Rusiya və Ermənistan arasında diplomatik savaş davam edir və tərəflərin bir-birinə qarşı ittihamları daha da kəskinləşir. Xüsusən də indiki halda Ermənistanın Ukrayna siyasəti Rusiyada ciddi qıcıq yaradır.
Elə bu günlərdə Rusiya Xarici İşlər Nazirliyinin rəsmi nümayəndəsi Mariya Zaxarova qeyd edib ki, Ermənistan Təhlükəsizlik Şurasının katibi Armen Qriqoryanla Ukrayna Prezidenti Ofisinin rəhbəri Andrey Yermakın görüşü nümayişkaranə antirusiya addımıdır: "Əgər siz Maltada qondarma Kopenhagen formatında görüşdən danışırsınızsa, biz bunu rəsmi İrəvanın nümayişkaranə antirusiya jesti kimi qiymətləndiririk".
O xatırladıb ki, bundan əvvəl Ermənistanın Baş nazirinin arvadı Anna Akopyan Kiyevə gedib: "Ermənistan parlamentinin sədri Alen Simonyan Dublində Ukrayna Ali Radasının sədri Ruslan Stefançukla əlaqə saxlayıb. Ermənistanın baş naziri Paşinyan özü Qranadada Ukrayna prezidenti Vladimir Zelenski ilə danışıb. Məncə, İrəvanda ölkəmizə aqressiv şəkildə qarşı çıxanlarla nümayişkaranə flört etdiklərini bilməlidirlər. Təəssüflə qeyd etmək lazımdır ki, respublikanın indiki rəhbərliyi bir müddət əvvəl Ermənistanın sabitliyi və rifahının ən mühüm amili adlandırdığı müttəfiqlik münasibətlərimizi məqsədyönlü və israrla pozur". Zaxarova qeyd edib ki, Ermənistanın media resurslarına və onların antirusiya ritorikasına gəlincə, burada açıq rusofob kontekst var: "Oxuyuram, baxıram. Bunlar sadəcə təhqir deyil, ört-basdır edilməmiş rusofobiyadır. Bu resursların maliyyələşdirilməsinin arxasında kimin dayandığını bilirik. Əgər onlar hesab edirsə ki, biz bunların kimin tərəfindən maliyyələşdirildiyini bilmirik, səhv edirlər". Ermənistan parlamentinin sədri Alen Simonyanın bunlara cavabı gecikməyib: "Belə çıxır ki, hətta beynəlxalq platformalarda tərəfdaşlarla ünsiyyət Rusiya tərəfindən antirusiya jesti kimi dəyərləndirilir. Ermənistan heç kimlə ünsiyyət qurmamalı, başqa platformada iştirak etməməli, hətta heç kimlə salamlaşmamalıdır. Bunlar, deyəsən, "düzgün federal ideyalar"dır. Ermənistan həmişə onkoloji cəhətdən "müttəfiqdən asılı olmalıdır", Ermənistan həmişə qorxmalıdır. Qorxmalıdır ki, müttəfiq yoxdursa, öldürüləcək. Bu qorxu, bu qılınc həmişə erməninin başının üstündən asılmalıdır ki, müttəfiq olun. Maraqlıdır, məsələn, Ermənistanla aktiv müharibə vəziyyətində olan Azərbaycana milyardlarla dollar dəyərində silah satılması və Ermənistanla bağlanmış müqavilələr üzrə öhdəliklərin açıq-aşkar yerinə yetirilməməsi eyni məntiq deyil?". Baş verənləri şərh edən erməni analitik Tatul Akopyan vəziyyətin Ermənistan üçün daha qorxulu məcraya yönəldiyini bildirir: "Ermənistan-Rusiya münasibətlərində istər bugünkü kimi gərgin, istərsə də dostluq münasibətləri dövründə əsas problemlərdən biri Ermənistandadır, beynimizdə və ürəyimizdədir. Ermənistanın kollektiv siyasi fikri Rusiyanı daimi dost kimi qəbul edir. Rusiya öz maraqlarına əsaslanaraq Türkiyə ilə əməkdaşlıq edəndə və Azərbaycanı dəstəklədikdə biz çox məyus oluruq. İttihamlar başlayır: Rusiya bizə xəyanət etdi, Rusiya Türkiyə və Azərbaycanla çirkin sövdələşmə etdi, Rusiya bizim düşmənimizdir! Bəs kim dedi ki, Rusiya bizim əbədi dostumuzdur? Harada yazılıb ki, Rusiya gəlib bizi xilas edəcək? Niyə özümüzü inandırdıq ki, Ermənistan Rusiya üçün Türkiyə ilə Azərbaycan arasında paz kimi dəyərlidir və ruslar hər dəfə bu pazı sığallayacaqlar? İndi daxili müxalifət istisna olmaqla, hamıya aydındır ki, dəhliz məsələsində ən çox maraqlı olan Rusiyadır. Rusiyanı olduğu kimi başa düşmək və qəbul etmək lazımdır. Amma düşmənçilik etməyə də ehtiyac yoxdur, bu, Ermənistana yeni zərbələr almaqdan başqa heç nə vermir".
