Yadigar Məmmədli: "Müəyyən xarici dairələr dövlət başçımızın postmüharibə dövründə artan reytinqini həzm edə bilmirlər"
Azərbaycanda fəaliyyət gösdərmiş, göstərən beynəlxalq təşkilatlar heç vaxt maraqlı olmayıblar ki, Azərbaycan ərazilərini işğaldan azad etsin. Heç vaxt istəməyiblər ki, məcburi köçkünlər öz yurd-yuvalarına qayıtsınlar.
Bununla əlaqədar Ermənistana hansısa çağırış edilməyib, təzyiq ümumiyyətlə göstərilməyib. Həmin təşkilatların həyata keçirdiyi layihələrin mahiyyəti ondan ibarət olub ki, Azərbaycan bu reallıqlarla, necə deyərlər, barışsın.
Bunu sübut edən faktorlardan biri də 44 günlük Vətən müharibəsində Azərbaycanın qazandığı qələbədən sözügedən təşkilatların narahat olmasıdır. Çünki ərazi bütövlüyümüz bərpa olunandan sonra sistemli şəkildə həmin təşkilatlar ölkəmizi, dövlət başçısını qaralamağa başladılar. O baxımdan bəzi beynəlxalq təşkilatlar - USAİD, Marşall Fondu, belə görünür ki, Qarabağ münaqişəsinin həlli ilə cəmiyyətdə Prezident İlham Əliyevin bir neçə qat yüksəlmiş reytinqini həzm edə bilmirlər. O üzdən, fürsət düşən kimi Prezidentə zərbə vurmağa çalışırlar.
"Hələ də bununla barışmadıqları üçün müəyyən çirkin planları həyata keçirməyə cəhd edirlər"
Məsələ ilə bağlı "Bakı-Xəbər"ə açıqlama verən media eksperti Yadigar Məmmədlinin fikrincə, xarici fondların, təsisatların ölkəmizə qarşı belə fəaliyyəti yeni deyil: "Ona görə də biz buna artıq alışmışıq. Bu təşkilatlar hər zaman Azərbaycanın haqq davasına qarşı ədalətsiz mövqe sərgiləyiblər. Heç vaxt erməni vandalizmini qınamayıblar. Məhv edilən, yer üzündən silinən yaşayış məntəqələrini görməzdən gəliblər. Doğma yurdlarından qovulan azərbaycanlıların hüquqları, çəkdikləri iztirablar onları narahat etməyib. Bu təşkilatlar elə layihələr həyata keçiriblər ki, cəmiyyətimiz milli dəyərlərdən, öz keçmişindən uzaq düşsün. İşğal amili ilə barışmaq məcburiyyətində qalsın. Bir sözlə, onların siyasəti bundan ibarət olub ki, Azərbaycan güzəştə getməyə məcbur edilsin. Məhz bu çərçivələr daxilində Azərbaycan Ermənistanla münasibətləri tənzimləsin. Ancaq hər zaman Prezident İlham Əliyev bəyan edirdi ki, nə olur-olsun xalqımız işğalla barışmayacaq. Bir gün o torpaqları diplomatik yolla olmasa da, güc yolu ilə azad edəcəyik. Həqiqətən də elə oldu və Azərbaycan işğal altında olan əraziləri 2020-ci ildə güc yolu ilə azad etdi. Bütün xalqımız Ali Baş Komandanın ətrafında birləşdi. Əsgərlərimizin canı-qanı bahasına işğala son qoyuldu. Elə şanlı qələbə qazandıq ki, bəzi rayonlar bir güllə atılmadan azad edildi. Çünki Ermənistan buna vadar edildi. Azərbaycan bununla öz iradəsini ortaya qoydu. Ancaq təəssüflər olsun ki, bir sıra xarici fondlar BMT qətnamələrinin yerinə yetirilməsindən narahatdılar. Ermənilərin tərəfini tutaraq Prezident İlham Əliyevi hədəf alıb onun yeritdiyi siyasətə qarşı qaralama kampaniyası aparırlar. Çünki müəyyən xarici dairələr dövlət başçımızın postmüharibə dövründə artan reytinqini həzm edə bilmirlər. Hələ də bununla barışmadıqları üçün müəyyən çirkin planları həyata keçirməyə cəhd edirlər. Ali Baş Komandanın fəaliyyətinə kölgə salmağa çalışırlar. Ancaq hesab edirəm ki, onların planları yenə suya düşəcək".
Vidadi ORDAHALLI
