Bu iki məmur dərhal vəzifədən uzaqlaşdırılmalı və haqlarında cinayət işi qaldırılmalıdır
Zaman keçdikcə Azərbaycan təyyarəsinin Çeçenistan üzərində Rusiya HHM sistemleri tərəfindən vurulmasının detalları aydınlaşır və bu aydınlaşma adamı dəhşətə gətirir. İnsanlar o qədər biganələşib, o qədər məsuliyyətsizləşib ki, insanlığa mərhəmət, şəfqət hissləri sıradan çıxıb.
Əsasən də bu insani deqradasiya dövlət məmurları arasında daha çılpaqlığı ilə nəzərə çarpmaqdadır. Təsəvvür edin ki, dövlət başçısının təhlükəsizlik məsələsinə cavabdeh təyin etdiyi şəxs şəraitə uyğun əmrlər verə bilmir. Çünki professional kadr deyil. O, fərqində deyil ki, filan əmri dünən verməliydim, bu gün vermişəm - bu fərqdən kimlər zərər çəkib? Onun bu sualı özünə verməsi heç ağlına belə gəlmir, çunki oturduğu kreslonun məsuliyyətini dərk etmir. Söhbət Çeçenistan rəhbəri Ramzan Kadırovun qardaşı oğlu Həmzət Kadırovdan gedir. Bu adam Rusiyanın Şimali Qafqaz üzrə Regional Təhlükəsizlik Şurasının katibidir. Sözügedən məkanda bütün təhlükəsizlik məsələlərinə, o cümlədən də hava məkanının qorunmasına bu adam cavabdehdir. Həmzət Kadırova bu vəzifəni ona görə verməyiblər ki, o, peşəkar təhlükəsizlik mütəxəssisidir. Sadəcə olaraq o, Ramzan Kadırovun qardaşı oğlu - əmisinin gülbalası oldugu üçun bu vəzifəni tutub. Elə bu səbəbdən də işini bilmir. Təsəvvur edin ki, bu "məmurun" hava məkanını bağlamaq əmri 10-15 dəqiqə gecikdiyinə görə 38 nəfər həlak olub, 29 nəfər müxtəlif dərəcəli bədən xəsarətləri alıb və AZAL-ın 16,8 milyon dollar dəyərində olan təyyarəsi sıradan çıxıb. Bu cür məsuliyyət tələb edən işə qeyri-peşəkarların qohumbazlıq prinsipi ilə təyin edilməsi görün necə faciələrə gətirib çıxarır. Məsələn, bu özündənmüştəbeh "komandir" həmin gün Çeçenistanın hava məkanını 08.05-də bağlasaydı, heç bir faciə baş verməyəcəkdi. Sadəcə olaraq təyyarə ya Bakıya geri qayıdacaqdı, ya da digər yaxın hava limanına eniş edəcəkdi. Lakin bu yerində olmayan "komandir" təyyarə vurulandan 5 dəqiqə sonra - saat 08.21-də öz "möhtərəm" əmrini verib. Nəticə isə bütün dünya ictimaiyyətinə bəllidir. Amma hələ də Rusiya hökuməti bu "məmurunu" cəzalandırmayıb. Başqa caza bəlkə də gecikə bilər, amma Həmzət Kadırov dərhal vazifəsindən kənarlaşdırılmalıdır ki, belə faciələr bir daha təkrarlanmasın. Bu gün də Şimali Qafqaz üzərindən uçuş edən təyyarələri təhlukə gözləyir. Çunki bu regionun təhlükəsizlik məsələsinə cavabdeh olan səxs Ramzan Kadırovun ərköyün, amma qeyri-peşəkar qardaşı oğlu Həmzət Kadırovdur.
Dərhal məsuliyyətə cəlb edilməli ikinci dövlət məmuru isə Rostov-Don şəhərinin Platov beynəlxalq hava limanının (Regionların hava limanları holdinqinə daxildir) icraçı direktoru Aleksandr Yuryeviç Serovdur. A.Serov qəzaya uğrayan "Embraer 190" təyyarəsinin ekipajı ilə əlaqə saxlayan ikinci hava limanının direktordur. O, təyyarənin Aktauya göndərilməsindən - pilotla əlaqədən təxminən 2 saat yarım sonra Aktau hava limanının direktoru ilə əlaqə saxlayaraq deyib ki, təyyarənin salonunda oksigen balonu partlayıb və sərnişinlər huşunu itirib. Bu yalan xəbər kimə və nəyə görə verilib, onun sifarişçisi kimdir? Çünki təyyarənin sərnişin salonunda buna bənzər bir hasisə bas verməyib. Əlbəttə, Mineralnıye Vodı və Mahaçqala hava limanlarının da rəhbərlikləri istintaqa cəlb edilməlidir ki, nəyə görə vəziyyət düzgün qiymətləndirilməyib, təyyarənin qəza enişi təşkil olunmayib. Amma A.Serovun əməlində cinayətin üstünü ört-bastir etmək cəhdinin əlaməti olduğu aydın-açıq görünür. Rusiya rəhbərliyi bu iki səxsi dərhal vəzifəsindən kənarlaşdırmalı və məsuliyyətlərini müəyyən etməlidir. Amma hələ də bu barədə heç bir qərar yoxdur.
Akif NƏSİRLİ
