Əhəd Məmmədli: “Bir ay müddətində Azərbaycan sübut etdi ki, təkbətək meydanda Ermənistan bizimlə müharibə etmək cəsarəti və gücünə sahib deyil”
Prezident İlham Əliyev “Fox News” televiziya kanalına müsahibəsində jurnalistin “1994-cü ildə Siz müharibədə məğlub oldunuz. İndi 2020-ci ildə isə Siz müharibədə qalib gəlmək üçün müharibəyə yenidən başlamaq istəyirsiniz” sualına cavab olaraq deyib ki, biz müharibədə məğlub olmamışdıq, biz döyüşü uduzmuşduq.
Dövlət başçısı bildirib: "Biz müharibədə məğlub olmamışdıq. Biz döyüşü uduzmuşduq. Bu da obyektiv səbəblər üzündən olmuşdur. Birincisi, Azərbaycanda daxili qeyri-sabitlik var idi, Ermənistan da bundan sui-istifadə etdi. İkincisi bu, Ermənistana açıq xarici dəstək üzündən baş vermişdir. Biz müharibəyə başlamamışıq. Biz, sadəcə cavab verdik və biz bunu Birləşmiş Millətlər Təşkilatının Nizamnaməsi əsasında edirik. Birləşmiş Millətlər Təşkilatının Nizamnaməsi hər bir ölkənin özünümüdafiə hüququnu təmin edir. Bizim etdiyimiz odur ki, biz özümüzü müdafiə edirik və biz Azərbaycanın beynəlxalq səviyyədə tanınan ərazilərini erməni işğalından azad edirik. Bundan artıq heç bir şey etmirik. Erməni xalqına gəldikdə, mən dəfələrlə demişəm ki, Dağlıq Qarabağda yaşayan ermənilər bizim vətəndaşlarımızdır, biz onların qeydinə qalacağıq. Onlar oraya qayıdacaq, azərbaycanlılarla yanaşı ləyaqət, sülh içində yaşayacaqlar".
Prezidentin jurnalistə 90-cı ildə ermənilərin əldə etdiyi hərbi üstünlüklə bağlı verdiyi izahı necə dəyərləndirmək olar?
Politoloq Əhəd Məmmədli “Bakı-Xəbər”ə açıqlamasında bildirdi ki, ölkə başçısının həmin təsbiti çox yerində və obyektiv oldu: “Biz doğrudan da ermənilərə müharibəni uduzmamışdıq. Bəli, həmin vaxt Azərbaycan torpaqlarının işğalı daxili siyasi çəkişmələr və Ermənistana verilən kənar dəstəyin hesabına mümkün olmuşdu. Birinci Qarabağ müharibəsinin ən qaynar fazaları 1991-94-cü illərə təsadüf edib. Bu üç il ərzində Azərbaycanda 5 dəfə hərbi çevrilişə cəhd edilib. Onlardan üçünün nəticəsində hakimiyyət dəyişilmişdi. Demək olar ki, hər il hakimiyyət dəyişilirdi. Belə vəziyyətin hökm sürdüyü istənilən ölkə müharibəni uduzmuş olacaqdı. Həmin vaxt Rusiya Ermənistana açıq dəstək vermişdi. Xocalını alıb ermənilərə verən də 366-cı rus alayı olmuşdu. Kəlbəcər və Ağdərənin işğalında da ruslar fəal iştirak edib. Bura Pskov diviziyasını aid edə bilərik. Qeyri-rəsmi olsa da, Rusiya həmin dəstəyi verirdi. Prezident xarici dəstək deyəndə bu amilləri nəzərdə tuturdu”.
Politoloqun sözlərinə görə, Ermənistan və onların havadarlarını da bu amil arxayınlaşdırmışdı: “Onlar elə bilirdi ki, həmin zamandan az qala 30 il keçib və müharibə artıq unudulub. Onlar heç vaxt zənn etməzdilər ki, Azərbaycan hərbi müstəvidə qatıb qabağına onları qovacaq. Azərbaycanın bu gün hərb meydanında göstərdiyi şücaət göstərir ki, biz müharibəni yox, döyüşü uduzmuşuq. Döyüş müharibə demək deyil. Onun bir elementi sayılır. Hətta ermənilər miflər uydururdular ki, güya onların müdafiə sədləri keçilməzdir, orduları da məğlubedilməzdir. Bir ay müddətində Azərbaycan sübut etdi ki, təkbətək meydanda Ermənistan bizimlə müharibə etmək cəsarəti və gücünə sahib deyil. Biz hazırda Qarabağda kimin qalib olduğunu subut edirik. Bundan əlavə, mən Prezidentdən müsahibə götürən jurnalistin çox qərəzli olduğunu deyə bilərəm. Bunu onun ünvanladığı qərəzli sullardan da görmək olurdu. Məhz bu sualı da bizim zəif olduğumuza dair rəy formalaşdırmaq üçün vermişdi. Prezident bir neçə cümlə ilə ona məsələnin mahiyyətini izah etdi. Azərbaycan xalqı bu gün sübut edir ki, onun iradəsini sındırmaq, torpağını əbədi olaraq işğalda saxlamaq mümkün deyil”.
Arada olan fasilə belə təəssürat yarada bilərdi ki, ermənilər prosesi tamamlayıb. Ancaq biz ölkə olaraq sübut etdik ki, onların üstünlüyü daimi yox, epizodik olub.
Məhəmmədəli QƏRİBLİ
