Faiq Ələkbərli: "Bütün bu iddiaların kökündə Azərbaycanın varlığını sindirə bilməmək dayanır"
Molla rejimi son dövrlər Azərbaycan Xalq Cunmhuriyyətini, xüsusən də onun lideri Məhəmməd Əmin Rəsulzadəni hədəfə almaqda davam edir. Demək olar ki, Cumhuriyyəti ləkələmək, Rəsulzadənin işıqlı fəaliyyətini şübhə altına almaq üçün molla rejiminin Telegram kanallarındakı emissarları hərəkətə keçib və tez-tez tariximizə yad olan üzdəniraq məlumatlar paylaşırlar.
Tehran rejiminin əl buyruqçularının yaratdığı və tez-tez Azərbaycanın tarixi şəxsiyyətlərini, qədim və müasir tarixini qaralayan, təhrif edən telegram kanallarından biri "Azərbaycan tarixi" adı verdikləri Telegram kanalıdır ki, burada antiazərbaycan ruhu özünü hər addımda göstərir. Bu kanal yenə də Cumhuriyyəti hədəfə alıb və burada iddia edirlər ki, guya "Rəsulzadənin hakimiyyəti zamanında azərbaycanlılara neft buruqlarına 15 verst, yəni 16 km radiusdan yaxınlaşmaq qadağan idi. İngilislər buna icazə vermirdilər".
Ümumiyyətlə, bu cür iddiaların hardan qaynaqlandığı özü adama maraqlı gəlir. İndiyə qədər heç bir tədqiqatçı belə bir söz yazmayıb, amma mollalar heç bir mənbəyə əsaslanmadan bu cür iftiralar atırlar.
"Molla rejimi bu cür iftiralarla heç nə edə bilməyəcək, əksinə, öz quyusunu qazmış olacaq"
Məsələyə şərh verən AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli "Bakı-Xəbər"ə şərhində bildirdi ki, XX əsrin əvvəllərində Azərbaycanın quzeyində Cumhuriyyətin qurulması və onun müsəlman Şərqində ilk demokratik dövlət olması, bu gün də onun ənənələrinin yaşadılması, müstəqil Azərbaycan dövlətinin Azərbaycan Xalq Cumhuriyyətinin varisi kimi öz ərazi bütövlüyünü bərpa etməsi molla rejimini ciddi narahat edir. Bu səbəbdən də panfarsistlərin Cumhuriyyətin qurucusuna böhtanlar atdığını deyən F.Ələkbərli "İran adlanan ölkənin maraqlarına xidmət edən "Telegram" kanalındakı hansısa səhifənin və mətbuat orqanlarının bu kimi sərsəm açıqlamalar verməsi təəccüblü deyil. Molla rejimi sosial şəbəkə platformaları və media vasitəsilə daim öz qısqanclığını, Azərbaycan dövlətinin uğurlarını həzm edə bilmədiyini ortaya qoyur. Deyirlər ki, aşığın sözü qurtaranda "yarım-yarım çağırır". Tehran rejiminin də artıq danışmağa sözü qurtarıb deyə, hansısa uydurmaları ortaya atırlar. Mollaların Rəsulzadə dövrü ilə bağlı irəli sürdükləri iddialar həqiqətə uyğun deyil, bunu onlar özlərindən "icad" ediblər. Cumhuriyyət dönəmində hakimiyyət azərbaycanlıların öz əlində idi. Panfarsistlər indi iddia edirlər ki, guya Rəsulzadə dönəmində azərbaycanlılar neft buruqlarına yaxınlaşa bilmirdilər, bu çox gülünc və yanlış məlumatdır. Cumhuriyyət dövründə də neft buruqlarında işləyənlər elə əsasən azərbaycanlılar olub. Molla rejiminin emissarlarının iddiasının heç bir məntiqi yoxdur. Uydurmaların heç bir məntiqi ola bilməz"-deyə bildirdi.
F.Ələkbərlinin sözlərinə görə, 1918-ci ilin noyabrından sonra bir neçə ay burada ingilislər var idi. "Neft buruqlarında ingilislər, yaxud fransızlar işləmirdi. "Azərbaycanlılar neft buruqlarına yaxınlaşa bilmirdilər" fikri məntiqə uyğun gəlməyən iddiadır. Bu neft buruqlarında Cumhuriyyət vətəndaşları ilə yanaşı Güney Azərbaycandan gələn azərbaycanlılar da işləyirdilər. Azərbaycanın Güneyindən gələnlər də neft buruqlarında çalışıb. Əgər azərbaycanlılar olmasaydı neft buruqları necə işləyərdi? Bütün bu iddiaların kökündə Azərbaycanın varlığını sindirə bilməmək dayanır. Amma onlar nə edirlər etsinlər, nə cəfəngiyyatlar uydururlar uydursunlar, Azərbaycan Respublikası da, Güney Azərbaycan da var. Azərbaycanımız gələcəkdə bir olacaq. Molla rejimi bu cür iftiralarla heç nə edə bilməyəcək, əksinə, öz quyusunu qazmış olacaq" - deyə F.Ələkbərli qeyd etdi.
İradə SARIYEVA
