“İslamofobiya Cənubi Asiya ölkələrində artmaqdadır”. Trend-in məlumatına görə, bu barədə Müsəlman İnstitutu Düşüncə Mərkəzinin sədri Sultan Əhməd Sahibzadə "İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar" mövzusunda Bakıda keçirilən beynəlxalq konfransda panel iclasında çıxışı zamanı deyib.
O qeyd edib ki, islamofobiya, xüsusilə Hindistanda geniş vüsət alıb:“Bu milliyətçilik, irqçilik ritorikası ilə dəstəklənir. Hindistanda müsəlmanlara qarşı siyasət yürüdülür”.
Xatırladaq ki, martın 15-16-da Bakı Beynəlxalq Multikulturalizm Mərkəzi (BBMM), Beynəlxalq Münasibətlərin Təhlili Mərkəzi (BMTM) və G20 Dinlərarası Dialoq Forumu İslamofobiya ilə Beynəlxalq Mübarizə Gününə həsr olunan “İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar” mövzusunda beynəlxalq konfrans keçirir.
Diqqət çəkən məqamlardan biri odur ki, islamofobiya əsasən Ermənistanla yaxın dostluq, müttəfiqlik edən ölkələrdə geniş yayılıb. Məsələn, Fransada və Hindistanda islamofobiyanın açıq təzahürləri özünü ifadə edir. Necə ki, Ermənistanda islamofobiya hökm sürür, eləcə də həmin ölkələrdə bu hallar var. Ermənistanın can bir qəlbdə olduğu İranda türkfobiya, Fransada isə həm türkfobiya, həm də islamofobiya var.
“Ermənistanda, Fransada, Hindistanda illərdir davam edən güclü islamofobiya siyasətinə dünya susqun qalmamalıdır”
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, Hindistanda islamofobiyanın geniş yayılması təsadüfi deyil. Ermənilərlə hindlilərin genetik bağlılığının olduğunu deyən Q.Hacıyev qeyd etdi ki, dünyadakı bütün dinlərin məqsədi humanizm olsa da, sonradan insanlar onlardan sui-istifadə ediblər. İslam dininin dünyanın ən mütərəqqi dini olduğunu deyən Q.Hacıyev hesab edir ki, ermənilər də, hindistanlılar da, fransızlar da bir-birinin sözünü deyir, çünki əməlləri və niyyətləri birdir. “Çox təəssüflər olsun ki, islamofobiya bəzi dövlətlərin siyasətinə çevrilib. Ermənistanda, Fransada, Hindistanda illərdir davam edən güclü islaofobiya siyasətinə dünya susqun qalmamalıdır. Düzdür, bu dalğa həmin ölkələrin özlərinin ziyanına işləyəcək, amma qarşısı alınsa daha yaxşı nəticə əldə etmək olar. Ermənistan 30 ildən artıqdır ki, islam düşmənçiliyini büruzə verir, islam dini abidələrinə qarşı etdiyi vandalizm, təhqir hərəkətləri, məscidlərimizdə törətdikləri buna əyani misaldır. Fransada ksenofobiya, milli, irqi ayrı-seçkilik çoxdan özünü ifadə edir. Hindistanda da zaman-zaman müsəlmanlara qarşı aqressiya nümayiş etdirib. İslamofobiya o ölkələrdə geniş yayılıb ki, onların daxilində ciddi probemlər var, o problemləri ört-basdır etmək üçün islam düşmənçiliyini gündəmə gətirirlər ki, fikir daxildən yayınsın. Təsəvvür edin ki, Fransanın, Hindistanın, Ermənistanın daxilində nə qədər problem var, onlar vətəndaşların diqqətini bu problemlərdən kənara çəkirlər”.
Q.Hacıyev qeyd etdi ki, Ermənistanın yürütdüyü islamofobiya siyasətindən başqa dövlətlər də zəhərlənir. Separatizm və terrorizmlə məşğul olan Ermənistanın bu gün tərəfdarlarının, dostlarının da islamofobiya yolunu tutması diqqətdən qaçmır. “Bu baxımdan, Ermənistanın dostu olan ölkələrdə islamofobiyanın tüğyan etməsi təsadüfi deyil. Çünki onlar da humnanizmdən çox uzaqdırlar və milli, irqi, dini ayrı-seçkilik etməklə öz mahiyyətlərini ortaya qoyurlar. Bu gün Avropa ölkələrinə, Fransaya baxın, bunların müsəlman ölkələrinə qarşı irticaçı siyasəti yenə də davam edir. İslamofobiyanın kökü də bundan qanaqlanır və bu həmin ölkələrin pis niyyətinin göstəricisidir. Ermənistanın dostları da özü kimi islamofob, islam düşməni və qeyri-humanist olacaq, başqa cür ola bilməz. Bu o dövlətlərdir ki, Ermənistanın müsəlman məscidlərinə donuz bağlamasını alqışlayıblar... Halbuki, buna görə Ermənistan qınanmalı idi”-deyə Q.Hacıyev əlavə etdi.
İradə SARIYEVA
