Ramil Hüseynov: "... bağlanmalıdır"
Məlum olduğu kimi, əsasən 2000-ci illərdən başlayaraq Qərbə bağlı bir sıra xarici fondlar Azərbaycanda müxtəlif layihələr həyata keçirməyə başladılar. Vətəndaş cəmiyyəti adı altında həyata keçirilən bir sıra proqramlarda məqsəd ölkədə etimatsızlıq mühiti yaratmaq idi.
Yəni gənclər arasında dövlətə, onun qurumlarına inamsızlıq, etimadsızlıq formalaşdırmq və daha sonra xaos yaratmaq. Ancaq bu planlar baş tutmadıqca yeni planlar ortaya atıldı.
2017-ci ildə əldə olunan razılıqlara əsasən Azərbaycanın bəzi bölgələrində Amerika guşələri yaradılıb. Sözügedən guşələrin işi, həyata keçirilən proqramlarda məqsəd gənclərin beynini yumaq olub. Belə ki, təbliğat aparmaqla gənclərin beynini qarışdırmaq və dövlətə qarşı qaldırmaq niyyəti güdülüb. Regionlarda yaradılan Amerika guşələri Azərbaycan gənclərinin düşüncələrini pozmaq və onları Azərbaycan dövlətinə qarşı qızışdırmaq üçün vasitədir. Məsələn, ABŞ səfirliyinin iştirakı ilə 2020-ci ildən başlayaraq Gəncə şəhəri, Salyan, Xaçmaz və Kürdəmir rayon mərkəzi kitabxanalarında "Amerika guşələri" kimi tanınan ictimai informasiya və fəaliyyət mərkəzləri yaradılıb.
"Yol vermək olmaz ki, gənclərin beyni yuyulsun, onlardan müəyyən qaranlıq məqsədlər üçün istifadə edilsin"
Məsələ ilə bağlı "Bakı-Xəbər"ə açıqlama verən "Yeni Xətt" Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, belə guşələrə ölkədə yer olmamalıdır: "Çünki belə mərkəzlər əsasən təbliğat məqsədi daşıyır. Adı başqa olsa da, fəaliyyəti adına, elan etdiyi layihələrə uyğun olmur. Əsasən bölgələrdə gənclər arasında yaranan boşluqlardan istifadə edərək onların beynini yuyurlar. Hesab edirəm ki, belə guşələr bağlanmalıdır. Yol vermək olmaz ki, gənclərin beyni yuyulsun, onlardan müəyyən qaranlıq məqsədlər üçün istifadə edilsin. Dövlətçiliyimiz üçün belə guşələr potensial minadır. Çünki illər sonra bunun fəsadları ortaya çıxır. Nəzərə almaq lazımdır ki, dövlətimiz güclüdür. Hazırda 90-cı illər deyil ki, belə mərkəzlər meydan sulasın. O zaman vəziyyət ağır idi, ölkədə müharibə gedirdi, yüz minlərlə qaçqın və məcburi köçkün var idi. Sosial-iqtisadi vəziyyət ağır idi. Məhz həmin dövrdə bir sıra missioner təşkilatlar ölkədə fəaliyyət göstərməyə başladılar. Düzdür, illər sonra qanunda boşluqlar aradan qaldırıldı və belə təşkilatların fəaliyyəti məhdudlaşdırıldı. Ancaq hələ də Qərbə bağlı bu kimi layihələr var və buna nəzarət artırılmalıdır. Çünki bu kimi xarici təsisatların öz maraqları olur və onların fəaliyyəti müəyyən məqsədlərə, uzaq hədəflərə xidmət edir. Müxtəlif çətir, layihələr adı altında öz məqsədlərini həyata keçirirlər, gəncləri dövlətçilikdən uzaq salmağa çalışırlar. Bu baxımdan hesab edirəm ki, ayıq-sayıq olmalıyıq. Məsələn, bir zamanlar possovet ölkələrində mövcud olan Gülən şəbəkəsinin arxasında ABŞ dayanırdı. Məhz təhsil şəbəkəsi əsasında onlar fəaliyyət göstərirdilər".
Vidadi ORDAHALLI
