Rüstəm Muradovun Xankəndidə siyasiləşmiş biznesmenlər Balayanlarla əlaqələri barədə şübhəli müzakirələr…

İlqar Vəlizadə: “Həmin görüşdə tamamilə başqa detallar müzakirə olunubsa, onda bu, Rüstəm Muradovun səlahiyyətlərini aşması anlamına gələ bilər”

img

Qarabağda sülhməramlı missiyaya rəhbərlik edən general Rüstəm Muradovun Xankəndidəki bəzi şübhəli davranışları narazılıqla qarşılanıb. Hiss edilir ki, Ermənistanda Köçəryanın timsalında revanşistlərə dəstək verən Rusiya eyni xətti Qarabağda da davam etdirmək niyyətindədir.

Sülhməramlıların komandanı Rüstəm Muradovun Xankəndidə görüşdüyü ermənilərin kimliyi bunu iddia etməyə əsas verir. Bakı səfərindən sonra Rüstəm Muradov Xankəndidə iki biznesmen - bank sahibi Artak Balayan və milyonçu Armen Balayanla nahar edib. Armen Balayan Robert Köçəryana yaxınlığı ilə tanınır. Bu naharın Putin-Köçəryan görüşündən sonra olması xüsusilə diqqət çəkir. Belə çıxır ki,  Rusiya İrəvanda Köçəryan, Xankəndidə isə Balasanyan komandasını gücləndirir. İddia olunur ki,  növbədənkənar parlament seçkilərində iştirak edəcəyini açıqlayan Rusiya Ermənilər Birliyinin rəhbəri (REB), milyonçu Ara Abramyanın əsas missiyasından biri də seçkidə rus cəbhəsinin maliyyəsini təmin etmək olacaq. Xankəndidə də Muradov pullu erməniləri Balasanyan komandasının maliyyələşməsinə cəlb edir. Qeyd edilir ki, Rusiya Qarabağa qaytardığı ermənilərin orada yaşaması üçün lazım olan maliyyə vəsaitini erməni biznesmenlərin üzərinə qoyur.

Maraqlıdır, Rüstəm Muradov niyə öz sülhməramlı missiyası ilə deyil, siyasətlə məşğul olmağa cəhd edir?

Politoloq Ilqar Vəlizadə “Bakı-Xəbər”ə açıqlamasında bildirdi ki, Rüstəm Muradovun həmin adamlarla görüşdə nələri müzakirə etməsilə bağlı konkret fikir söyləyə bilmərik: “Çünki həmin danışığın detalları və məzmunu bizə bəlli deyil. Bizim danışdıqlarımız yalnız ehtimallardır. Muradovun başlıca vəzifəsi ona tapşırılan ərazidə sülhə nəzarət və onu təmin etməkdən ibarətdir. General öz səlahiyyətləri çərçivəsində müəyyən görüşlər keçirə bilər. Həmin görüşlər etibarlı və dayanıqlı sülhün saxlanmasına yönəlibsə, onu missiyaya uyğun hesab etmək olar. Lakin həmin görüşdə tamamilə başqa detallar müzakirə olunubsa, onda bu, Rüstəm Muradovun səlahiyyətlərini aşması anlamına gələ bilər. Gündəlikdə duran əsas məsələ qondarma rejimin bütün silahlı tör-töküntülərinin regiondan çıxarılmasıdır. Danışıqlar bu istiqamətdə də gedə bilər. Çünki həmin imkanlı adamların qondarma qurumdakı proseslərə təsir etmə imkanları da var. Rejimin qalıqları qıcıq doğuran açıqlamalarla çıxış edirlər. Xüsusilə də həmin qondarma rejimin ordusunun saxlanmasının vacibliyini vurğulayırlar. Sülhməramlı missiya bu cür halların qarşısını almasa, yeni münaqişənin alovlanması istisna edilən deyil. Ehtimal etmək olar ki, həmin  görüşdə silahlı qalıqlarla bağlı məsələ ətraflı müzakirə edilib. Ola bilər ki, Köçəryan və onun tərəfdarları regionda silahlıların qalmasını təklif edirlər. Ancaq üçtərəfli  sənədin şərtlərinə görə, bütün silahlılar Azərbaycan ərazisini tərk etməlidir.  Çox istərdim ki, həmin görüşdə Muradov onların ərazini tərk etməsində israrlı mövqeyini ortaya qoysun. Bu baş tutmasa, regionda vəziyyət yenidən gərginləşə bilər. Rusiya-Türkiyə Birgə Monitorinq Mərkəzi fəaliyyət göstərir.  Onların başlıca işi üçtərəfli razılaşmaya necə əməl olunduğuna nəzarət etməkdir. Sazişin bəndlərinin içində ən vacibi erməni qoşunlarının tam olaraq Qarabağı tərk etməsidir. Bunu öz  istəkləri ilə etməsələr, Monitorinq Mərkəzi də öz resurslarını bu işə cəlb etməlidir”.

Məhəmmədəli QƏRİBLİ

Son xəbərlər