Azərbaycan və Ermənistanın sərhədlərin delimitasiyası və təhlükəsizliyi ilə bağlı komissiyalarının iclasının gələn həftə Moskvada keçirilməsi planlaşdırılır.
Bu barədə Ermənistan XİN başçısı Ararat Mirzoyan deyib: “Sizi məlumatlandırmaq istərdim ki, azərbaycanlı həmkarımla delimitasiya və sərhəd təhlükəsizliyi komissiyasının yaradılması mövzusunda danışmışıq. Və deyəsən, Aleksey Overçukla (Rusiya Baş nazirinin müavini) kommunikasiyalarla bağlı 16-17 mayda Moskvada görüş keçiriləcəyinə dair razılıq var. Həmçinin, Moskvada həmin günlərdə delimitasiya və sərhəd təhlükəsizliyi ilə bağlı ikitərəfli görüşün keçirilməsi təşkil olunacaq”.
Bəllidir ki, ötən ay Brüsseldə Avropa İttifaqının vasitəçiliyi ilə sərhədlərin dəqiqləşmədi ilə bağlı tərəflər arasında razılıq olmuşdu. Bu məzmunda görüşün Moskvada keçirilməsi Avropa Birliyini prosesdən bir qədər kənarlaşdırmaq anlamına gələ bilər. Sərhədlə bağlı komissiyanın Moskva iclasında Avropa Birliyinin iştirakını təmin etmək mümkündürmü?
Politoloq Yeganə Hacıyeva “Bakı-Xəbər”ə açıqlamasında bildirdi ki, üçtərəfli razılaşmanın əsas bəndindən biri də demarkasiya və delimitasiya məsələsidir: “Bunun üçün, hətta üçtərəfli komissiya da formalaşmışdı. Həmin komissiya hələ 2021-ci ilin may ayından başlayaraq işlərə start verməliydi. Ancaq bu proses hələ də yerindən tərpənməyib. Ardınca bir neçə dəfə Ermənistanın sərhədlərimizdə təxribatlarının şahidi olduq. Yəni üçtərəfli razılaşmanın sərhədlərin dəqiqləşməsi ilə bağlı hissəsini Ermənistan daim sabotaj edib. Ən əsası, heç Rusiyanın özü də Ermənistanı bu prosesə sövq etdirməkdə maraqlı olmayıb. Amma reallıq budur ki, Rusiya bu məsələdə Ermənistanın qarantıdır. Onu da qeyd edim ki, Moskva və Brüsseldə keçirilən hər bir görüşdə tərəflər bu məsələnin həyata keçməsi üçün ümumi razılığa gəliblər. Razılaşmanın da məğzi budur ki, mövcud xəritələrin əsasında hər tərəf öz funksiyasını yerinə yetirməyə start verməlidir. Reallıq isə budur ki, nə Moskva, nə də ki, Brüssel bu istiqamətdə hansısa əməli addım atıb. Ermənistan hər iki tərəfin vasitəçiliyi ilə əldə olunan raIlaşmaları pozmasını özünün müstəqil davranışı kimi qələmə verməyə çalışır. Ancaq biz bilirik ki, Ermənistan bir for-post ölkə olaraq bütün addımlarını Lavrovun tövsiyə və tezisləri əsasında atır. Avropa Birliyinin münaqişə dövründə belə prosesə birbaşa təsir mexanizmləri yox idi. Post-müharibə dönəmində isə bunun mümkünlüyü inandırıcı deyil. Amma təşəbbüs göstərir. Bunlar da sözdən o tərəfə getmir. Rusiya istəyir ki, başı Ukraynaya qarışdığı dönəmdə burada sülh olsun, ancaq proseslərdə irəliləyiş olmasın. Rusiya Avropa Birliyini öz təsir zonasına daxil etmək istəmir. İstənilən halda, Rusiya həm AB, həm də ABŞ-dan öndədir. Çünki həmin ölkə həm də üçtərəfli razılaşmaya imza atan tərəflərdən biridir”.
Məhəmmədəli QƏRİBLİ
