Moskva İrəvan və Bakı arasında sülh müqaviləsinin imzalanmasına hərtərəfli dəstək verməyə hazırdır. Bunu Rusiya müdafiə naziri Andrey Belousov Bişkekdə keçirilən Kollektiv Təhlükəsizlik Müqaviləsi Təşkilatının (KTMT) müdafiə nazirləri şurasının iclasında səsləndirib.
Nazir qeyd edib ki, hazırda Cənubi Qafqazda regiondankənar dövlətlərin fəallığı artıb, xüsusilə Zəngəzur ətrafında gərginlik davam edir: “Regiondankənar ölkələrin məqsədi təhlükəsizliyin möhkəmləndirilməsi deyil, Cənubi Qafqazda təsir dairəsini genişləndirməkdir”. Ekspertlər qeyd edir ki, Belousovun sözləri indiki halda İrəvana və Parisə ünvanlanıb. Çünki Fransa bir neçə gündən sonra Qərbi Zəngəzurda konsulluq açacaq. Ayrıca Gorusda Ermənistan-Fransa konfransı keçiriləcək. Rusiya müdafiə nazirinin sözlərinə görə, hazırkı fəallığın məqsədi təhlükəsizliyin gücləndirilməsi yox, həmin ölkələrin təsir dairəsini genişləndirməkdir. Bununla Belousov açıq mətnlə bildirir ki, Fransanın istəyi Ermənistanın təhlükəsizliyi deyil, bölgədə təsir dairəsini genişləndirməkdir. Kreml hesab edir ki, Fransanın Ermənistandakı fəallığının əsas məqsədi Rusiyanı bu ölkədən sıxışdırıb çıxarmaqdır. Buna görə də Rusiya Türkiyə və İranın xaricində bölgədən uzaq ölkələrin Cənubi Qafqazda fəallığının əleyhinədir. Qərb faktiki olaraq Ermənistan üzərindən Cənubi Qafqazdakı maraqlarını təmin etməyə çalışır. Hazırda kollektiv Qərb Ermənistanı Rusiyanın nəzarətindən çıxarmaq üçün şirnikləndirici vədlər verir, son illər isə Avropa İttifaqının İrəvana xüsusilə təhlükəsizlik sahəsində dəstəyini qabardır. Burada söhbət təbii ki, “mülki missiya” adı altında Azərbaycanla sərhədə yerləşdirilən təxribatçı Avropa İttifaqı missiyasından gedir. Təhlükə doğuran səbəblərdən biri də mülki missiyanın tərkibində güc strukturlarının təmsilçilərinin olmasıdır. Mülki missiyanın tərkibində güc strukturlarının təmsilçilərinin olması bunun müşahidə deyil, hərbi missiya olmasından xəbər verir. Beləliklə, Avropa İttifaqının müşahidə missiyası Qərbin Ermənistanda təsir imkanlarının formalaşdırılması və gücləndirilməsidir. Bu da Rusiyanı narahat edən məqamlardan biridir. Amma o da nzərə alınmalıdır ki, Moskvanın erməni dövlətində təsir mexanizmləri kifayət qədərdir və demək olar ki, Ermənistan bütün sahələrdə hələ də Rusiyadan asılıdır. Üstəlik bu asılılığı qısa müddətdə aradan qaldırmaq mümkün görünmür. Bu məqsədə nail olmaq üçün bir neçə onillik və yüz milyardlarla dollar vəsait lazımdır. Qərb də bunu etmək istəmir. Əvəzində Moskva Paşinyanın devrilməsi planını gündəmdə saxlayır. Ermənistanın “Qraparak” qəzeti belə bir vaxtda maraqlı məlumat yayıb. Qeyd edilir ki, müxalif “Biz Oyağıq” Hərəkatı Ermənistan Milli Təhlakəsizlik Xidmətinin sabiq direktoru general Artur Vanetsyanın baş nazirliyə namizədliyini irəli sürüb. Erməni nəşri yazır ki, Vanetsyanın namizədliyi ilə bağlı sabiq prezidentlər Robert Köçəryan və Serj Sarkisyan arasında fikir ayrılığı var: “Biz Oyağıq” hərəkatının Baş nazir Nikol Paşinyana qarşı impiçment təşəbbüsü üçün ən çox ehtimal olunan namizəd “Vətən” partiyasının sədri Artur Vanetsyandır. Serj Sərkisyanın komandası üçün Vanetsyan məqbul namizəd kimi görünür, Robert Köçəryan isə prosesin özünə şübhə ilə yanaşır. Köçəryanın komandası deputat İşxan Saqatelyan vasitəsilə Vanetsyana bəzi mesajlar verib ki, nəticəsi əvvəldən müəyyənləşən ümidsiz prosesə girməyə ehtiyac yoxdur. Həmçinin məlumata görə, Vanetsyan öz namizədliyi ilə bağlı 8 deputatın imzasını toplaya bilsə, parlamentdəki müxalif fraksiyalardan 28 deputatın dəstəyini alacaq”. “Qraprak” Ermənistan Milli Təhlükəsizlik Xidmətinin sabiq rəhbərinin Rusiyaya səfərinə də diqqət çəkib: “Artur Vanetsyanın hazırda Moskvada olması barədə məlumat əldə etmişik. Yaxınları bizə bildiriblər ki, o, namizədliyi ilə bağlı Moskvada yaşayan qardaşı ilə məsləhətləşməyə gedib, mayın 31-də qayıdacaq. Siyasi dairələr onun səfər zamanı Kremldə bəzi Rusiya rəsmiləri ilə də görüşəcəyini istisna etmirlər”. Onu da qeyd edək ki, Ermənistan hakimiyyəti Artur Vanetsyanı Rusiya xüsusi xidmət orqanlarına yaxşı fiqur kimi təqdim edir. Mənbələrə görə, Köçəryan və Sarkisyanın namizədliyinin cəmiyyət arasında narazılıq yaradacağını güman edən Moskva Vanetsyanın namizədliyini nəzərdən keçirir. İddialara əsasən, Rusiyada səfərdə olan Robert Köçəryanla Kremldə Paşinyanın impiçmenti prosesi ilə yanaşı, bu məsələnin də müzakirə olunduğu bildirilir. Bu xüsusda “Qraprak” yazır: “Köçəryan mayın 22-də gecə qayıdıb və Kremldən aldığı təlimatla bağlı hələ komandasına məlumat verməyib. Yeri gəlmişkən, qeyd edək ki, əvvəlki səfərindən sonra Köçəryan geniş müsahibə verərək fəallaşdığını bildirmişdi. Bəzi məlumatlara görə, Moskvada budəfəki müzakirə mövzusu baş nazir Nikol Paşinyanın impiçmenti ilə bağlı olub. İstisna edilmir ki, Köçəryanla baş nazir vəzifəsinə potensial namizədlərin kimliyi müzakirə olunub. Yaxın günlərdə bununla bağlı bəzi açıqlamaların veriləcəyi və müvafiq addımların atılacağı istisna edilmir”. Radikal erməni müxalifəti, ümumən, Rusiyanın köməyi ilə Paşinyan iqtidarını devirməyə daha çox ümid edir.
Nahid SALAYEV
