Yazın sonuna kimi Gürcüstan hakimiyyəti media və mitinqlərin təşkili sahəsində "dağıdıcı müxalifətin" fəaliyyətinin məhdudlaşdırlmasl üçün yeni qanunlar qəbul edəcək. Güman edilir ki, bu, hökumətə qarşı çıxanların sayını azaldacaq və onun yerinə mötədil müxalifət olan "Xalq Gücü" gələcək.
Bu şəraitdə "Gürcü Arzusu"nun əleyhdarları və tərəfdarları öz qiymətləndirmələrində ikiyə bölünüb. Bəziləri hesab edir ki, Tiflis Moskvanın yolu ilə gedir, bəziləri isə dövlət quruculuğunda Qərb təcrübəsindən ən yaxşısını götürdüyünə inanır.
"Gürcü Arzusu" parlament fraksiyasının lideri Mamuka Mdinaradze bildirib ki, yaxın iki-üç ay ərzində onun partiyası hakim rejimi tənqid edənlərə qarşı qanunlar paketi hazırlayıb qəbul edəcək. Xüsusilə, hakimiyyət jurnalist etikası standartlarını müəyyən etmək, həmçinin medianın xarici mənbələrdən maliyyələşdirilməsini məhdudlaşdırmaq niyyətindədir. Kommersiya reklamından əldə edilən gəlir üçün istisna olacaq. Tiflis həmçinin xarici agentlərlə mübarizə üçün daha bir qanun təqdim etməyi planlaşdırır. Mdinaradzenin sözlərinə görə, bu, Amerikadakı müvafiq mövcud qanunun hazırkı versiyasının birbaşa surəti olacaq və onun tam icrasını təmin edəcək. Eyni zamanda, o, keçən ilki qanunu "yüngül versiya" adlandırıb. Eyni zamanda, hökumət qərarlarının qəbulu prosesində qeyri-hökumət təşkilatlarının məcburi iştirakını nəzərdə tutan müddəalar bütün qanun və qaydalardan tamamilə çıxarılacaq: "Dövlət qulluğuna müvafiq qurumun rəhbərinin razılığı olmadan xarici mənbələrdən maliyyələşdirilən müavinətlərin alınması məhdudlaşdırılacaq". Bundan başqa, dövlət məmurlarını təhqir etmək, polis əməkdaşlarına hücum etmək, kütləvi iğtişaşlara sövq etmək və onlarda iştiraka görə cəza sərtləşdiriləcək. İnzibati xətalara, o cümlədən xırda xuliqanlığa görə cərimələr 2-4 dəfə artırılacaq, polis əməkdaşına tabe olmamağa görə həbs müddəti 15 gündən 60 günə, polis əməkdaşına hücuma görə isə 5 ildən 6 ilədək artırılacaq. Öz növbəsində, şəhər merlərinin müəyyən ərazilərdə mitinqləri qadağan etmək hüququ olacaq və aksiyanın təşkilinə onun başlamasına 5 gün qalmış məlumat verilməlidir. Mdinaradzenin qeyd etdiyi kimi, hakim rejimə nə qədər təzyiq göstərilsə, o, daha sərt reaksiya verəcək: "Biz bütün bunların qarşısını almaq üçün əlimizdən gələni edəcəyik ki, ölkə bir daha heç vaxt şantaja məruz qalmasın, onun institutları güclü olsun və heç kim Gürcüstanın daxili işlərinə qarışmağa, onun müstəqilliyinə qəsd etməyə və gürcü xalqının qərarlarına hörmətsizlik göstərməyə cəsarət etməsin". Öz növbəsində Gürcüstanın baş naziri İrakli Kobaxidze bəyan edib ki, gürcülər ölkələrini tam şəkildə geri almalıdırlar. Onun sözlərinə görə, ötənilki "Xarici agentlər haqqında" qanunda "Gürcü Arzusu"nun əleyhdarlarının yararlana biləcəkləri çoxlu boşluqlar var, ona görə də "ölkəmizin milli maraqlarını qorumaq" üçün onları aradan qaldırmaq lazımdır: "Bu şəraitdə ABŞ-ın Gürcüstandakı səfirliyi, USAID, NED və digər qurumlar gürcü xalqına və gürcü