2783 şəhid - 30 illik ağır işğala son qoymuş nəticəni “minimum itki” saymaq olar...
Müdafiə Nazirliyinin yaydığı rəsmi məlumata görə, Vətən müharibəsində Silahlı Qüvvələrimizin 2783 nəfər hərbi qulluqçusu həlak olub. Nazirlikdən bildirilir ki, onların sırasında 103 nəfər hərbi qulluqçunun DNT analiz metodu ilə şəxsiyyətinin müəyyən edilməsi üzrə işlər davam etdirilir. 100 nəfərdən artıq hərbi qulluqçumuz isə itkin düşmüş hesab olunur. Onların tapılıb ailələrinə məlumat verilməsi üçün zəruri təbdirlər görülür. Hazırda 1245 nəfər hərbi qulluqçumuzun tibb müəssisələrində müalicəsi davam edir.
Vətən müharibəsində 2783 nəfər Vətən övladı şəhid oldu və 1245 nəfər isə yaralandığı üçün hazırda müalicəsini davam etdirir. Təbii, bizim üçün hər bir vətəndaşımızın həyatı qiymətlidir, dəyərlidir.
Qazandığımız qələbənin böyüklüyü miqyası baxımından bu itkiləri minimum itki saymaq olarmı?
- “Azərbaycan Ordusu çox mükəmməl hücum təşkil edərək bu qədər ərazimizi işğaldan azad edib”
Tanınmış hərbi ekspert Tərlan Eyvazov “Bakı-Xəbər”ə şərhində bildirdi ki, bu müharibədə bizim itkilərimiz düşmənlə müqayisədə qat-qat az olub: “Qazandığımız böyük qələbənin miqyasını təhlil etdikdə görürük ki, itkilərimizin sayı minimum dərəcədədir. Qısa müddət ərzində, təxminən ay yarım müddətində bu qədər ərazimiz düşməndən azad edilib. Bəlkə də hansısa opponentler mənə deyə bilərlər ki, bu ərazilərin heç də hamısı silah gücünə azad olunmayıb, mən onlarla razılaşmıram. Çünki bütün müharibələrdə qalib tərəfə məğlub tərəf sülh müraciəti edirsə, orada geridə qalan ərazilər də qalib tərəfin diqtəsi ilə azad olunmalıdır. Belə də oldu”.
T.Eyvazov qeyd etdi ki, Birinci Qarabağ savaşında bizim itkilərimiz daha çox olub. 1991-ci ildən 1994-cü ilin may ayının 12-nə, yəni atəşkəs müqaviləsi bağlanana qədər Azərbaycanın itkisi 20 min olduğu halda, bu müharibədə itkimiz 2783 nəfərdir: “Birinci Qarabağ savaşında itkilərimizin sayı təxminən 20 min nəfər idi, düşmən tərəfin isə 7500 nəfər itkisi vardı. O zaman da onlar itkilərin sayını indiki kimi gizlədirdilər. Amma beynəlxalq araşdırmaçıların tədqiqatlarında onların itkilərinin sayı var, bunu mən özüm oxumuşam. 44 günlük Vətən müharibəsində isə düşmənin daha möhkəmləndirilmiş, əlverişli mövqelərdə durmasına baxmayaraq, Azərbaycan Ordusu çox mükəmməl hücum təşkil edərək, bu qədər ərazimizi işğaldan azad edib və düşməndən sayca dəfələrlə az itki verib, düşmənin isə bizdən qat-qat çox itkisi var. Baxmayaraq ki, hərb elmində hücum taktikasını seçən tərəfin adətən daha çox itki verməsi qəbul olunur. Amma bu bizdə başqa cür oldu, itkilərimiz çox olmadı. Deyərdim ki, bu müharibənin məşqi dörd il bundan əvvəl 4 günlük Aprel döyüşlərində olub. Aprel döyüşlərində bizim itkimiz az olsa da, düşmən bizdən ən azı üç dəfə çox itki verdi.
Yəni bu onu göstərir ki, həm Azərbaycan Ordusunun, əsgərinin, zabitinin hazırlığı, həm təchizatı qat-qat düşməndən üstün olduğuna görə, həm də xalqın öz torpaqlarını işğaldan azad etmək istəyi, bu yolda hər cür fədakarlığa hazır olması bizi bu cür nəticəyə gətirib çıxardı. Torpaqlarımızın bütövlüyünün təmin edilməsi, ərazilərimizin düşmən işğalından azad olunması yolunda canını fəda edən hər bir şəhidimiz başımızın tacıdır, hər bir övladımızın itkisi bizi ağrıdır”.
T.Eyvazovun sözlərinə görə, Ermənistan və onun havadarları bizə təəssüf ki, müharibədən başqa yol qoymadılar. Baxmayaraq ki, Azərbaycan xalqı, dövləti həddindən artıq səbr nümayiş etdirdi, atəşkəsdən sonra 26 il yarım torpaqlarımızın işğaldan azad edilməsini gözlədik. “Təbii ki, düşmən tərəfi 44 günlük müharibədə öz itkilərinin sayını rəsmi şəkildə açıqlamasa da, itki sayını ört-basdır etsə də, dünyanın bu işlə məşğul olan etibarlı institutlarının verdiyi məlumata görə, düşmən tərəfin itkiləri bizdən qat-qat çoxdur, həmçinin, itkin düşənlərin sayı bizdən dəfələrlə çoxdur.
İradə SARIYEVA