Ermənistanın "Qraparak" nəşri isə yazır ki, Rusiya İrəvanın addımlarını yaddan çıxarmır və öz anını gözləyir: "Hələ oktyabrın 3-də Ermənistan parlamenti, Rusiyanın təhdid və xəbərdarlıqlarına baxmayaraq, "Vətəndaş Müqaviləsi" fraksiyasının 60 lehinə səsi ilə Roma Statutunu ratifikasiya edib. Beynəlxalq Cinayət Məhkəməsi Rusiya prezidenti Vladimir Putin üçün axtarış elan edib və Roma Statutunu ratifikasiya etmiş hər bir ölkə Rusiya prezidenti bu ölkəyə gələrsə, onu həbs etməyə borcludur. Roma Statutu hələ qüvvəyə minməyib, lakin ratifikasiya edildikdən sonra Rusiya Federasiyası soydaşlarımıza qarşı sanksiyalar tətbiq edib, vergi yoxlamaları, deportasiya hədələri, erməni sürücülük vəsiqələrinin tanınması prosesinin gecikdirilməsi və sair kimi proseslər həyata keçirib. Rusiyanın demarşından sonra Ermənistan gərginləşən münasibətləri yumşaltmağa çalışır. İrəvan bildirib ki, Ermənistan tərəfi Rusiyanın narahatlığını aradan qaldıra biləcək müvafiq ikitərəfli sazişin bağlanması təklifi ilə çıxış edib. Ermənistan parlamenti sədrinin müavini Hakob Arşakyan da mötərizəni açaraq deyib ki, iki ölkəyə aid məsələlərdə beynəlxalq məhkəmənin qərarlarının tətbiqini istisna edən ikitərəfli sazişimiz ola bilər. Rusiya tərəfi hələ ki, Ermənistanın təklifinə cavab verməyib. Rəsmi dairələrdə cavab alacaqlarına ümid etmirlər, Rusiyada Roma Statutunun ratifikasiyasının həzm olunmayacağına, bağışlanmayacağına əmindirlər". Erməni politoloq Stepan Danielyan məsələ ilə bağlı qeyd edir: "Putinin Haaqa məhkəməsinə verilməməsi üçün ikitərəfli saziş bağlamaq təklifi Rusiyaya edilib. Bu absurddur, çünki Ermənistan Rusiya prezidentini həbs edə bilməz. Ermənistan Vladimir Putini həbs etsə, yerindəcə məhv olacaq. Ona görə də rusların və ya onların prezidentinin həbs olunmaması üçün Rusiya ilə belə bir müqavilə imzalamaq istədikləri barədə deyilənlər, sadəcə olaraq, real mövzudan yayınmadır. Problem ondadır ki, Rusiya Roma Statutunun ratifikasiyasını Putini həbs etməkdən qorxduqları üçün yox, Qərbin təsir dairəsinə daxil olmaq üçün atılan addım hesab etdiyindən anti-Rusiya addımı hesab edir".
Samirə SƏFƏROVA
