Strabonun “Coğrafiya”sında "Arsax" adlı şey yoxdur - erməni uydurması...
Qasım Hacıyev: "Strabonun kitabında "Böyük Ermənistan" adı çəkilmir, heç antik mənbədə belə bir "dövlətdən" bəhs edilmir"
Ermənilərin əlləri hər şeydən üzüləndən sonra indi də keçiblər Strabonun, eləcə də Azərbaycan müəllifləri Mirzə Camal Cavanşir Qarabağinin və Mirzə Adıgözəl bəyin əsərlərini təhrif etməyə. "Arsax"la bağlı elə uydurmalar yazırlar ki, necə deyərlər, bişmiş toyuğun gülməyi gəlir.
Bu toplumun özlərini Qarabağın" yerli sakinləri" kimi qələmə verməsi onu göstərir ki, onlar qondarma tarix yaratmaqla özlərini bu bölgəyə peyvənd etmək istəyirlər. Halbuki, bu onların bizim torpaqlara gəlmə olduğunu ört-basdır edə bilmir.
Erməni mediası son vaxtlar dünyanın müxtəlif müəlliflərindən "sitatlar" gətirib özlərinə təsəlli verir.
Azərbaycana qarşı qondarma ittihamlar irəli sürən erməni mediası ermənilərin Qarabağda "yerli əhali" olduğunu və guya bunu da "minlərlə tarixi abidə - kilsələr, məbədlər, monastırlar, yerli əhalinin çoxəsrlik təsərrüfat quruluşu, arxeoloji qazıntıların artefaktları, tarixi faktlar və müasir və qədim dövrlərin elmi əsərləri sübut edir" iddiasından əl çəkmirlər. Guya alimlər, o cümlədən qədim tarixçi və coğrafiyaşünas Strabon məşhur "Coğrafiya" əsərində "Böyük Ermənistan"ın tərkibində olan "Arsax" "haqqında məlumat verir" . Guya Strabonun dövründə orada əhali erməni olub. Bu azmış kimi, iddia edirlər ki, guya "bu fakt" Azərbaycan SSR EA Tarix İnstitutu tərəfindən Azərbaycan tarixinə dair qiymətli ilk mənbələrdən biri kimi səciyyələndirilən Qarabağlı Mirzə Camal Cavanşirin "Qarabağ tarixi" əlyazmasında birbaşa göstərilib. Guya XVIII-XIX əsrlərdə "digər türk və fars müəllifləri də köçəri türk tayfalarının İrandan "Artsax" ərazisinin bir hissəsinə gəlib yerləşdiyini" yazıb. Belə absurd fikirlər irəli sürən ermənilər hətta iddia edirlər ki, Qarabağ məlikləri "erməni olub", bunu onların çara yazdıqları məktublar da "sübut edir". Bundan başqa, Qarabağın alban irsinin varisinin udilər olması faktına da ermənilər qısqanclıqla yanaşır və tamamilə çirkin yanaşma sərgiləyirlər. Bütün bunlar azmış kimi, yenə də "Girdiman, Şirvan və Naxçıvan" sayıqlayır. "Tarixi mənbələrdən" sitat gətirib o ki var saxtakarlıq edirlər. Son zamanlar bu məsələdə "Ermənistanın səsi" daha çox canfəşanlıq edir, rəngləri daha da tündləşdirib saxta erməni iddialarına haqq qazandırmağa çalışır.
"Ermənilər utanmadan hələ də bu çirkin ənənəni davam etdirirlər"
AMEA-nın Qafqazşünslıq institutunun Qafqaz tarixi şöbəsinin müdiri, professor Qasım Hacıyev "Bakı-Xəbər"ə şərhində bildirdi ki, ermənilər get-gedə tarixi daha da saxtalaşdırırlar. "Ermənilər utanmadan hələ də bu çirkin ənənəni davam etdirirlər. 30-40 ildir ki, ermənilərin yazdıqları cəfəngiyyatları tənqid edirəm, faktlar əsasında cavablarını verirəm. Eləcə də başqa tarixçilərimiz onlara layiqli cavablar verir. Vaxtilə akademik İqrar Əliyev ermənilərin Strabondan "nümunə gətirdikləri" iddianı sərt tənqid edib onların yalanını ifşa etmişdi. Yenə də nəticə çıxarmadılar. Buna baxmayaraq, yenə də saxtakarlıqdan qalmırlar. Azərbaycan tarixçiləri onların yazdıqlarının yalan olduğunu hansı faktlarla, hansı mənbələrlə ifşa edirlərsə, onlar da həmin mənbəni saxtalaşdırmağa, təhrif etməyə başlayırlar. Onların bura gəlmə olduqlarını, yerli alban əhalinin bütün abidələrini, irsini mənimsəmədiklərini, eyni zamanda bizim abidələrə qarşı amansız davrandıqları, irsimizi məhv etdikləri kimi məsələləri çox qabartmışıq, gerçəyi demişik. İndi də onlar "yuxudan ayılıb" öz