Azərbaycan bu dəfə 8 Noyabr Zəfər Gününü tamam başqa əhval-ruhiyyədə qeyd etməyə hazırlaşır. İlk dəfə bu gün bütün ərazimiz üzərində suverenliyimizin tam bərpa olunması şəraitində qeyd olunacaq. Bu, həm də ölkəmizin anti-Azərbaycan mövqedə olan qüvvələr üzərində qələbəsinin təzahürüdür.
Qeyd edək ki, prezident, Müzəffər Ali Baş Komandan İlham Əliyevin rəhbərliyi ilə Ermənistanın işğalı altında olan Azərbaycan torpaqlarını azad etmək üçün Azərbaycan Ordusunun sentyabrın 27-də Qarabağda başladığı genişmiqyaslı və uğurlu əks-hücum əməliyyatları nəticəsində noyabrın 9-dək 5 şəhər, 4 qəsəbə və 286 kənd işğaldan azad edildi. Bununla 30 illik erməni işğalına son qoyuldu. Məhz bu qələbə ilə də postsovet məkanında, hətta dünyada son illərdə ilk dəfə separatizm hərəkatı məhv edildi. Ali Baş Komandanın rəhbərliyi ilə hərbi əməliyyatlar çərçivəsində Azərbaycan Ordusu dünya hərb tarixinə düşən bir qələbəyə imza atdı. İşğalçı Ermənistanın 30 il ərzində qurduğu hərbi istehkamlar, ordu darmadağın edildi, milli birlik və döyüşçülərimizin igidliyi sayəsində böyük zəfər qazanıldı. Bu müharibənin, tətbiq olunan taktikaların dünya hərb tarixində analoqu yoxdur. Məhz Müzəffər Ali Baş Komandan İlham Əliyev qüdrətli sərkərdə kimi döyüş əməliyyatlarını elə apardı ki, ordumuz müharibənin hər günündə irəlilədi və yeni-yeni zəfərlərə imza atdı. Qarabağın tacı hesab olunan Şuşanın azad olunması tariximizə Zəfər Günü kimi yazıldı. İki gün sonra isə işğalçı Ermənistan təslimolma sənədinə imza atmağa məcbur oldu. Beləliklə, BMT Təhlükəsizlik Şurasının 27 il kağız üzərində qalmış qətnamələrini Azərbaycan özü icra etdi. Bu tarixi qələbədən sonra imzalanan üçtərəfli bəyanatdan sonra iddialar səslənirdi ki, qələbəmiz yarımçıq qalıb. Çünki Sərsəng, Ağdərə, Xocavənd, Xankəndi, Xocalı, Əsgəran hələ də düşmən tapdağında qalmışdı. Qərb dünyası, o cümlədən ABŞ, Avropa İttifaqı, Fransa kimi ölkələr 30 illik işğal dövründə olduğu kimi, bu mərhələdə də vəziyyətin qeyri-müəyyən qalmasında maraqlı tərəf idilər. Onlar ATƏT-in Minsk qrupunun reanimasiyası kimi riyakarlıqla dolu utancverici addım atmağa da cəhd etdilər. Fransa və ABŞ-ın Minsk qrupunun yenidən bərpası və reanimasiyası haqqında bəzi bəyanatlarla çıxış etməsi 30 illik danışıqlar prosesi çərçivəsində hansı missiyanı həyata keçirdiklərini bir daha göstərirdi. Bu dəfə isə əsas niyyətləri Azərbaycanın öz ərazisi üzərində tam suverenliyini bərpa etməsinə imkan verməmək, 2020-ci ilin nəticələri ilə məhdudlaşmağa məcbur etmək idi.
Amma yenə də məqsədlərinə çata bilmədilər. Bu ilin sentyabrında 23 saatlıq antiterror tədbirləri ilə 44 günlük müharibəyə yekun vuruldu. Bununla Azərbaycan pozulan hüquqlarını, ərazi bütövlüyünü, suverenliyini təmin etdi. Nəticədə ermənilərin işğalçılıq siyasətinə son qoyuldu. Azərbaycan bayrağı Sərsəng, Ağdərə, Xocavənd, Xankəndi, Xocalı, Əsgəranda ucaldıldı. Nəticədə Azərbaycan öz suverenliyini tam bərpa etdi. Rəşadətli ordumuz Qarabağda keçirilən lokal antiterror tədbirləri nəticəsində erməni hərbi birləşmələrini diz çökdürdü. Antiterror tədbirləri zamanı da Azərbaycan hərbçiləri həm yüksək peşəkarlıq, həm də yüksək mənəvi keyfiyyətlər nümayiş etdirdi. Ali Baş Komandan İlham Əliyevin tapşırığına uyğun olaraq Silahlı Qüvvələrimiz heç bir mülki şəxsə ziyan vurmadı, dinc sakinləri hədəf almadı, mülki obyektlərə atəş açmadı. Tapşırığı yüksək səviyyədə yerinə yetirərək yalnız hərbi infrastruktur sıradan çıxarıldı. 23 saatlıq antiterror tədbirləri nəticəsində Azərbaycanın bütün ərazilərində suverenlik tam bərpa edildi. Hazırda Qarabağ və Şərqi Zəngəzurda möhtəşəm quruculuq işləri həyata keçirilir. Bununla yanaşı, Azərbaycan Qarabağ ermənilərinin reinteqrasiya üçün müvafiq addımlar atır. bu məqsədlə portal yaradılıb, eləcə də sakinlər əyani olaraq Xankəndidə müvafiq dövlət qurumlarımızın əməkdaşlarına yaxınlaşaraq müraciət edə bilərlər. Əgər Ermənistan sülhə gələrsə, regionumuz bundan sonra təhlükəsizlik və əməkdaşlıq şəraitində yaşaya bilər. Amma görünür ki, rəsmi İrəvan və ona diqtə edənlər sülhdə maraqlı deyil.
Tahir TAĞIYEV
