Afsəddin Nəbiyev: "İnanmıram Moskva ilə heç bir şərt olmadan tezliklə sülh danışıqları olsun"
Rusiya Federasiyası Şurasının sədri Valentina Matviyenko deyib ki, 2025-ci ildə Ukrayna ilə heç bir şərt olmadan sülh danışıqları başlanacaq:
"İstənilən danışıqlarda kompromislər axtarmaq lazımdır. Ukrayna ilə münaqişənin həlli ilə bağlı danışıqlar, heç şübhəsiz, gələn il başlayacaq. Mən öz fikrimi bir daha bildirirəm. Təbii ki, danışıqlar prosesi mütləq gələn il başlayacaq. Amma mənim fikrimcə, danışıqlar prosesi çox çətin olacaq. İstənilən danışıqlarda kompromislər axtarmaq lazımdır, lakin Rusiyanın səsləndirdiyi əsas şərtlərə ciddi riayət etməklə".
Matviyenkonun sözlərinə görə, pozulmuş İstanbul razılaşmaları Rusiyanın yanaşmalarının təməlini, əsasını ehtiva edir: "Biz bu yoldan zərrə qədər də kənara çıxmayacağıq. Qalan hər şeyi dialoqda müzakirə edə və kompromislər axtara bilərik. Və biz dəfələrlə demişik ki, istənilən vaxt danışıqlar masası arxasına əyləşməyə hazırıq, lakin Minsk razılaşmaları ilə əldə etdiklərimiz təkrarlanmayacaq".
Maraqlıdır, Matviyenko niyə belə əmin danışır?
"Rusiyanın indiki siyasi rəhbərliyi Trampın gələn ay qurulacaq komandasına arxayınlaşıb"
Sözügedən məsələ ilə bağlı fikirlərini "Bakı-Xəbər"lə bölüşən AMİP-in sədr müavini Afsəddin Nəbiyev hesab edir ki, Rusiya siyasətçiləri XXI əsrdə yaşasalar da, hələ də keçmiş imperiya təfəkküründən əl çəkmək niyyətində deyillər: "Yaxın yüz ildə əksər imperiya dövlətləri imperialist siyasətinə son qoyaraq modern dövlətlərə çevrildilər. Elə götürək qardaş Türkiyə dövlətini. Türkiyə imperiya düşüncəsindən 101 il öncə sağaldı - Osmanlıdan imtina edib cumhuriyyət qurdular. Hazırda Osmanlı dövlətinin yerində qurulan müasir Türkiyə dövləti bütün dünya dövlətlərinə nümunədir. İkinci Dünya müharibəsindən sonra Avropanın əksər dövlətləri, Fransa istisna olmaqla, müstəmləkə siyasətindən imtina etdi. Ancaq Rusiyaya gəldikdə, bütün bunları söyləmək çox çətindir. Elə Matviyenkonun son açıqlaması da imperialist düşüncənin "məhsuludur". Rusiya uzun illərdir bu zərərli düşüncədən müalicə oluna bilmir və görünən budur ki, müalicə olunmağa meylli də deyil. Rusiya münaqişə ocaqlarına milyardlar xərcləyib, əvəzində milyonlarla insan qaçqın həyatı yaşayıb, on minlərlə insan, o cümlədən də dinc əhali, körpələr qətlə yetirilib. Bütün bunları bizlər də yaşamışıq. Ümumiyyətlə, 1990-ci ildə 20 yanvar faciəsi dediklərimin sübutudur. Mən inanmıram Moskva ilə heç bir şərt olmadan tezliklə sülh danışıqları olsun. Rusiyanın iqtisadi gücü uzun müddətli hərbi əməliyyatlara imkan vermir. İkincisi, Rusiyanın indiki siyasi rəhbərliyi Trampın gələn ay qurulacaq komandasına arxayınlaşıb. Ola bilər ki, Matvienkonun əminliyi bu prosesə hesablanıb".
Vidadi ORDAHALLI