aləmlərində bizə cavab verirlər. Onlar o qədər saxtalaşdırmaya uyurlar ki, bizim onlara qarşı yazdıqlarımızı indi bizə qarşı yönəltmək istəyirlər. O ki qaldı Strabondan "misal çəkib" "Arsax"ın qədim "erməni torpağı" olmasına və onun "Böyük Ermənistan" "ərazisi"nə" daxil olması" barədə iddialara, bu başdan-ayağa saxta bir məsələdir. Əvvəla, Strabonun kitabında "Böyük Ermənistan" adı çəkilmir, heç antik mənbədə belə bir "dövlətdən" bəhs edilmir. Ermənilərdən və bəzi rus tarixçilərindən başqa heç kim onu yazmır. İkincisi, ermənilərin burada hər hansı bir izini sübut etmək üçün Qafqaz Albaniyasının mövcud olmadığı barədə uydurmalar yazırlar, onun yerində "Böyük Ermənistan" "yerləşdirirlər". Ermənilər 20-yə qədər antik mənbənin, yəni yunan, Roma mənbələrinin heç birindən öz xeyirlərinə bir kəlmə də olsa fikir tapa bilmirlər. Yalnız Strabondan yapışırlar, çünki Strabonun "Coğrafiya" kitabında var ki, Qafqaz Albaniyası Kür - Araz çaylarının arasında və Kürün hər iki sahilində yerləşirdi. Kür Albanoyanın ortasından, mərkəzindən axırdı. Bütün bunların hamısını özlərinin xeyrinə dəyişərək yazırlar ki, guya Azərbaycan Kürdən şimalda və Arazdan cənubda olub. Orta hissə isə guya ermənilərin olub. Ərsakı da "Arsax" edib özlərinə "qədim dövlət" düzəldiblər. Ermənilər bu məsələdə ciddi spekulyasiya edirlər, ortada elmi fikir yoxdur, hamısı cəfəngiyatdır. Fikirlərini "sübit etmək" üçün yalan danışırlar. Ermənilərin iddia etdikləri nə Strabonda, nə Mirzə Camal Cavanşir Qarabağinin əsərində var"-deyə Q. Hacıyev bildirdi.
Q. Hacıyevin sözlərinə görə, Bakıxanov da, Mircə Camal da, Mirzə Adıgözəl bəy də çar məmurları idilər və bu səbəbdən də faktların çoxunu yaza bilmirdilər, amma o demək deyil ki, onlar azərbaycanlıların əleyhinə nəsə yazıblar, xeyr, elə deyil. "Onlar necə yaza bilərdilər ki, azərbaycanlılar "gəlmədir"? Belə bir şey yoxdur. Hamı bilir ki, ermənilər Qarabağa gəlmədilər. Bütün saxtakarlığın başında ermənilər durur. Qarabağ məlikləri ilə bağlı saxtakarlıqlar ermənilər tərəfindən yazılıb. Ermənilər Azərbaycan müəlliflərinin qədim əlyazmalarını saxtalaşdırıblar. Hətta mən bunları arxiv sənədləri arasında görmüşəm. Mirzə Camalın yazdıqlarına, əlyazmalarına da nə vaxta ermənilər tərəfindən "düzəlişlər" ediblər. Bütün bunlar məlumdur. İndi isə onlardan "sitat" gətirib yalanlarını "sübut" etməyə çalışırlar. Bunlar o qədər saxtakardılar ki, cənab Prezidentin tariximizlə bağlı fikirlərini də təhrif edirlər, guya o deyib ki, biz "Arsax" üzərində qələbə çalmışıq. Görün, bu erməni yazarları necə ləyaqətsiz, necə yalançıdırlarsa, cənab prezidentin adından da yalan uydururlar. Halbuki, İlham Əliyevin çıxışları həm Azərbaycan, həm də xarici dillərdə yayılır. Ermənilər də onun nə dediyini yaxşı bilirlər, amma di gəl, təhrif edirlər. İlham Əliyev deyir ki, biz ərazilərimizdə separatçılıq edən, separatizm törədən qanunsuz xuntanı məhv etdik. Xunta rejiminin qanunsuz fəaliyyətinə son qoyuldu. Bu gün erməni mediasının nə yazmasından asılı olmayaraq, biz öz yolumuzdayıq. Ermənilər yalanlarla, miflərlə özlərini aldadırlar. Bu qədər yalan danışmaq və yalan yazmaq olmaz"-deyə Q. Hacıyev əlavə etdi.
Ərsakın Azərbaycan ərazi olduğunu deyən və bunun tarixi mənbələrdə əks olunduğunu vurğulayan Q. Hacıyev hesab edir ki, erməni müəlliflər yalanlar yazmaqla daxili auditoriyanı və bəzi xarici qüvvələri əllərində saxlamaq istəyir. O vurğuladı ki, xaricdəki erməni diasporu və erməni Qriqoryan kilsəsi medianı dayanmağa qoymur və onlar mümkün qədər saxta məlumatlar yaymağa məcbur edilir.
İradə SARIYEVA
