Elşad Həsənov:"Əsma Əsəd artıq başa düşür ki, Rusiya Əsəd ailəsinə qazılmış qəbirdir, buna görə də xəstəlik bəhanəsi ilə Londona getmək istəyir"
Suriyanın keçmiş prezidenti Bəşər Əsədin və ailəsinin qaçıb Moskvaya sığındığı məlumdur. Əsəd ailəsi Moskvaya gəldikdən sonra mətbuatda Əsma Əsədin aqressiv xərcəng növü olan kəskin miyeloid leykemiyadan əziyyət çəkdiyi və müalicə üçün vətəndaşı olduğu (Ə.Əsədin ikili vətəndaşlığı var) Britaniyaya getmək istədiyi bildirildi.
Əsma Əsəd nəyin bahasına olursa olsun Rusiyadan çıxıb Böyük Britaniyaya getmək istəyir ki, özlərini müdafiə etsin. Bu arada Böyük Britaniyanın ədliyyə naziri Robert Cenrik açıqlamasında bildirib ki, Ə.Əsədin Britaniyaya qayıdışı ölkədə narahatlığa səbəb olacaq. Eyni zamanda onun İngiltərədə dəbdəbəli həyatına qayıtmasının milyonlarla qurbana təhqir olacağı düşünülür.
Britaniyanın ədliyyə naziri aydın şəkildə bəyan edib ki, Ə.Əsədə sığınacaq vermək Əsədlərin rejimi dövründə öldürülmüş yüz minlərlə insanın ruhuna hörmətsizlikdir, təhqirdir. Yəni Əsəd ailəsi beynəlxalq cinayət məhkəməsi qarşısında cavab verməlidir, nəinki etibarlı sığınacaqla təmin olunmalıdır.
Ə.Əsəd xəstədirsə, bu xəstəlikdən Londonda yox, Moskvada da həyatını itirə bilər.
Ə.Əsədin Londona getmək cəhdləri ona bənzəyir ki, keçmiş birinci xanımın xəstəliyini bütün dünyanı aldatmaq üçün qurublar. Yəni o həqiqətən də xəstədir və gedib mütləq Londonda müalicə olmalıdır yanaşmasının özü səhvdir. Halbuki, Rusiya səhiyyəsi də çox inkişaf edib, daha keyfiyyətlidir, onu rus həkimləri də müalicə edə bilər, bunun üçün Londona getməyə nə ehtiyac var?
Necə olur ki, Ə.Əsəd Suryada yaşadığı dövrdə xəstələnmirdi, bu xəstəliyin adını çəkmirdi, amma beş gündür Moskvaya gedib, indi xəstələnib.
Bütün bunlar ola bislin ki, Ə.Əsədin Moskvadan çıxıb Londona sığınması üçün qurulmuş bir oyundur. Amma Rusiya hakimiyyətindən də artıq tələb edilməyə başlanılıb ki, Əsəd ailəsi Suriyaya verilməlidir. Yəni onların Moskvadan başqa bir ölkəyə yox, məhz Suriya xalqına verilməsi tələbi var. Bu gün Suriya xalqı da, Türkiyə də tələb edir ki, Əsəd ailəsi mütləq Suriyaya verilməlidir. Belə şəraitdə Əsma Əsədin, ümumiyyətlə Əsəd ailəsinin Moskvadan Suriyaya yox, başqa bir dövlətə təhvil verilməsi nə qədər ədalətli və beynəlxalq hüquq normalarına uyğundur? Bu qədər cinayətlər törədəndən sonra daha etibarlı beynəlxalq himayələr altına sığınmaq istəyirlər. Amma onların indiki şəraitdə Suriya dövlətinə yox, Avropa ölkələrinə və sairə verilməsi nə dərcədə doğru olar?
