Azər Həsrət: "Xorvatiyanın məlum təşübbüsü digər Avropa ölkələri üçün də örnək olmalıdır"
Ermənistan işğalçı qüvvələrinin törətdiyi ən böyük müharibə cinayətlərindən biri də işğal altındakı ərazilərdə piyada və tank əleyhinə minaların yerləşdirilməsidir. Otuz ilə yaxın bir müddətdə Ermənistan tərəfindən işğal olunmuş ərazilərdə istifadə edilməyən bütün sahələr minalanıb.
Hazırda Azərbaycan dövləti ərazilərin minalardan və partlamamış hərbi sursatlardan təmizlənməsi işlərini həyata keçirir. Bu istiqamətdə ölkəmiz xarici ölkələrlə əməkdaşlıq edir.
Məlum olduğu kimi, Prezident İlham Əliyevin Xorvatiya Respublikasının Baş naziri Andrey Plenkoviç ilə təkbətək görüşü olub. Xorvatiyanın minalardan əziyyət çəkən ölkə olaraq Azərbaycana bu sahədə dəstək vermək niyyəti müsbət qarşılandı, minaların təmizlənməsi sahəsində təcrübə mübadiləsinin və əməkdaşlığın vacibliyi qeyd edilib.
Qeyd etdiyimiz kimi, Xorvatiya minaların təmizlənməsi məsələsində Azərbaycana dəstək verəcək. Beləliklə, işğaldan azad edilmiş ərazilərin minalardan təmizlənməsi məsələsində Azərbaycana dəstək verən ölkələrin sayı artır.
"Ərazilərin mina ilə çirkli qalması tək o ölkənin problemi deyil, bütün dünyanın dərdi olmalıdır"
Siyasi şərhçi Azər Həsrət "Bakı-Xəbər"ə açıqlamasında qeyd etdi ki, Xorvatiyanın bu prosesə qoşulması sevindiricidir. 30 il müddətində ermənilərin işğal altında saxladığı əraziləri o qədər çirkləndiriblər ki, oranı təkbaşına təmizləmək mümkün deyil. Bu baxımdan dünyanın mütərəqqi ölkələri, gücləri bu prosesdə Azərbaycanın yanında olmalıdır. Hətta Ermənistanla yaxından dostluq edən ölkələr belə bu prosesə öz töhfəsini verməkdən çəkinməməlidir: "Ermənistanın ən yaxın dostu sayılan, lakin meydanda tək qoyan Fransa belə mina təmizlənmə prosesində aktiv olmalıdır. Çünki mina hansısa dövlətin daxili problem deyil. Mina bəşəri problemdir. Danılmaz faktdır ki, dünyanın müxtəlif ölkələrində mina ilə çirkləndirilən ərazilər var. Həmin ərazilərin mina ilə çirkli qalması tək o ölkənin problemi deyil, bütün dünyanın dərdi olmalıdır. Biz minalanmış əraziləri təmizlədiyimizi zənn edərkən gözdən yayınan mina bir fransızı, ermənini və ya başqa birisini öldürə bilər. Bu səbəbdən də mina təmizlənməsi məsələsində bütün dünya bir olmalıdır. Xorvatiyanın məlum təşübbüsü digər Avropa ölkələri üçün də örnək olmalıdır".
Günel CƏLİLOVA
