Azərbaycan-Türkiyə Media Koordinasiya Komitəsi - analoqu olmayan ikitərəfli münasibətlər yeni məzmun alır...

img

“Türk Şurası çərçivəsində media sahəsində əməkdaşlığın daha da sistemləşdirilməsinin tərəfdarıyıq. Bu günə kimi yaxşı təşəbbüslər olub. Lakin gəldiyimiz qənaətlərdən biri odur ki, təşkilat çərçivəsində Media Koordinasiya Komitəsi yaradılmalıdır. Necə ki, digər sahələrdə müvafiq komitələr çərçivəsində davamlı iş aparılır, bu istiqamətdə də addımlar atılmalıdır”.

Bu fikirləri Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev jurnalistlərə açıqlamasında deyib.

O qeyd edib ki, ölkələrin özəl media resurslarının da əməkdaşlığa cəlb olunmasına ehtiyac var: “Belə olarsa, məlumatların geniş şəkildə işıqlandırılması mümkün olar. Media forum konsepsiyası barədə də düşünülür. Ölkələr arasında biznes forumlar keçirildiyi təqdirdə, media sahəsində də birbaşa əlaqələr qurulmalıdır. Bu gün informasiya agentlikləri əksər halda ilkin mənbədən olmayan məlumatlara istinad edirlər. Ona görə də media agentlikləri arasında əlaqələrin qurulması vacibdir. Bunun nəticəsində də ölkələrin həqiqətləri barədə dəqiq və səlis məlumatlar yayılar”.

  • Şakir Ağayev: “Türk Şurası çərçivəsində Media Koordinasiya Komitəsinin yaradılması təşəbbüsü təqdirəlayiqdir və çox səmərəli, faydalı olacaq”

“Novoye vremya” qəzetinin baş redaktoru Şakir Ağayev bizimlə söhbətində bildirdi ki, ümumiyyətlə, qardaş ölkələrlə media platformasında əməkdaşlıqların daha da genişləndirilməsi bir təbii zərurətə çevrilib, bu baxımdan, təklif edilən hər bir yeni ideyanın tezliklə gerçəkləşdirilməsinə çalışmalıyıq. “Bilirsiniz ki, Bakıda Türkdilli Dövlətlərin Əməkdaşlıq Şurasının (Türk Şurası) informasiya və media üzrə məsul nazirlərinin və yüksək vəzifəli rəsmilərinin üçüncü toplantısı keçirilib. Qardaş ölkələrin mətbuata məsul şəxsləri Bakıya gəldilər. Təbii ki, burada Hikmət Hacıyevin böyük rolu var. Çünki keçən il Hikmət Hacıyev Türkiyəyə getmişdi və səfər çərçivəsində Azərbaycanla Türkiyə arasında media sahəsində əməkdaşlığın daha da gücləndirilməsi ən yüksək formada təsdiqləndi. Azərbaycan türkdilli ölkələr arasında media sahəsində əməkdaşlığın daha da gücləndirilməsi üçün bütün səylərini ortaya qoyaraq addımlar atıb. Türk Şurasının Bakıda keçirilən bu tədbiri də media sahəsində əməkdaşlığımızın daha geniş müstəviyə keçdiyini deməyə əsas verir. Türk Şurası çərçivəsində Media Koordinasiya Komitəsinin yaradılması təşəbbüsü təqdirəlayiqdir və çox səmərəli, faydalı olacaq. Məhz qardaş ölkələrin mediasında Azərbaycan həqiqətlərinin yayılması, dünyaya çatdırılması çox vacibdir.

Əlbəttə, Türkiyə 44 günlük müharibədə də, ondan əvvəl və sonra da bütün müstəvilərdə bizə dəstək verib və bu gün də dəstəyini davam etdirir. Amma çox təəssüflər olsun ki, biz bu cür dəstəyə və müdafiəyə digər türkdilli ölkələrin mətbuatında rast gəlmədik, istər Qırğızıstan, istər Türkmənistan, istər Özbəkistan, istərsə də Türkmənistan olsun, görmədik. Azərbaycan dövləti türkdilli ölkələrin media sahəsində əməkdaşlığının koordinasiya olunmuş şəkildə inkişaf etməsi üçün Media Koordinasiya Komitəsi yaradılması təklifini, təşəbbüsünü irəli sürür”.

Ş.Ağayev hesab edir ki, təbii, türkdilli dövlətlər bir-birinin haqlı, ədalətli işini müdafiə etməlidirlər, çünki o ölkələrin dəstəyinə ciddi ehtiyac var.

Qazaxıstanın böyük ölkə olduğunu və bu ölkənin mətbuatında çıxan yazıları, ilk növbədə, Rusiya, Avropa dövlətləri, Amerikanın da izlədiyini deyən Ş.Ağayev hesab edir ki, hər türkdilli ölkənin öz mövqeyi, öz beynəlxalq auditoriyası var. “Həmçinin, Qırğızıstanın, Özbəkistanın, Türkmənistanın da öz auditoriyası var. Əlbəttə, Türk Şurası çərçivəsində Media Koordinasiya Komitəsi yaradılarsa, bu, həmin dövlətlər arasında əlaqələndirmənin daha əhatəli şəkildə həyata keçirilməsinə, birliyimizin daha da möhkəmlənməsinə şərait yaradar, Türk dünyası ilə bağlı məlumatların doğru-dürüst şəkildə beynəlxalq ictimaiyyətə çatdırılmasında mühüm rol oynayar”.

