Azər Həsrət: "Rusiya tərəfinin bu yanaşması əslində bir sığortalanma cəhdidir"
AZAL təyyarəsinin qəzası ilə bağlı araşdırmanın nəticələri açıqlanmadan bu hadisə haqqında şərh verməyəcəyik. Bu barədə Rusiya Prezidenti Vladimir Putinin mətbuat katibi Dmitri Peskov brifinq zamanı bildirib.
"Araşdırmanın nəticələri əsasında veriləcək qərarlar elan edilənə qədər biz özümüzə hansısa qiymət vermək hüququnu tanımırıq və bunu etməyəcəyik. Bununla yanaşı, bizim aviasiya qurumlarımız var və bu məsələlərdə hər hansı məlumat yalnız onlardan gələ bilər. Biz isə bu hadisəni şərh etmək hüququnu özümüzdə görmürük", - deyə Peskov vurğulayıb.
Maraqlıdır, Peskov bununla nə demək istəyir? Necə yəni araşdırma bitməyincə hadisəni şərh etməyəcəyik? Siz super dövlətin başında duranlar bilmirsiniz Qroznıda təyyarə ilə bağlı nə baş verib? O baxımdan bu nə deməkdir?
"Etiraf etmək əvəzinə, Peskov ölkəsinin aviasiya qurumlarından bəhs edir"
Sözügedən məsələni "Bakı-Xəbər"ə şərh edən siyasi şərhçi Azər Həsrətin fikrincə, Rusiya tərəfinin bu yanaşması əslində bir sığortalanma cəhdidir: "Çünki hadisə faktiki olaraq necə baş veribsə, artıq bütün dünya bilir. Baxmayaraq ki, rəsmi araşdırmalar başa çatmayıb. Ancaq ilkin işartılar ondan xəbər verir ki, təyyarə vurulub. Təyyarəni də Rusiya raketləri ilə vurublar. Eyni zamanda vurulmuş təyyarəni ölümə tərk ediblər. Məcbur ediblər ki, Xəzər dənizinə getsin, orada suya düşsün və bütün sübutlar, izlər ortadan qalxsın. Yəni bu yolla məsələni ört-basdır etmək istəyiblər. Yeri gəlmişkən, ilk anlardan bu fikirdəyəm ki, təyyarəni məqsədli şəkildə vurublar. Yəni bu, bir səhv deyil. Ona görə də bu gün Rusiyanın rəsmi dairələri, xüsusən də Kreml üzr istəmək məsələsində belə nala-mıxa vurur. Halbuki, onlar bir təəssüf mesajı yayımlaya bilərdilər. Təbii, biz demirik ki, rəsmi araşdırmanın nəticəsi bitmədən bütün məsuliyyətlə bağlı fikir bildirsinlər. Ancaq ən azından onu deyə bilərdilər ki, ilkin məlumatlara görə təyyarənin vurulma ehtimalı yüksəkdir, yaxud da var və biz buna görə üzürxahlıq edirik. Araşdırılması üçün də gərəkli addımları atacağıq. Bunu demək əvəzinə, Peskov Rusiyanın aviasiya qurumlarından bəhs edir. Yəni həmin qurumlar nəsə deyəcəklər. O zaman Rusiya dövləti hara baxır? Sənin ölkəndə xaricdən gələn mülki təyyarəni raketlə vururlar. Vurmaqları azmış kimi, təyyarənin yaxın hava limanlarına enişinə imkan vermirlər. Niyə? Niyə məcbur ediblər ki, Xəzər dənizi üzərinə yönəlsin və o qədər ciddi şəkildə zədələnmiş bir təyyarə 400 kilometrdən artıq bir məsafəni uçsun? Halbuki, təyyarə ən yaxın hava limanlarından birinə enə bilərdi və insanlar xilas olardı. Bunu etməyiblər, indi də durub nala-mıxa vururlar. Əlbəttə, həqiqətlər zatən bəllidir, amma rəsmi araşdırma nəticələri də olacaq, mütəxəsisslər bütün dəlilləri, faktları, sübutları bir araya toplayıb dəqiq şəkildə deyəcəklər ki, təyyarənin başına nə gəlib. Ancaq kənardan baxsaq da, əldə edilən dəlilləri tutuşduranda bəlli olur ki, təyyarənin vurulması üçün hazırlıq işləri görülüb. Bilə-bilə ki, bu, sərnişin təyyarəsidir, əvvəlcədən vurmağı planlaşdırıblar. Hətta belə bir ehtimal da irəli sürmək olar ki, hədəfdən bir qədər yayınıblar və tam nişan ala bilməyiblər. Mümkündür ki, buna səbəb Qroznodakı duman olub. Ona görə də işi bitirmək üçün təyyarəni məcburən Xəzər dənizinə yönəldiblər. O üzdən, nala-mıxa vurmağın mənası yoxdur. Rusiya dövlətinin hansı xarakterə malik olduğunu bütün dünya bilir. Üstəlik bu, Rusiyada sərnişin təyyarələrinin vurulması ilə bağlı ilk hadisə deyil".
Vidadi ORDAHALLI
