Azərbaycan Respublikasının Prezidenti, Ali Baş Komandanı cənab İlham Əliyevin 2018-ci il aprelin 11-də xalqın etimadını yenidən qazanaraq dövlət başçısı seçilməsindən 3 il ötür. İlham Əliyev ölkə başçısı olduğu illərdə eləcə də son 3 ildə Azərbaycan vətəndaşının rifahını hər zaman prioritetdə saxlayıb.
Cənab Prezidentin son 3 illik prezidentlik dövrünə nəzər salsaq görərik ki, ölkəmizin tam dayanıqlı inkişafı ötən illərdəkindən də ən yüksək səviyyədə təmin olunmuşdur. Həm siyasi, həm iqtisadi, həm də sosial sahələrdə böyük uğurlar əldə edilmişdir. Hər kəsə məlumdur ki, ölkə rəhbərliyinin apardığı uğurlu siyasət onun rəhbərlik etdiyi dövlətin, xalqın sabit şəraitdə yaşaması ilə ölçülür. Çünki sabitlik hər bir ölkənin inkişafı üçün əsas şərtdir. İlham Əliyevin prezidentliyi dövründə də Azərbaycan sabitlik şəraitində yaşamışdır. Cənab Prezident hər zaman çıxışlarında vurğulayır ki: “Xalq tərəfindən bizə göstərilən dəstək, bizim siyasətimizə verilən yüksək qiymət həm bizi daha da ruhlandırır və eyni zamanda ölkəmizdə siyasi və iqtisadi sahələrdə sabitliyi təmin edir.” Bu danılmaz faktdır ki, ölkəmizin dünyadakı mövqeyi İlham Əliyevin apardığı uğurlu xarici siyasətin nəticəsidir. Azərbaycanda hər il keçirilən onlarla mötəbər beynəlxalq tədbirlər ölkəmizin dünyadakı mövqeyini həm əks etdirir, həm də möhkəmləndirir. Bizim beynəlxalq gücümüzün artması sayəsində Azərbaycan dünya müstəvisində çox etibarlı tərəfdaş kimi tanınır. Buna xüsusilə diqqət yetirmək lazımdır ki, İlham Əliyevin ölkə başçılığı illərində dövlətimizə il ərzində həm ikitərəfli formatda, həm də beynəlxalq tədbirlərdə iştirak üçün 40-dan çox dövlət və hökumət başçısı səfər edir. Qonşu dövlətlərlə yüksək səviyyəli, etibarlı münasibətlərin qurulmasında hesab edirəm ki, İlham Əliyev digər ölkə başçılarına bir nümunədir. Bu, dövlətimizin ən böyük uğurudur ki, Azərbaycanın digər dövlətlərlə çox möhkəm və qarşılıqlı maraqlar əsasında formalaşmış əlaqələri mövcuddur. Bu da onu deməyə əsas verir ki, beynəlxalq arenada dövlətimizə olan hörmət və etimad ən yüksək səviyyədədir. Əminliklə deyə bilərik ki, dünyada 3 lider dövlət başçısı varsa, onlardan biri bizim liderimiz İlham Əliyevdir. Çünki İlham Əliyev yüksək savada və intellektə malik bir şəxsiyyətdir. O, əsl siyasətçi, əsl dahidir. Dövlət başçımız ölkəyə rəhbərlik etdiyi müddətdə intellektə böyük yer verməklə modern cəmiyyətlərin nəbzini tutduğunu bütün dünyaya hər zaman nümayiş etdirdi. Azərbaycanın qısa zaman ərzində nail olduğu bugünkü inkişafı və gələcəyə doğru hesablanmış hədəfləri, ələlxüsus da 44 günlük müharibədə qazandığı Zəfəri beynəlxalq miqyasda maraq doğuran hadisə kimi qiymətləndirildi. Qarabağ Zəfərindən sonra isə İlham Əliyev həm xalqımız həm də dünya üçün qəhrəmandır. Çünki dövlət başçımız yetkin bir siyasətçi olduğunu, Azərbaycanın dövlət qürurunu inamla qoruya bildiyini beynəlxalq aləmə sübut etdi. Bundan sonra Azərbaycanın gücünə heç bir dövlət şübhə ilə yanaşa bilməz. Prezident İlham Əliyevin qətiyyətli və prinsipial mövqeyi bütün sahələrdə olduğu kimi, diplomatiya meydanında da uğurlarımızı şərtləndirir. Hər zaman Prezidentimiz beynəlxalq tribunalardakı çıxışlarında “Azərbaycanın ərazi bütövlüyü istənilən digər ölkənin ərazi bütövlüyü kimi eyni dəyərə malikdir” fikrini bütün dünyaya bəyan edirdi. “Azərbaycan torpağında ikinci erməni dövlətinin yaranmasına icazə verilməyəcək, işğal edilmiş bütün torpaqlar işğalçılardan azad olunmalı, Azərbaycan vətəndaşları öz doğma yurdlarına qayıtmalıdır” deyirdi. Prezident İlham Əliyevin qətiyyətlə söylədiyi hər kəlmə onun imzasıdır. Cənab prezidentimizin dövlətimizə rəhbərlik etdiyi illərdən bugünə kimi hər il ölkəmizdə bütün sahələrdə müsbət nəticələr əldə edilmişdir. Bu nəticələr onu deməyə əsas verir ki, Prezidentimizin siyasəti düşünülmüş, hesablanmış siyasətdir. Təkcə son 3 ilə nəzər yetirsək görərik ki, həm siyasi, iqtisadi, sosial sahələrdə, həm kadr və struktur islahatları sahələrində, həm də hərbi sahələrdə aparılan böyük islahatlara görə bu illəri dərin islahatlar ili adlandırmaq olar. Bu islahatlar inkişafımızın bundan sonra daha da uğurlu olacağına imkan verəcəkdir. Əminliklə deyə bilərik ki, İlham Əliyevin bundan sonra dövlətimizə başçılıq etdiyi illərdə də Azərbaycan uğurla inkişaf edəcək, bugünkündən də güclü dövlətə çevriləcəkdir! Lamiyə İsazadə, “Kimsəsiz Uşaqların Sosial Müdafiəsi” İB-nin sədri
