Siyasi sığınacaq alverinə görə Almaniyadan Azərbaycana ekstradisiya olunanlar kimdir…

Səxavət Soltanlı: “Həbsdə müsavatçı yoxdursa, deməli, ekstradisiya edilənlərin arasında da partiyadaşlarımızın olması mümkünsüzdür”

img

Ədliyyə Nazirliyi tərəfindən qlobal pandemiya ilə əlaqədar ekstradisiya sorğularının elektron qaydada qəbul olunması və baxılması təmin edilir. Ötən il beynəlxalq axtarışda olan adam oğurluğu, dələduzluq və rəsmi sənədlərin saxtalaşdırılması kimi cinayət əməllərində təqsirləndirilən şəxslərin Almaniya, Bosniya və Herseqovina, Türkiyə, Əlcəzair və s. dövlətlərdən ölkəmizə ekstradisiyasına nail olunub.

Ədliyyə Nazirliyindən bildirilib ki, xarici dövlətlərdə qanunsuz fəaliyyətlə məşğul olaraq, müxtəlif şəxslər üçün qanunsuz yollarla siyasi sığınacaq əldə etmək məqsədilə həmin ölkələrin dövlət qurumlarını aldatmaqla rəsmi sənədlərin saxtalaşdırılması kimi cinayət əməllərində təqsirləndirilən Azərbaycan vətəndaşının Almaniyadan ekstradisiyası təmin edilib və o, nazirliyin əməkdaşlarının müşayiəti ilə ölkəmizə gətirilib: ”Cinayətkar şəxslər Azərbaycana gətirilərkən tranzit dövlətlərin razılığının alınması üçün nazirlik tərəfindən qısa müddətdə zəruri tədbirlər görülür. Bu baxımdan qardaş Türkiyənin ölkəmizə böyük dəstəyi xüsusi qeyd olunmalıdır. Ümumilikdə, ötən 5 il ərzində 200 nəfərdən çox cinayətkar şəxsin Azərbaycana ekstradisiyası təmin olunub. Bununla da cəzanın labüdlüyü prinsipi təmin edilməklə cinayətkarların özlərini azad və təhlükəsizlikdə hiss etmələrinin qarşısı alınır. Nazirlik tərəfindən bu sahədə lazımi tədbirlər bundan sonra da davam etdiriləcək”.

Qeyd edək ki, Almaniya federal polisinin iki il əvvəl “siyasi mühacir” alverçilərinə qarşı keçirdiyi genişmiqyaslı əməliyyat nəticəsində bir qrup Müsavat üzvünün həbs olunması faktı üzə çıxdı. Həmin vaxt  Almaniya federal polisinin həbs etdiyi şəxslər bunlar idi:

- Əlövsət Əliyev - “Legat” İnteqrasiya Mərkəzinin sədri;

- İlham Həsən - Müsavat Partiyasının üzvü, Müsavat Avropa Koordinasiya Mərkəzinin (AKM) sədri;

- Mehdi Xəlilbəyli - Müsavat partiyasının üzvü, Müsavat AKM sədr müavini;

- Abdin Cavadov - Müsavat AKM-in üzvü, Mehdi Xəlilbəylinin qohumu;

- Rəşad Məmmədov - Almaniyanın Koblenz şəhərinə yaxın olan Neuwied adlı şəhərdə yaşayır, Mehdi Xəlilbəylinin sürücüsüdür;

- Elçin Əkbərov - Ədliyyə Nazirliyi Penitensiar Xidmətinin 9 və 14 saylı məntəqə tipli cəzaçəkmə müəssisələrində rəis işləyib.

- Elşən Abdullayev - Almaniyada “siyasi mühacir” adı ilə yaşayır.

Siyahıda adı keçən dörd nəfər – İlham Həsən, Mehdi Xəlilbəyli, Abdin Cavadov, Rəşad Məmmədov – müsavatçıdır. Maraqlıdır, rəsmi məlumatda “siyasi mühacir” alverində təqsirləndirilən şəxslərdən kiminsə Azərbaycana ekstradisiyasının reallaşdığı bildirilir. Həmin şəxs adı qalmaqalda hallanan siyasilərdən biri ola bilərmi?

Qeyd edək ki, internet üzərindən apardığımız araşdırmalar göstərdi ki, siyahıda adı çəkilən şəxslərin demək olar hamısı hazırda azadlıqdadır və Almaniyada yaşayırlar. Almaniyaya azərbaycanlı mühacirlərin saxta sənədlə miqrasiya etməsi ilə bağlı saxlanılan Əlövsət Əliyevin azadlığa buraxılması haqda ilk məlumatı ötən ilin fevral ayında onun oğlu Türkel Rüstəmxanlı paylaşıb. Almaniyada həbsdə olan Müsavat Avropa Koordinasiya Mərkəzinin üzvü Mehdi Xəlilbəyli də ötən il azadlığa çıxıb. Bu haqda Müsavat AKM-dən məlumat verilib. Məlumatda bildirilir ki, Almaniyanın Koblenz Dairə Məhkəməsinin müvafiq şikayət üzrə ilk məhkəmə iclasında Mehdi Xəlilbəyli bəraət alaraq sərbəst buraxılıb. O, hazırda ailəsi ilə birlikdədir. Qeyd edək ki, Mehdi Xəlilbəyli Almaniyada olan miqrant Rəşad Məmmədovun ifadəsi əsasında həbs edilmişdi. Konkret olaraq ölkəyə kimin ekstradisiya olunması ilə bağlı Ədliyyə Nazirliyindən sorğumuza cavabda bildirildi ki, bununla bağlı nazirliyin adından rəsmi məlumat yayılıb, əlavə heç bir şərh verə bilməzlər.

Müsavat Partiyası başqanının müavini Səxavət Soltanlı “Bakı-Xəbər”ə açıqlamasında bildirdi ki, onlarda hər hansı müsavatçının ölkəyə Almaniyadan  və ya digər ölkələrdən ekstradisiyası ilə bağlı heç bir məlumat yoxdur: “Bizim Avropadakı üzvlərimizlə bağlı deyilən istiqamətdə aparılan araşdırma çoxdan yekunlaşıb. Onların böyük əksəriyyəti bəraət aldı. Əgər həbsdə müsavatçı yoxdursa, deməli, ekstradisiya edilənlərin arasında da partiyadaşlarımızın olması  mümkünsüzdür. Sizi əmin edirəm ki, belə bir  hal olsaydı, hakimiyyət bu məlumatı məmnuniyyətlə tirajlayardı. Qeyd edim ki, Avropada olan müsavatçılar barələrində yanlış  qərarların verilməməsilə bağlı hüquqi prosedurları davam etdirirlər”.

Məhəmmədəli QƏRİBLİ

Son xəbərlər