Tacikistan Respublikasının Düşənbə şəhərindən Azərbaycan Respublikasının Tacikistan Respublikasında fövqəladə və səlahiyyətli səfiri Həsən Məmmədzadə də Prezident İlham Əliyevə müraciət edib.
“İcazə verin, Azərbaycan xalqının tarixinə əlamətdar hadisə kimi daxil olan - Azərbaycan Respublikasının ərazi bütövlüyünün bərpa olunması və Qələbə münasibətilə Azərbaycan Respublikasının Tacikistandakı Səfirliyinin kollektivi və Tacikistan Respublikasında yaşayan həmvətənlərimiz adından Sizə dərin minnətdarlığımızı və təşəkkürümüzü bildirək.
Bu gün Azərbaycanın hərtərəfli və dinamik şəkildə inkişafı, Sizin rəhbərliyiniz altında yürüdülən çoxşaxəli və milli maraqlara söykənən müstəqil xarici siyasət kursu ölkəmizin Cənubi Qafqaz regionunun ən inkişaf etmiş ölkəsi olaraq qalmasını təmin edib. Sizin ölkə rəhbəri kimi, iqtisadi, sosial və siyasi sahələrdə, eyni zamanda müasir ordu quruculuğu sahəsində gördüyünüz böyük işlər danılmazdır. Ali Baş Komandan olaraq ordumuzun həm maddi-texniki təminatının və döyüş qabiliyyətinin, həm də şəxsi heyətin peşəkarlıq səviyyəsinin yüksəldilməsi istiqamətində gördüyünüz işlər bugünkü Qələbəmizi təmin edən əsas amillərdəndir. Artıq bütün dünya ordumuzun yenilməzliyinə, qazandığı nailiyyətlərinə və gücünə bələd olmaqla bərabər Azərbaycan dövlətinin müharibə şəraitində belə, beynəlxalq hüququn bütün norma və prinsiplərinə sadiq qalmaqla apardığı uğurlu hərbi əməliyyatlar nəticəsində öz tarixi, əzəli-əbədi torpaqlarını işğaldan azad edərək regionda sülhün və ədalətin bərpası üçün əməli işlər gördüyünün şahidi oldu.
Son illər Sizin rəhbərliyiniz altında ölkəmizdə aparılan işlər, mövcud gözəl ab-hava, daxildəki həmrəylik, milli birlik, vahid amal uğrunda birləşməyimiz, Azərbaycanın beynəlxalq nüfuzunun artması bu qələbəmizi şərtləndirən amillərdəndir.
...Azərbaycanın ərazi bütövlüyünün bərpası və işğalda olan torpaqlarımızın azad olunması uğrunda parlaq qələbənizlə adınız Azərbaycanın şanlı tarixinə qızıl hərflərlə həkk olunmaqdadır.
Ümummilli lider Heydər Əliyevin siyasi məktəbinin varisi və layiqli davamçısı, məqsədyönlü daxili və xarici siyasətini uğurla yerinə yetirən dövlətin, xalqın xilaskarı, onun iradəsini ifadə edən Ali Baş Komandanı olaraq ölkəmizin ərazi bütövlüyünün bərpası uğrunda atdığınız qətiyyətli, məğrur və müdrik addımları alqışlayır, Azərbaycan Respublikasının ərazi bütövlüyünün bərpa olunması və yüksək qələbənin əldə edilməsi münasibətilə Sizə yüksək minnətdarlığımızı bildirir və bu haqq yolunda uğurlar arzulayırıq” - deyə səfir Həsən Məmmədzadə Prezident İlham Əliyevə müraciətində qeyd edir.
Baki-xeber.com
