Son aylar ərzində ölkədə korrupsiya ilə bağlı yüksək vəzifəli şəxslərin həbsləri reallaşıb. Həmin əməliyyatların böyük əksəriyyəti icra qurumlarını əhatə edib və detalları nümayiş olunub. Maraqlıdır ki, baş verən hadisələrdən sonra icra qurumlarında hələ də korrupsiya və rüşvətxorluq hallarının olduğuna dair faktlar ortaya çıxır. Baş Prokurorluğun Abşeronda keçirilmiş əməliyyatla bağlı yaydığı rəsmi məlumatda bu barədə məlumat verilir.
Baş Prokurorluqdan verilən məlumata görə, Baş prokuror yanında Korrupsiyaya qarşı Mübarizə Baş İdarəsinin “161–Qaynar xətt” əlaqə mərkəzinə Abşeron Rayon İcra Hakimiyyətinin vəzifəli şəxslərinin qanunsuz əməlləri barədə daxil olmuş müraciətlər araşdırılıb. Bununla əlaqədar həyata keçirilən kompleks əməliyyat-istintaq tədbirləri ilə Abşeron Rayon İcra Hakimiyyəti Memarlıq və tikinti şöbəsinin müdiri (baş memar) Akif Əliyevin vətəndaşa tikinti üçün hər hansı layihə hazırlanmadan və Rayon İcra Hakimiyyətinə tikintiyə icazə üçün rəsmi qaydada müraciət olunmadan, müvafiq zəruri sənədləşmə aparılmadan tikinti aparılması üçün ümumi himayədarlığı həyata keçirəcəyini bildirib, Abşeron Rayon İcra Hakimiyyəti MKTB-nin Xırdalan şəhəri 3 saylı Mənzil Təsərrüfat İstehsalat İstismar təmir sahəsinin rəisi Murad Əhmədovun vasitəsilə 3000 manat məbləğində pul vəsaitini rüşvət qismində istəyib almasına, daha sonra tikinti obyektində aparılan tikinti-quraşdırma işləri zamanı ümumi sahə həcminin artmasını bildirib əlavə olaraq vətəndaşdan 1500 manat məbləğində pul vəsaitini rüşvət qismində almasına, Murad Əhmədovla aralarında bölməklə şəxsi ehtiyaclarına sərf etməsinə əsaslı şübhələr müəyyən edilib. Bununla əlaqədar Akif Əliyev 23 iyun 2020-ci il tarixdə Cinayət Məcəlləsinin 311.2-ci (rüşvət alma) maddəsi ilə təqsirləndirilən şəxs qismində cəlb edilməklə ona həmin maddədə nəzərdə tutulan ittiham elan olunub, Binəqədi Rayon Məhkəməsinin qərarı ilə barəsində 4 ay müddətə həbs qətimkan tədbiri seçilib.
Həmçinin, istintaqla Murad Əhmədovun özünün Akif Əliyevlə yaxın münasibətlərinin olmasını, həmin münasibətindən istifadə edərək vətəndaşın Xırdalan şəhərində yerləşən “AAAF Park” yaşayış kompleksinin nəzdində 96 kv/m qeyri yaşayış sahəsinin texniki şərtlərinə dəyişiklik edilməsi və eskiz layihəsinin hazırlanması imkanına malik olmasını, bunun müqabilində 2500 manat məbləğində pul vəsaitinin rüşvət qismində verilməsinin zəruri olmasını yalandan bildirərək vətəndaşı aldatmasına, qeyd edilən məsələnin müsbət həlli üçün onun 1000 manat məbləğində pul vəsaitini ələ keçirməsinə, o cümlədən vətəndaşın xeyrinə edəcəyi hərəkətə görə sonuncunu 2500 manat məbləğində pul vəsaitini rüşvət qismində verməyə təhrik etməsinə şübhələr üçün əsaslar müəyyən edilib.
Müraciət üzrə Baş İdarənin əməkdaşları tərəfindən keçirilmiş təxirəsalınmaz istintaq-əməliyyat tədbirləri nəticəsində M.Əhmədov vətəndaşı aldadaraq 1000 manat məbləğində pulu 20.06.2020-ci il tarixdə ondan alarkən cinayət başında yaxalanıb.