Ş.Ağayev hesab edir ki, mətbuat müstəvisində əlaqələr türkdilli ölkələrlə yanaşı, başqa ölkələrlə də qurulmalıdır. Ekspertin sözlərinə görə, onsuz da illərdir informasiya müharibəsi gedir və get-gedə daha ciddi xarakter alır, bu baxımdan media, informasiya sahəsində əməkdaşlıqların daha da artırılması zərurətə çevrilib. “Rusiya, MDB ölkələri ilə də bu müstəvidə bir forum, təşkilat yaradılmalıdır” deyən Ş.Ağayevin fikrincə, Rusiya mediası ilə belə əməkdaşlıqlar qurulmalıdır ki, orada Azərbaycan əleyhinə çıxan yazıların qarşısı alınsın və Azərbaycan həqiqətləri bu ölkənin mediasında yayılsın. Bu çox vacib məsələdir.  Bunu Avropa və Xəzəryanı dövlətlərlə də etməyin mümkün olduğunu deyən Ş.Ağayev deyir ki, dövlətimiz bu sahədə əlaqələrin genişləndirilməsinə mühüm töhfələrini verir və yerli media da bu istiqamətdə dəstəyini davam etdirməlidir. 

  • Müşfiq Ələsgərli: “Əməkdaşlıq Şurası özü işlək bir mexanizmdir və onun bir qolu kimi də Media Koordinasiya Komitəsinin yaradılması...”

Azərbaycan Mətbuat Şurasının sədr müavini, tanınmış media eksperti Müşfiq Ələsgərli bizimlə söhbətində bunları dedi: “İlk olaraq Türkiyə-Azərbaycan media qurumlarının bir əməkdaşlıq platformasının yaradılması modeli götürülüb. Növbəti mərhələlərdə, ümumilikdə, türkdilli dövlətlərin media qurumlarının bu platformada cəmləşdirilməsi. Onların bu platforma ətrafında koordinasiya olması üçün uzun müddətdir təkliflər olub və bu təkliflərin tarixi bəzən yüzillərə gedib dayanır. Amma 1991-ci ildə Azərbaycan dövlət müstəqilliyi əldə etdikdən və ölkəmizdə media tənzimləyici qurumlar yaranandan sonra bu sahədə müəyyən addımların atılması üçün real təkliflər, real addımlar olub. Yəni bu ideyanı real mexanizmə çevirməkdən ötrü çoxsaylı addım atılıb. Düzdür, o addımların əksəriyyəti uğurlu olmayıb. Bu mənada ki, nəticə əldə etmək bir az çətin olub, tədbirlər keçirilib, toplantılar olub, amma bunu davam etdirmək üçün konkret və işlək bir mexanizmə gətirmək mümkün olmayıb. Səbəb də ondan ibarət idi ki, ideyanı hamı dəstəkləsə də, o ideyanın konkret icra mexanizminin hazırlanması üçün problemlər olmuşdu və konkret icra mexanizmi ortalığa qoyulmamışdı. Müəyyən forumlar keçirilirdi və sair. Son vaxtlar atılan addımlar önəmlidir. Türkdilli xalqların mediasının vahid bir platforma ətrafında bir araya gətirilməsi, koordinasiya edilməsi istiqamətindəki təşəbbüslər çox əhəmiyyətlidir. Hazırda bu ideyanı gerçəkləşdirən, işlək vəziyyətə gətirən konkret mexanizmlər təklif olunur. Bu təkliflərdən biri də Türkdilli Ölkələrin Əməkdaşlıq Şurasının tərkibində müəyyən mexanizmlərin yaradılmasıdır. Prinsip etibarilə alqışlanası və daha çox praqmatik bir təklifdir. Çünki Türkdilli Dövlətlərin Əməkdaşlıq Şurası özü işlək bir mexanizmdir və onun bir qolu kimi də Media Koordinasiya Komitəsinin yaradılması çox rasional görünür, hesab edirəm ki, bu, nəticələr verəcək. Bu baxımdan, Hikmət müəllimin səsləndirdiyi fikirləri alqışlayıram və daha çox rasional hesab edirəm. Çünki, dediyim kimi, ən azı 100 ilə yaxın tarixi olan və keçən əsrin 90-cı illərindən sonra daha çox üzərinə təkidlə gedilən bir ideyanın konkret mexanizmi təklif edilir ki, bax, bu ideya bu mexanizm üzərində qurula, işlək hala gətirilə bilər. Qaldı ki, məsələnin ikinci tərəfinə, bu platformanın yaradılması çox zəruridir. Əvvəllər ideya formasında olanda deyirdilər ki, biz kökü bir olan xalqlarıq, mənəvi, mədəni yaxınlığı olan xalqlarıq, vahid media platformalarının yaradılması bu xalqların köklərinin yenidən bərpa olunmasına imkan verə bilər. Amma bu gün bu məsələ daha çox irəli gedir və daha çox zərurət kəsb edən bir ideyaya çevrilir. Nəyə görə? Sirr deyil ki, bizim regionumuz,  xüsusi olaraq türk-müsəlman dövlətləri çox ciddi şəkildə disskriminasiyaya məruz qalırlar. Bu disskriminasiyanın da böyük hissəsi beynəlxalq media platformaları üzərindən həyata keçirilir. Bu baxımdan, bizim gücümüzü birləşdirməyimiz, dərd-sərimizi bir-birimizin potensialından istifadə edərək dünyaya çıxarmağımız üçün vahid platformalara ehtiyacımız var. İndi ki, türkdilli dövlətlər regionda bir güc mərkəzinə çevrilir və əməkdaşlıq, güc formatında birləşirlər, bu baxımdan media platformasının da aktivləşdirilməsi və gerçəkləşdirilməsi günün zəruri məsələlərindən birinə çevrilib. Uğurlu olsun. Hesab edirəm ki, bu işlək mexanizmlərin hazırlanması bu platformanın nəhayət ki, gerçək şəkildə gündəmdə olmasını təşkil etmiş olacaq”.

İradə SARIYEVA

Son xəbərlər