Müstəqil Azərbaycanın tarixində ilk dəfə olaraq Xankəndi şəhərində parad keçiriləcək. Xatırladaq ki, noyabrın 8-də Zəfər Günü münasibətilə Xankəndi şəhərində parad olacaq və bununla bağlı bütün zəruri addımlar atılıb.
Paradda Müdafiə Nazirliyinin, Daxili İşlər Nazirliyinin Daxili Qoşunlarının, Dövlət Sərhəd Xidmətinin, Dövlət Təhlükəsizliyi Xidmətinin, xüsusi təyinatlı və digər silahlı birləşmələrin keçidi olacaq. Həmçinin düşməndən qənimət kimi götürülən hərbi texnikalar nümayiş etdiriləcək.
Qeyd edək ki, 1991-ci il dekabrın 28-də Azərbaycanın Xankəndi şəhəri və ətraf ərazilər üçün mühüm strateji əhəmiyyətə malik olan Kərkicahan qəsəbəsi Ermənistan silahlı qüvvələri tərəfindən işğal olunmuşdu. Bu il sentyabrın 19-20-də Qarabağda həyata keçirilən lokal xarakterli antiterror tədbirlərindən sonra Azərbaycan ordusu Xankəndi şəhərini və Kərkicahan qəsəbəsini separatçılardan azad edib. Azərbaycan prezidenti İlham Əliyev oktyabrın 15-də Xankəndi şəhərində Dövlət Bayrağını ucaldıb. 44 günlük Vətən müharibəsində əldə olunan tarixi zəfər 2023-cü ildə tamamlandı. Azərbaycan prezidenti, Ali Baş Komandan İlham Əliyevin rəhbərliyi ilə Xankəndidə separatçı rejimin ləğv edilməsi, Azərbaycanın hər bir qarış torpağı üzərində suveren hüququnun tam bərpa edilməsi kimi tarixi missiya yerinə yetirildi. 2023-cü il oktyabrın 15-də Ali Baş Komandan Azərbaycan Bayrağını Xankəndidə, Ağdərədə, Xocalıda və Xocavənddə ucaldaraq xalqımıza 30 ildən çox səbrlə gözlənilən ən böyük müjdəni - tam qələbə xəbərini verdi. Dövlət başçısı Xankəndidən xalqa müraciətində böyük qürur hissi ilə bildirdi ki, son 20 il ərzində verdiyi bütün vədlər, qarşıya qoyduğu bütün vəzifələr icra edildi. Tarixi zəfərimizi həzm edə bilməyən bədxahlar bir daha miskin duruma düşdülər. Məsələnin bu tərəfinə nəzər salan Milli Məclisin deputatı Ülvi Quliyev qeyd edir: "Bədxahlarımızın növbəti səhvi onunla bağlı oldu ki, onlar tarixdə şəxsiyyət, lider faktorunun əhəmiyyətini unutdular. Böyük dövlət adamı Uinston Çörçill vaxtilə belə demişdi: "Siyasət də müharibə kimi həyəcanlı və təhlükəlidir. Müharibədə bizi bir, siyasətdə isə dəfələrlə öldürə bilərlər". Ermənistana himayədarlıq edən dairələr bu gün də anlamırlar ki, Azərbaycan prezidenti ümumxalq maraqlarımızın qorunması yolunda ilk gündən hər cür fədakarlığa hazır olub və bu, indi də belədir. Heç bir qüvvə prezident İlham Əliyevi bu yoldan döndərə bilməz! Beynəlxalq münasibətlərin aparıcı aktorlarından bəzilərinin açıq və ya gizli şəkildə mane olmaq cəhdlərinə baxmayaraq, "Laçın" sərhəd-buraxılış məntəqəsinin qurulması ilə bir daha sübut edildi ki, Azərbaycan xalqı və onun lideri ilə təhdid və hədə tonunda danışıq üslubu heç bir nəticə verməyəcək. Cəmi birgünlük antiterror tədbiri isə ölkəmizin suverenliyinin tam şəkildə təmin olunmasına xidmət edən növbəti tarixi uğurumuzdur. Onların hər birinin arxasında prezident İlham Əliyevin beynəlxalq hüquqa, tarixi ədalətə və dövlət maraqlarımıza söykənən qətiyyətli mövqeyi, qəhrəman ordumuzun şücaəti, xalqımızın birliyi və öz prezidentinə tərəddüdsüz inamı dayanır... Bir həqiqəti bilməliyik. Bilməliyik ki, Ermənistanın havadarları, yumşaq desək, Azərbaycanın tarixi zəfərindən, iki əsrlik anti-Azərbaycan siyasətlərinin iflasa uğramasından heç də məmnun deyillər. Ona görə də əldə etdiyimiz tarixi zəfərin miqyasını və bu qələbənin hansı dövlətlərin, hansı dairələrin maraqları ilə üst-üstə düşmədiyini dəqiq bilməli və onları unutmamalıyıq. Elə prezident İlham Əliyevin Dünya Azərbaycanlılarının Şuşada keçirilən V Qurultayında söylədiyi bu tarixi gerçəkliyi isə gələcək nəsillərə çatdırmalıyıq: "Biz təkcə Ermənistanla müharibə aparmamışıq. Biz təkcə dünya erməniliyi ilə müharibə aparmamışıq, biz Ermənistanın himayədarları ilə müharibə aparmışıq və bu müharibədə Qələbə qazanmışıq. Ona görə bu qələbənin tarixi əhəmiyyəti daha böyükdür".
Onu da qeyd edək ki, Xankəndidə Azərbaycan Bayrağının qaldırılması ilə Azərbaycan ərazilərində separatizmin bütün forma və təzahürlərinə, simvolikasına son verildi. Bu, həm də xarici dairələrə, eləcə də fikrindən revanşizm xəyalları keçirənlərə konkret mesaj oldu. Bildirildi ki, Azərbaycan hər nə bahasına olur-olsun, öz ərazilərindən əsla vaz keçməyəcək. Artıq Xankəndi şəhərindəki hərbi parad da düşmənlər üçün növbəti konkret mesajdır. Müzəffər Ali Baş Komandanın rəhbərliyi altında Azərbaycan xalqı bütün dünyaya sübut etdi ki, Qarabağ Azərbaycandır! Vətən müharibəsini zəfərlə başa vuran ölkəmiz bölgədə yeni reallıqlar yaradıb. Bu gün Azərbaycanın hər bir guşəsində üçrəngli Bayrağımız dalğalanır. İndi Azərbaycan işğaldan azad edilmiş ərazilərdə tikinti-quruculuq işləri aparır. Beynəlxalq standartlara uyğun, müasir tipli kəndlər, qəsəbələr, şəhərlər salır. Erməni silahlılarının viran qoyduğu Qarabağ gülüstana çevrilib, orada yenidən həyat qaynamağa başlayır. İkinci Qarabağ müharibəsindən sonra işğaldan azad edilmiş ərazilərdə bərpa-quruculuq işlərinin intensivləşməsi, erməni vandallarının dağıtdıqları infrastrukturun bərpası və yenilənməsi, iri şəhərlərin baş planlarının hazırlanması Böyük Qayıdış prosesini də tezləşdirir.
Nahid SALAYEV
