“Fransada məktəblərdə hicaba qarşı qadağa patriarxal bir qərardır. Bu qərar yalnız həmin şəxsin seçimindən asılı olmalıdır. Bu, qadınlara qarşı çox aqressiv yanaşmadır”. Bu sözləri professor Sahar Aziz "İslamofobiya irqçiliyin və ayrıseçkiliyin spesifik forması kimi: Yeni qlobal və transmilli çağırışlar” mövzusunda keçirilən beynəlxalq konfrans çərçivəsində “Fransada islamofobiya” adlı aralıq sessiyada deyib.
Onun sözlərinə görə, ABŞ-da belə fikirlər var ki, müsəlman azlıqlar şəriət cəmiyyəti qurmaq istəyirlər. Amma müsəlman əhalisi çoxluq təşkil edən ölkələrdə belə şəriət cəmiyyəti yoxdur: “Fransada müsəlman cəmiyyəti müəyyən siyasi müsəlman qrupları ilə fikirlərinin üst-üstə düşməməsindən əziyyət çəkir. Bunun özü də olduqca qüsurlu faktdır".
Qeyd edək ki, Fransa məktəblərində uzun illərdir hicab qadağası tətbiq edilir. Bu da həmin ölkədə yaşayan müsəlmanların hüququnun pozulmasına səbəb olur.
“Avropada, xüsusilə də Fransada müsəlmanlara qarşı qadağalar artır, dini məktəblər bağlanır, hicab qadağası genişlənir, bu isə…”
“Vəfa” Sosial İctimai Birliyinin sədri Fatimə Hacıbəyli qeyd etdi ki, Fransa rəhbərliyi neçə ildir İslama qarşı qeyri-adekvat fikir bildirir, münasibət sərgiləyir: “Fransa dünya mədəniyyətinə və ədəbiyyatına böyük töhfə vermis ölkədir. Bu gün Fransa İslam dünyası ilə sıx bağlıdır. Məlumdur ki, Fransanın nüfuzlu İslam ölkələri ilə münasibətləri var. Həmçinin, Fransa əhalisinin müəyyən bir hissəsi müsəlman kökənlidir. Belə olduğu halda, Fransanın dünyanın aparıcı dinlərindən olan İslama qarşı sərt münasibət sərgiləməsi qəbuledilməzdir. Makronun Fransada hicab qadağası ilə bağlı dəfələrlə səsləndirdiyi fikirlər elə həmin ölkədə narazılığa səbəb olub. Fransa cəmiyyəti belə bu qadağanı qəbul etmir”.
Birlik sədrinin sözlərinə görə, Avropada, xüsusilə də Fransada müsəlmanlara qarşı qadağalar artır, dini məktəblər bağlanır, dərnəklər ləğv edilir. Həmçinin, bu ölkədə məscid tikintisinə icazə verilmir, imamlar məscidlərdən qovulur, hicab qadağası genişlənir, ifadə azadlığı adı altında müsəlmanların müqəddəs saydıqları inanclar təhqir edilir.
F.Hacıbəylinin sözlərinə görə, hicabın yasaqlanması müsəlmanlar tərəfindən qəbul olunacaq bir şey deyil: “Bu məsələnin kökündə yalnız bir səbəb yatır - Avropada İslamın güclənməsindən qorxurlar. Fransa dindar olmaması və ateistlərin çoxluğu ilə tanınsa da, bu gün müsəlmanların ən çox yaşadığı ölkədir. Bu addımların səbəbi Fransada antiislam təbliğatı aparmaqdır. Xristianlıqda rahibələrin geyimi hicaba yaxındır. Əvvəlcə rahibələrin geyimi dəyişdirilməlidir. Başqa dinlərdə də bu məsələ var. Əgər hər hansı qərar qəbul olunursa, bu, bütün insanlara şamil olunmalıdır. Şamil olunmursa, bu məsələnin arxasında başqa faktorlar dayanır. Bu da ikili standartların və insan haqlarına hörmətsizliyin bariz nümunəsidir”.
Günel CƏLİLOVA