"Əslində, Bəşər Əsəd və ailəsi Suriya xalqına təhvil verilməlidir, çünki onlar törətdikləri cinayətlərə görə ədalət məhkəməsi qarşısında cavab verməlidirlər"
Siyasi ekspert Elşad Həsənov "Bakı-Xəbər"ə şərhində bildirdi ki, uzun illərdir Bəşər Əsəd və onun həyat yoldaşı Əsma Əsəd Suriya xalqına zülm edib, divan tutub, minlərlə insanı istintaqsız, məhkəməsiz öz təcridxanalarında, türmələrində saxlayıblar: "O təcridxanalarda uşaqlar dünyaya gəlib, Suriya türmələrində işıq üzü görməyən yeni bir nəsil dünyaya gəlib. Xalqa edilən bu zülmün, təbii ki, cavabı olmalı idi. Xalq ayağa qalxıb Əsəd rejimini Suriya tarixindən sildi. Əsəd isə öz ailəsi ilə Moskvaya sığındı. Çünki əvvəldən o hazırlıqları görmüşdü. Moskvada bahalı malikanələr alıb, pullarını yerləşdirib. Sonra qalan pullarının ardınca Suriyaya getdi və bir həftə ərzində xalq ayağa qalxıb Əsədi qovdu, o da təyyarəsini pulları ilə doldurub Mosvaya gəldi. Bu gün onlar tələyə düşdüklərini bilirlər və Rusiyanın əlindədirlər, tərpənə bilməyəcəklər. Əsəd ailəsi Moskvaya sığındıqdan bir neçə gün keçdikdən sonra Rusiya Duması deputatlarından belə bir fikir sələndirildi ki, Əsədin gətirdiyi pulları Mariupol şəhərinin bərpasına yönəltmək lazımdır. Bundan başqa da fikirlər səsləndi ki, həmin pullar, Suriya xalqından oğurlanaraq Rusiyaya gətirilən var-dövlət məhz Rusiyanın şəhərlərinin inkişafına xərclənsin. Bəli, bu belə də olacaq. Əsədin öz xalqına zülm edərək, var0dövlətini talayaraq gətirdiyi pullar - 135 milyard dollar, 200 ton qızıl Əsəd ailəsinin özünə veriməyəcək, əllərindən alınacaq. Bu tam olaraq aydındır. Onların yaşaması üçün evləri var, dolanışıq üçün də müəyyən vəsait verəcəklər. 135 milyarddan Əsəd ailəsinə 1 milyard versələr böyük şeydi, qalan pulları isə Rusiya alacaq. Çünki bu gün Rusiya çox çətin vəziyyətdədir, müharibə aparır, artıq sanksiyalar Rusiya iqtisadiyyatına ciddi təsir edir. Hətta pensiyaların ödənişində belə problemlər yaranıb. 2025-ci ildə Rusiyanın tam çökəcəyi proqnozlaşdırılır, böyük ticarət mərkəzlərinin bağlanılacağı deyilir. Çünki hamısı banklara borcludur və gəlir əldə edə bilmədikləri üçün banklara ödənişlər edə bilmirlər. Yəni Rusiya iqtisadiyyatı çökür, ona pul lazımdır. Bu pulu da, necə deyərlər, Bəşər Əsəd öz xalqını çapıb-talayıb gətirdi k, ay rus, buyur, xərclə. Bu real vəziyyətdir.
Bəli, Əsma Əsəd Britaniya vətəndaşıdır, o, Londona özünü müdafiə etmək üçün sığınmaq istəyir. Əsma Əsəd artıq başa düşür ki, Rusiya Əsəd ailəsinə qazılmış qəbirdir. Buna görə Əsma Əsəd özünü xəstəliyə vurub müalicə adı ilə Londona getmək istəyir ki, xilas olsun. Amma Əsma Əsədin Londona getmək istəyinə qarşı Britaniya rəsmliləri, baş nazir, ədliyyə naziri öz fikirlərini açıqlayıblar. Britaniya xalqı da Əsəd ailəsinin Britaniyaya getməsinə etiraz edir ki, belə adamlar onların ölkəsinə verilməli deyil. Əslində, Bəşər Əsəd və ailəsi Suriya xalqına təhvil verilməlidir, çünki onlar törətdikləri cinayətlərə görə ədalət məhkəməsi qarşısında cavab verməlidirlər".
E.Həsənovun sözlərinə görə, tarix göstərir ki, diktatorların sonu pis olur, Əsəd ailəsi Suriyaya getməkdənsə Rusiyada dustaq həyatı yaşamaq istəyəcək. "Hesab edirəm ki, onlar orada çox yaşaya bilməyəcəklər, elə çəkdikləri xiffətdən, əvvəlki həyatlarına həsrətdən ürəkləri partlayıb öləcəklər. Onlar maksimum beş-altı ay yaşaya bilərlər. Yəni öz millətinə, öz dövlətinə zülm edib, onun var-dövlətini çapıb-talayıb xaricdə gizlədənlər bundan nəticə çıxarmalıdırlar. Tarixdə o hökmdarlar yaşayır ki, xalqı üçün nəsə edir, xalqın tarixinə öz adlarını qızıl hərflərlə yazırlar. Bu gün hakimiyyətdə olan liderlərdən belələri var.
Bu gün Azərbaycan lideri xalqımızın tarixinə öz adını qızıl hərflərlə yazdı. Torpaqlarımızı işğaldan azad edib ərazi bütövlüyümüzü bərpa etdi.
Ancaq bu gün eyni zamanda Bəşər Əsəd və ona bənzərlər də var ki, xalqını çapıb-talayıb, xarici ölkələrdə, ABŞ-da, İngltərədə, Fransada, digər Avropa ölkələrində milyonlar, milyardlar xərcləyib villalar, malikənələr alırlar, var-dövlətlərini ora daşıyırlar, xalqını da ac-yalavac saxlayırlar. Nəticədə onların xarici banklarda saxladıqları pullara əlləri çatmır, o pullar o dövlətlərə qalır.
Hesab edirik ki, Bəşər Əsədin və onun həyat yoldaşı Əsma Əsədin də sonu Rusiyada gələcək. İnanmıram ki, Rusiya Əsəd ailəsini hansısa ölkəyə versin. O, əksinə, onların Avropa ölkələrinə, yaxud ABŞ-a getməsini əngəlləyəcək"-deyə E.Həsənov qeyd etdi.
İradə SARIYEVA
