal zamanında saxta erməni tarixini təbliğ edən mağara kompleksinin tikildiyi aşkar olunub. Xankəndi, Ağdərə və Xocalıda Bərpa, Tikinti və İdarəetmə Xidmətinin yaydığı məlumatda qeyd edilir ki, işğal dövründə Xankəndinin ən hündür nöqtəsi – Kərkicahan qəsəbəsinin Yağlıtəpə yüksəkliyində nəhəng bir kompleks tikilib.
İşğaldan əvvəl bura Yağlıtəpə adlanan yer olub: “Burda heç bir tikili olmayıb, azərbaycanlıların otlaq sahəsi olub. Bu kompleks Xankəndinin ən yüksək nöqtəsindədir. Kənardan böyük modern tipli kompleks kimi görünən bu yer içəridən bir mağaradır. Kərkicahandakı bu süni mağarada erməni mifologiyasının dırnaqarası tanrıları təsvir olunub. Amma bu fiqurlar sadəcə mif deyil, siyasi mesaj daşıyan obrazlardır. Mağaradakı abidə, şəkillər estetik bəzək deyil. Qanadlı şir, qartal fiquru, daşlara həkk olunmuş silah-sursat, hərbi texnika, girişdəki kök atmış ağac təsviri və digər müxtəlif obrazlar təsvir edilib”.
Ekspertlər hesab edir ki, ermənilər süni mağara ilə həmin torpaqların qədim erməni torpaqları olduğunu göstərmək istəyiblər. Bununla da ermənilər saxta tarix yaratmağa çalışıblar.
“Haylar öz tarixlərini qədimləşdirmək üçün ya Azərbaycan xalqının tarixini təhrif etməli, ya da süni mağaralar yaratmalı idi”
AMEA Fəlsəfə və Sosiologiya İnstitutunun aparıcı elmi işçisi, fəlsəfə üzrə fəlsəfə doktoru, dosent Faiq Ələkbərli “Bakı-Xəbər”ə şərhində bildirdi ki, ermənilərin saxta abidə yaratması və onların üzərində yalan tarix yazması sıradan bir hadisəyə çevrilib. Ermənilərin işi elə tarixi saxtalaşdırmaqdır: “Onlar bu işdə “ustaya” çevriliblər. Məlumdur ki, Xankəndinin ən hündür nöqtəsi Kərkicahandır. Kərkicahanda ermənilərin süni mağara yaratmalarına elə süni baxmaq lazımdır. Erməni xislətində bu kimi hallar özünü dəfələrlə büruzə verib. Sadəcə onu da deyim ki, ermənilər süni mağara və ya türk xalqlarının abidələrində bir sıra uydurmalar edərək hansısa erməni tanrılarından bəhs edirlər. Ancaq onu da deyim ki, ermənilərin dediyi tanrıların adı elə Azərbaycan, qədim türk xalqlarına aid olan nağıllarda keçir. Qartal, qanadlı şir və digər heyvan simvolları türk xalqlarında olub”.
Həmsöhbətimiz bildirdi ki, ermənilər Azərbaycan xalqına aid olan qədim abidələri təhrif edərək öz adlarına çıxarmaq istəyib: “Bunların mahiyyəti dəyişmir. Haylar öz tarixlərini qədimləşdirmək üçün ya Azərbaycan xalqının tarixini təhrif etməli, ya da süni mağaralar yaratmalı idi. Onlar nə etsələr də həqiqət göz qabağındadır. Həqiqət günəş kimi öz əksini tapır”.
Günel CƏLİLOVA
