Şəhərlərimizin 1-ci müharibədə, ya işğal dövründə dağıdılması arasında nə fərq - Əliyevdən təcavüzkar Ermənistana daha bir prinsipial zərbə...
“Bizim şəhərlərimiz Birinci Qarabağ müharibəsi ərzində deyil, sonradan işğal dövründə dağıdılıb”. Bunu Prezident İlham Əliyev İslam Əməkdaşlıq Təşkilatının baş katibi Yusif bin Əhməd əl-Osaymini qəbul edərkən deyib.
Dövlət başçısının sözlərinə görə, münaqişə bizim tərəfimizdən birtərəfli qaydada həll olunub: “44 günlük müharibə Azərbaycan torpaqlarının 30 il davam edən və bir milyondan çox azərbaycanlının iztirabına, şəhər və kəndlərimizin tamamilə dağıdılmasına gətirib çıxaran işğala son qoydu. İndi əcnəbi jurnalistlər və diplomatlar işğaldan azad olunmuş ərazilərə səfər edəndə onlar görürlər ki, ermənilər hər şeyi dağıdıblar. Bütün şəhərlər, bütün kəndlər, tarixi və dini məkanlar, məscidlər, qəbiristanlıqlar dağıdılıb. Bu, islamofobiyanın, Azərbaycanofobiyanın, vandalizmin təzahürüdür. Çünki dəfələrlə dediyim kimi, bizim şəhərlərimiz Birinci Qarabağ müharibəsi ərzində deyil, sonradan işğal dövründə dağıdılıb. Bu, bütün Azərbaycan və İslam irsini Azərbaycanın bu tarixi torpaqlarından silmək və həmin torpaqların mənşəyini dəyişdirmək üçün qəsdən yürüdülən siyasət idi”.
Göründüyü kimi, Prezident tutarlı faktlarla erməni vandalizmini ifşa etdi. Bununla yanaşı, şəhərlərimizin Birinci Qarabağ müharibəsində deyil, işğal dövründə dağıdılmasının prinsipial fərqi nədən ibarətdir?
- “Prezidentin diqqəti bu amilə yönəltməsi ondan irəli gəlir ki, ermənilərdə yaradıcı heç bir şey yoxdur”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov hesab edir ki, Prezidentin bu açıqlamasına Qarabağ müharibəsinin bölgədə və Azərbaycanda yaratmış olduğu reallıqlar kontekstində yanaşmaq lazımdır: “Söhbət ondan gedir ki, 28 il ərzində Azərbaycan torpaqları işğal altında qalıb. Bu illər ərzində ermənilər torpaqlarımızda heç bir tikinti-abadlıq işləri aparmayıblar. Əksinə, işğaldan sonra bütün kənd və qəsəbələri dağıdıb talan ediblər. Ermənilər bəyan edirdilər ki, tarixən guya Qarabağ onlara məxsus olub. Torpaqlar onlara məxsus idisə, o zaman nəyə görə vandalcasına yaşayış məntəqələri məhv edildi? Şuşa kimi şəhəri niyə pis günə qoymuşdular? Onlar şəhəri yenidən qurmaq əvəzinə, tarixi mədəniyyət abidələrini məhv ediblər. Ümumiyyətlə, işğal altında olan torpaqlarda xalqımıza aid olan maddi mədəniyyət nümunələrimizi, tarixi abidələrimizi məhv ediblər. Bu onu göstərir ki, işğalçı tərəf həmin torpaqlardan Azərbaycana aid tarixi izləri silmək məqsədi güdüb. Ermənilərin məqsədi ancaq bundan ibarət olub. Həmçinin, işğal altında olan alban kilsələrini öz adlarına çıxarmaq məqsədi güdüblər. Bununla bağlı çoxsaylı saxtakarlıq aparılıb. Kənd və şəhərlər müharibə dövründə dağıdılsaydı, o zaman dünya bunu hardasa başa düşərdi. O mənada ki, müharibə zamanı belə hallar yaşanır. Ancaq məsələ ondadır ki, yaşayış məntəqələri məhz işğal dövründə xarabalığa çevrilib. Bu isə ermənilərin əsl mənfur niyyətlərinin ifşa edilməsi baxımından çox önəmli faktordur. Prezidentin diqqəti bu amilə yönəltməsi ondan irəli gəlir ki, ermənilərdə yaradıcı heç bir şey yoxdur. Onların məqsədi yalnız digər xalqlara aid nə varsa, onu məhv etməkdir”.
Politoloq onu da qeyd etdi ki, beynəlxalq ictimaiyyət bunları bilməlidir.
Vidadi ORDAHALLI
