Əli Orucov: "Vuçiçin səsləndirdiyi fikirlər tamamilə qeyri-ciddi proqnozdur"
Serbiya Prezidenti Aleksandar Vuçiç "Şimal axını" qaz kəmərinin bir ildən sonra işə salınacağını proqnozlaşdırıb. "Bir ildən gec olmayaraq "Şimal axını" amerikalı investorlara məxsus olacaq və qaz Rusiyadan Avropaya boru kəməri ilə axacaq", - deyə Serbiya Prezidenti bildirib.
Qeyd edək ki, 2022-ci il sentyabrın 26-da Rusiyadan Avropaya qaz nəql edən "Şimal axını" və "Şimal axını 2" qaz kəmərlərində partlayışlar qeydə alınıb. Almaniya, Danimarka və İsveç hadisənin təxribat nəticəsində baş verdiyini istisna etməyiblər. Kəmərlərin operatoru olan "Nord Stream AG" kompaniyası təmir vaxtını təxmin etməyin mümkün olmadığını deyib.
Moskvada faktla bağlı cinayət işinə başlanılıb. Rusiya Prezidentinin mətbuat katibi Dmitri Peskovun sözlərinə görə, "Şimal axını" qaz kəmərlərində baş verən partlayışlarla bağlı dəfələrlə məlumat tələb etsələr də, heç bir informasiya ilə təmin olunmayıblar.
Maraqlıdır, Vuçiç bir ildən gec olmayaraq "Şimal axını" qaz kəmərinin investorluğunun ABŞ-a keçəcəyini deməklə nə demək istəyir? Bir ildən sonra nə baş verəcək ki? Məgər Rusiyanın əmlakın bölüşdürəcəklər?
"Belə bir şeyin bu və ya digər dərəcədə baş verməsi mümkün görünmür"
Sözügedən məsələyə aydınlıq gətirən AMİP funksioneri Əli Orucov "Bakı-Xəbər"ə açıqlamasında deyilənləri qeyri-ciddi hesab etdiyini bildirdi: "Məsələ ondadır ki, Serbiya tarixən Rusiya ilə yaxın münasibətlərə malik ölkə olub. Vuçiç bu statusdan bir növ sui-istifadə edərək hansısa "proqnozlar" verir. Gah deyir 3-cü dünya müharibəsi baş verəcək, gah da deyir Avropa İttifaqı dağılacaq. İndi də deyir ki, "Şimal axını" amerikalı investorlara məxsus olacaq. Əgər "Şimal axını" kəmərinin işləməsi Birləşmiş Ştatların marağında olsaydı, o zaman Avropa İttifaqı ölkələrini Rusiya qazından imtina etməyə məcbur etməzdi. Əgər bu, onların marağında olsaydı, "Şimal axını 2" qaz kəmərlərini partlatmazdılar. Nəzərə almaq lazımdır ki, Avropa Rusiya qazından imtina edir, əvəzində ABŞ maye qazını baha qiymətə satır. Rusiya qazından imtina Birləşmiş Ştatların maraqlarına uyğundur. Vuçiç elə danışır ki, sanki Rusiya 90-cı illərin ağır durumunda olan ölkədir və maliyyə çatışmazlığı səbəbindən məcbur olur qaz kəmərlərini ABŞ-a verir. Boris Yeltsinin dövründə Rusiya hansısa zavodu, boru kəmərini ABŞ-a vermədi. Qaldı ki, Putin kimi bir dövlət başçısı belə bir güzəştə getsin. Ona görə də Vuçiçin səsləndirdiyi fikirlər tamamilə qeyri-ciddi proqnozdur. Belə bir şeyin bu və ya digər dərəcədə baş verməsi mümkün görünmür. Bunun üçün gərək Rusiya dövlət olaraq parçalansın".
Vidadi ORDAHALLI