Qeyd olunan qanunsuz əməllər məhkəmə qərarı əsasında keçirilmiş əməliyyat-axtarış tədbirlərinə uyğun olaraq audio-video çəkilişlərlə təsdiq olunub. Murad Əhmədov Cinayət Məcəlləsinin 32.4, 312.1 (rüşvət verməyə təhrik etmə) və digər maddələri ilə təqsirləndirilən şəxs qismində cəlb edilməklə barəsində məhkəmənin qərarı ilə 3 ay müddətə həbs qətimkan tədbiri seçilib. Hazırda cinayət işi üzrə digər təqsirli şəxslərin, eləcə də baş vermiş qanun pozuntularında iştirakı müəyyən edilən rayon icra hakimiyyətinin əməkdaşlarının tam dairəsinin müəyyənləşdirilərək məsuliyyətə cəlb edilməsi istiqamətində zəruri istintaq-əməliyyat tədbirləri davam etdirilir.
Ölkədə həyata keçirilən geniş antikorrupsiya tədbirləri dönəmində hələ də icra qurumlarında korrupsiya mexanizminin qalması nə ilə izah oluna bilər?
Sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, ölkədə korrupsiya mexanizminin kök atdığı və strukturlaşdığı qurumlar var: “Bunlardan əsası icra qurumlarıdır. Ancaq bu heç də o anlama gəlməməlidir ki, rüşvət və korrupsiya icra qurumlarından başqa heç yerdə yoxdur. İcra qurumlarının bu sahədə “müştəriləri” çox olduğu üçün onlarda daha çox nəzərə çarpır. Artıq həmin çevrədə olanlar bunu vərdiş halına çeviriblər. Özləri də mövsümə uyğun hərəkət edirlər. Tutqular sistemli hal alanda “müştərilərinə” deyirlər ki, bir az gözləsinlər. Ara sakitləşən kimi yenə öz işlərinə başlayırlar. Rüşvətin iki tərəfi var, o biri tərəfdə duranlar da bu məsələdə məsuliyyət daşıyırlar. Qanuni haqlarını tələb etmək əvəzinə, işlərini rüşvət müqabilində gördürməyə üstünlük verirlər. Son həbsdə icra hakimiyyətinin baş memarı həbs edildi. Xüsusilə də böyük şəhərlərdə əhalinin tikinti aparmaq üçün icra hakimiyyətinin memarlıq şöbəsinə daha çox işi düşür.
Şəhərsalmada arxitektura ilə bağlı icazələrin verilməsində memarlar əməlli-başlı “tas” müəyyənləşdiriblər. Adam var, qanuni yolla aldığı sənədli torpaq sahəsində belə ev tikə bilmir. Ona elə maneçiliklər törədirlər ki, məcbur qalıb canını rüşvət verməklə qurtarır. Ötən dəfə sizinlə müsahibədə də bildirdim ki, bu istiqamətdə köklü islahatlara ehtiyac var. Çox yaxşı olar ki, icra qurumları ilə bələdiyyələr arasındakı səlahiyyət bölgüsü başa çatdırılsın. Şəhərsəlma və bu kimi məsələlər seçkili qurum kimi bələdiyyələrin sərəncamına verilsə daha yaxşı olar. Çünki həmin qurumlar seçicilər qarşısında bir öhdəlik daşıyır, daimi hesabat verməlidirlər. Köklü islahatlar olmayınca, köhnə kadrlar yenilənməyincə, yenilən kadrların özündə demokrtaik dəyərlərə hörmət formalaşmayınca biz belə halların yenə də şahidi ola bilərik”.
Təəssüflə qeyd etməliyik ki, bəzi icra qurumları və orada çalışan rəhbər şəxslər bundan əvvəl aparılan əməliyyatlardan ciddi nəticə çıxarmayıblar. Ancaq bilməlidirlər ki, antikorrupsiya tədbirləri kiməsə güzəşt etmir. Bundan yayınmağın yeganə yolu təmiz işləməkdir.
Məhəmmədəli QƏRİBLİ
