Aydın Mirzəzadə: "Ermənistanın öz vətəndaşının meyitinə sahib çıxmaması təəccüb doğurur"
Məlum olduğu kimi, Azərbaycan Respublikasının Xankəndi şəhər sakini, erməniəsilli, 1954-cü il təvəllüdlü Ağasyan Vera Varaşakovna oktyabrın 20-də səhər saat 9-10 radələrində yaşadığı ünvanda vəfat edib. Məlumata görə, 70 yaşlı qadının ölümünə bilavasitə səbəb ağ ciyər arteriyasının trombozu ilə əlaqədar inkişaf etmiş kəskin ağ ciyər-ürək çatışmazlığıdır.
V.Ağasyanın vəfat etməsi ilə bağlı Əsir və itkin düşmüş, girov götürülmüş vətəndaşlarla əlaqədar Dövlət Komissiyası tərəfindən elə həmin gün Beynəlxalq Qızıl Xaç Komitəsinin (BQXK) Azərbaycan Respublikasındakı Nümayəndəliyi məlumatlandırılıb.
Sonrakı prosesdə Ermənistanda dəfn edilməsi ilə bağlı övladlarının istəyi nəzərə alınaraq, meyitin qarşı tərəfə təhvil verilməsi üçün Dövlət Komissiyası tərəfindən BQXK-ya rəsmi müraciət edildi. Meyitin 29 və ya 30 oktyabr tarixlərində BQXK-nın vasitəçiliyi ilə Laçın sərhəd nəzarət-buraxılış məntəqəsində Ermənistanın aidiyyəti dövlət qurumlarına təhvil verilməsi planlaşdırılıb və görülmüş tədbirlər barədə BQXK-nın vasitəsilə qarşı tərəfə məlumat göndərilib. Lakin müraciətdən iki aya yaxın vaxt keçməsinə baxmayaraq, qarşı tərəfdən heç bir cavab alınmayıb. Azərbaycan Respublikasının həmişə beynəlxalq humanitar hüquq normalarına hörmətlə yanaşdığını və beynəlxalq sənədlərlə üzərinə götürdüyü öhdəliklərə sadiqliyini diqqətə çatdıraraq Dövlət Komissiyası V.Ağasyanın meyitinin qarşı tərəfə verilməsinə hazır olduğunu bir daha bəyan edir.
Qeyd etdiyimiz kimi, Ermənistan meyitə sahib çıxmasa Azərbaycan tərəfi nəşi müvafiq qaydada torpağa tapşıracaq. Maraqlıdır, Ermənistan niyə meyitinə sahib çıxmadı?
"Azərbaycan həm beynəlxalq hüquqa, həm də yazılmamış insanlıq qanunlarına əməl edən, onları qoruyan bir dövlətdir"
Millət vəkili Aydın Mirzəzadə "Bakı-Xəbər"ə şərhində bildirdi ki, Ermənistanın öz vətəndaşının meyitinə sahib çıxmaması təəccüb doğurur: "Ermənistanın qədim dövlət, zəngin mədəniyyətə malik olduğunu deyən qüvvələr bu gün yaşlı və xəstəlikdən dünyasını dəyişən öz millətinin nümayəndəsinin nəşinə sahib çıxmaq istəmir. Xatırladım ki, 44 günlük Vətən müharibəsi zamanı da azad edilmiş kəndlərdə qalan iki qocaman erməninin Tbilisi vasitəsilə Ermənistana təhvil verilməsi nəzərdə tutulsa da, onlar öz vətəndaşlarına sahib çıxmadı. Bu kimi faktları heç zaman səsləndirməyəcəklər. Ancaq Azərbaycan həm beynəlxalq hüquqa, həm də yazılmamış insanlıq qanunlarına əməl edən, onları qoruyan bir dövlətdir. Ermənistan həmin meyitə sahib çıxmasa Azərbaycan tərəfi beynəlxalq qanunvericiliyin normalarına uyğun olaraq nəşi torpağa tapşıracaq. Hesab edirəm ki, bu kimi faktlar Ermənistan dövlətinin nə cür siyasət yeritdiyini bir daha göstərdi".
Günel CƏLİLOVA