dövlətinə qarşı koordinasiyalı şəkildə hərəkət etdilər. Tiflisin meri, "Gürcü Arzusu"nun baş katibi Kaxa Kaladze qeyd edir: "Gürcü Arzusu-Demokratik Gürcüstan" partiyası hər zaman deyirdi ki, xaricdən alınan pul vəsaitləri ölkədə inqilabi ssenariyə sərf olunur. Dediklərimiz bu gün təsdiq olundu. Lakin müxalifət yenə də bununla razılaşmaq istəmir. Ona görə ki, müxalifət nümayəndələri hələ də başqalarının tapşırıqlarını yerinə yetirirlər". Kaladze "Lelo" partiyasının yaradıcısı Mamuka Xazaradzenin ABŞ-ı "Gürcü arzusu"na təzyiq göstərməyə çağırmasını da tənqid edib. Onun sözlərinə görə, ABŞ Prezidentinin özünün və yüksəkrütbəli məmurlarının da dediyi kimi, "dərin dövlət" dünya üçün əsas problemdir. Mer bildirib ki, bu insanlar adi agentlərdir: "Dərin dövlət" bütün dünya üçün böyük problemdir və bu barədə ABŞ prezidentinin özü, yüksəkrütbəli məmurları da danışırlar. O deyib ki, onlar hələ məğlub olmayıb, çox dərin köklərə malikdir".
Müxalifət bildirir ki, "Gürcü Arzusu" respublikada bütün narazılığı aradan qaldırmaq istəyir. Eyni zamanda, hakim rejimin əleyhdarları əmindirlər ki, hakimiyyət Rusiyadan nümunə götürür və ya hətta Kremlin göstərişi ilə hərəkət edir. "Gürcüstan üçün Qaxariya" partiyasının üzvü Teona Akubardia bildirib: "Bu, avtoritar ölkələrdə olduğu kimi, həqiqətin yayılmasını məhdudlaşdırmağa yönəlmiş növbəti senzuranın dalğası olacaq.Ya biz İvanişvilini devirəcəyik və vətənimizi Rusiyadan qoparacağıq, ya da bu etirazlar sürgündə göz yaşı tökdüyümüz gözəl xatirə olaraq qalacaq". Gürcüstanın keçmiş prezidenti Salome Zurabişvili "Gürcü Arzusu"nun yeni təşəbbüslərini hakim elitanın xalqdan qorxmasının sübutu hesab edir: "Bu illər ərzində istər baş nazir, istər sıravi bir parlamentari, istərsə də indiki faktiki prezident olsun, hamıdan lənət və təhqir eşitmişəm! Mənə deyirdilər ki, siyasətçi səbirli olmalıdır... Mən onlarda səbirli olmaq qabiliyyəti görmürəm, qisas almaqda daha bacarıqlıdırlar! Bu, sadəcə onu göstərir ki, onlar o qədər qorxurlar ki, cəmiyyətin onlar haqqında nə düşündüyünü belə dinləmək istəmirlər... Öz xalqının qorxusuna təslim olmaq nə qədər çətindir". Politoloq Nika Çitadze deyib ki, "Gürcü Arzusu"nun fəaliyyəti indiki müxalifətin yox olmasına və yeni etiraz hərəkatının formalaşdırılmasının mümkünsüzlüyünə gətirib çıxaracaq. Politoloq Gia Abaşidze isə əksinə, hesab edir ki, "Gürcü Arzusu" Avropa demokratiyaları modelində normal dövlət quruculuğu ilə məşğuldur: "Nə Avropada, nə də Amerikada səlahiyyətlilər mərkəzi küçənin bağlanmasını "ifadə azadlığı" hesab etmirlər. Gürcüstan hakimiyyəti avtoritarizmə doğru getmir. Müxalifətə gəlincə, o, öz problemlərində günahkardır. Onlar parlamentə daxil olmaqdan imtina etdilər və dövlətin maliyyə dəstəyini itirdilər. Yeni gəlir mənbəyi tapmasalar, çox çətin anlar yaşayacaqlar. Amma ümumilikdə götürdükdə, 2012-ci ildən bəri onlar bir dəfə də olsun seçkilərdə qalib gələ bilməyiblər və onların bütün etirazları daxili çəkişmə ilə yekunlaşır".
Tahir TAĞIYEV
