Göyçə-Zəngəzur Respublikası parlamentinin ilk iclası keçirildi

img

09 aprel 2021-ci il tarixində Göyçə-Zəngəzur Respublikası parlamentinin onlayn olaraq ilk plenar iclası keçirildi. İclasa qatılanlar qarşısında 10 mart 2021-ci il tarixində QAQB Ali Məşvərət Şurası tərəfindən əksəriyyət üzvlərin səs çoxluğu ilə, Göyçə-Zəngəzur Respublikasının prezidenti seçilmiş Rizvan Talıbovun and içmə mərasimi oldu.

Göyçə-Zəngəzur Respublikası, Qərbi Azərbaycana (Ermənistana) Qayıdış Birliyinin mətbuat xidmətinin məlumatına görə, Rizvan Talıbov QAQB Ali Məşvərət Şurası və GZR Milli Məclis üzvlərinə göstərdikləri etimada görə təşəkkür etdi. Müqəddəs kitabımız Qurani-Kərimə əl basaraq Göyçə-Zəngəzur Respublikası prezidenti olaraq, üzərinə düşən böyük məsuliyyəti dərk etdiyini və prezident vəzifəsini şərəflə daşıyaraq, tarixi yurdlarımıza yenidən sahib çıxıb, qovuşana qədər, tarixi yurdlarından zorakılıqla qovulmuş soydaşlarımızın pozulmuş insani hüquqlarının tam bərpa olunub, onlara erməni daşnaklarının vurduğu maddi-mənəvi ziyanlarının ödənilməsinə nail olana qədər bu çətin, lakin müqəddəs yolda yürüyəcəyini, prezident vəzifəsini şərəflə daşıyacağına,  Göyçə-Zəngəzur Respublikasınin qarşısına qoyulmuş məqsədlərə çatmaq üçün, bu yolda bütün bacarığını sərf edəcəyinə, qərarlarında dövlətçilik və milli maraqlardan çıxış edərək ədalətin və hər bir GZR vətəndaşının yanında olacağına yəmin etdi.

 And içmə mərasimindən sonra,  gündəliyə uyğun olaraq Göyçə-Zəngəzur Respublikası parlamentinin spikerinin və müavinlərinin müəyyənləşdirilməsi proseduruna başlanıldı. Göyçə-Zəngəzur Respublikası parlamentinin spikeri vəzifəsinə Göyçə mahalı Dərəkənd doğumlu Dünya şöhrətli ixtiraçı alim,  fizika-riyaziyyat elmləri doktoru, professor Məhərrəmov Vaqif Əli oğlunun, Dərə-Ələyəz mahalının Qabaxlı kəndi doğumlu tanınmış ziyalı, ictimai fəal, əməkdar müəllim Səfərli Arazxan Xanmalı oğlunun GZR parlamenti spikerinin 1-ci müavini vəzifəsinə, Qaraqoyunlu mahalının Polad kəndi doğumlu, respublikada tanınmış mühəndis, şair Mərdanov Şuriyə Şəki oğlunun GZR parlamenti spikerinin müavini vəzifəsinə, Zəngəzur mahalı Sisian rayonu Ərəfsə kəndi doğumlu, ali təhsilli riyaziyyat müəlliməsi, ictimai fəal Gülməmmədova Svetlana Məmməd qızının GZR parlamenti spikerinin müavini vəzifəsinə, Vedibasar mahalı Ararat rayonu Əfşar kəndi doğumlu ali təhsilli mühəndis, iş adamı, ictimai fəal Nəsulayev Əli Əkbər oğlunun GZR spikerinin müavini vəzifəsinə namizədlikləri irəli sürüldü. Çıxış edənlər Elturan Musayev, Mehdi Nağıyev, Akif Pirəliyev, Şövkət Cavadova, Yavər Bayramov, Rövşən Cəlilov, Fərman Ələkbərov, Naib Paşayev və digərləri namizədlikləri irəli sürülmüş şəxslərin namizədliklərinə dəstəklərini ifadə edərək, gələcək fəaliyyətlərində uğurlar arzuladılar. Parlamentin səmərəli fəaliyyətinin təmin olunması üçün faydalı təkliflərini bildirdilər. Eyni zamanda çıxışçılar təklif etdilər ki, müxtəlif texniki səbəblərdən onlayn toplantıya qatıla bilməyənlərində münasibətləri adbaad vatcap üzərindən öyrənilsin və yalnız bundan sonra, bütün GZR Milli Məclisi üzvlərinin münasibəti məlum olandan sonra, ümumi səsvermənin yekun qərarı mətbuata, ictimaiyyətə açıqlansın! Zoom proqramı və vatcap üzərindən aparılan səsvermənin yekun nəticəsinə əsasən 75 nəfər parlament üzvlərindən 68 nəfərinin irəli sürülmüş namizədlərin lehinə səs verdikləri şəxslər məlum vəzifələrə seçilmiş oldular. Toplantıda çıxış edən GZR prezidenti Rizvan Talıbov parlamentin seçilmiş spiker və müavinlərini təbrik etdi, səmərəli fəaliyyət, uğurlar arzuladı. GZR parlamenti spikeri vəzifəsinə seçilmiş professor Vaqif Məhərrəmov parlamentin gələcək fəaliyyətinin bəzi istiqamətləri barədə danışaraq, hər bir parlament üzvünün vicdanla, səmərəli çalışmasının çox vacib olduğunu qeyd edərək, hər birinə fəaliyyətlərində uğurlar arzuladı və parlament üzvlərinə tövsiyə və tapşırıqlarını çatdıraraq parlamentin işinə yekun vurdu.

Son xəbərlər