Azərbaycanlıların İrəvana turist getməsi təsdiqlənmədi...
Eldəniz Əmirov: "Bu, birmillətli ölkənin manipulyativ açıqlamasıdır"
Ermənistan KİV-i rəsmi statistikaya əsasən məlumat yayıb ki, güya 2023-cü ilin yanvar-sentyabr aylarında 13 Azərbaycan vətəndaşı Ermənistana səfər edib. İddiaya görə, onlar Ermənistana turist kimi gəliblər və ortalama qalma müddəti 2 gün olub.
Ötən il bu aylarda 5 azərbaycanlının bu ölkəyə səyahət etdiyi bildirilir. Bundan başqa, qeyd olunur ki, son 9 ayda Türkiyədən Ermənistana 9050 turist səfər edib.
Bu məlumat nə dərəcədə əsaslı ola bilər? Belə fakt doğrudan da qeydə alınıbsa, onda Ermənistana səfər edən 13 Azərbaycan vətəndaşı kimlər ola bilər?
Ekspert Eldəniz Əmirov "Bakı-Xəbər"ə açıqlamasında bildirdi ki, Ermənistan tərəfinin təqdim etdiyi heç bir statistikanı etibarlı hesab etmir: "Əgər bu əsasən də Azərbaycanla bağlıdırsa. Təsəvvür edin ki, 2021 - ci ildə Ermənistanın Xarici İşlər Nazirliyinin saytında bir məlumat verilmişdi. Həmin məlumatda Ermənistana vizasız gedib-gələn ölkələrin siyahısı təqdim edilmişdi. Bu siyahıda Azərbaycanın da adı var idi. Təsəvvür edin, Ermənistan 2021 - ci ildə Xarici İşlər Nazirliyinin saytında azərbaycanlıların vizasız Ermənistana keçdiyinə dair informasiya əks olunmuşdu. İki ölkə arasında heç bir münasibətin olmadığı bir məqamda hansısa vizadan necə söhbət gedə bilər?
Ermənistan tərəfdən edilmiş anormal bir yanaşmadır. Digər bir tərəfdən qeyd etmək istərdim ki, Ermənistan tərəfi ötən dövr ərzində, daha dəqiqi, bu ilin 6 ayı ərzində məlumat vermişdi ki, 1 - ci və 2 - ci rüblər ərzində Ermənistana 12 Azərbaycan vətəndaşı səfər edib. Hazırkı 13 nəfərlə 6 ay əvvəlki 12 nəfər arasındakı fərqi götürdükdə, son 3 ayda güya bir nəfər Azərbaycan vətəndaşı Ermənistana səfər edib. Amma ölkələrin münasibətlərini, Azərbaycan tərəfinin təhlükəsizlik baxımından bu məsələlərə önəm verməsi onu deməyə əsas verir ki, burada statistika ümumiyyətlə yanlışdır. Yaxud ola bilər ki, vaxtilə Azərbaycanda yaşayıb, sonra ikili vətəndaşlığı qəbul edən ölkələrdə yaşayan qeyri millətdən olan vətəndaşlar gedib Ermənistana. Onlar da gedən zaman ikinci vətəndaşlığı olan ölkədən gedir və milliyətcə də azərbaycanlı deyil. Sədəcə hər iki vətəndaşlığı saxlayıb. Ermənistan da müəyyən maraqlara söykəndiyi üçün, bu adamları Azərbaycan vətəndaşı kimi təqdim edir. Onsuz da Azərbaycan pasportu ilə Ermənistana daxil olmaq mümkün deyil. Mən düşünürəm ki, bu da birmillətli ölkənin manipulyativ açıqlamasıdır. O ki qaldı Türkiyə vətəndaşlarının Ermənistana səfərinə, Ermənistan vətəndaşlarının Türkiyəyə, türklərin də onlara səfər etməsi ilə bağlı ciddi bir problem yoxdur. Rəsmi statistikada Ermənistan tərəfi göstərməsə də, Türkiyə iqtisadiyyatının və orada yaşayan ermənilərin Ermənistanın sosial həyatının formalaşmasında çox böyük rolu var. Sərhədlər bağlı olsa da, diplomatik münasibətlərdə məlum problem olsa da, ermənilərin Türkiyəyə səfər etməsi ilə bağlı hər hansı problem yoxdur. Sadəcə, birbaşa səfər mümkün deyil. Ümumilikdə götürəndə, burada manipulyativ informasiyanın olma ehtimalı daha çoxdur. İkili vətəndaşlığı olan, üçüncü millətdən olan insanların burda olma ehtimalı daha böyükdü. Hətta Türkiyə ilə olan statistikanın şişirdilməsi ehtimalı da daha böyükdür".
Məhəmmədəli QƏRİBLİ
