Ermənistanın Baş naziri Nikol Paşinyan onlayn formada keçirilən brifinqdə bəyan edib ki, ölkədə epidemioloji vəziyyət çətin olaraq qalmaqdadır. Baxmayaraq ki, bununla bağlı vəziyyət sabit olsa da, problem bu sabitliyin qorunub saxlanmasına zəmanət verilməməsindədir.
O bununla bağlı bəzi məqamlara toxunub: “Təəssüf ki, yeni növ koronavirus infeksiyası səbəbindən Ermənistanda epidemioloji vəziyyət ciddi olaraq qalmaqdadır. Kifayət qədər sabit bir vəziyyətə gəldiyimizi söyləyə bilsək də, problem bu sabitliyin qorunub saxlanacağına dair heç bir zəmanət verilməməsidir. Bizim yeganə vasitəmiz bütün Ermənistan sakinləri tərəfindən epidemiyaya qarşı qaydalara ən ciddi şəkildə riayət edilməsidir. Həm də geniş yayılmış maarifləndirmə kampaniyasını davam etdiririk ki, soydaşlarımız üç sadə epidemiya əleyhinə qaydaya riayət etsinlər “.
O qeyd edib ki, maska ilə bağlı problem həll olunub və bazarda onun qiyməti düşür. Bildirib ki, maskalar get-gedə insanlara daha əlçatan olur. O, dövlət büdcəsi hesabına çoxlu sayda oksigen cihazı alındığını da xatırladıb.
Maraqlıdır, Paşinyan ölkədə sabitliyin pozulmasından niyə belə qorxur? Ermənistanda nə baş verir?
“Narahatlığın digər səbəbi ölkədəki gərgin siyasi vəziyyətlə bağlıdır”
Məsələyə münasibət bildirən şərqşünas Seyid Camal Əzimbəylinin fikrincə, Paşinyanın bu qədər narahat olması bir neçə amillə bağlıdır: “Problem ondadır ki, Ermənistanın əhalisi az olsa da, bu ölkədə koronavirus infeksiyası sürətlə yayılır. Virusun yayılma sürətinə görə Ermənistan bir sıra ölkələri qabaqlayıb. Ermənistanda son sutka ərzində daha 418 nəfər yeni növ koronavirus infeksiyasına yoluxub. Nəticədə ölkədə koronavirusa yoluxanların sayı 21min nəfəri ötüb. Son sutka ərzində koronavirusa yoluxan 12 nəfər ölüb və bununla da virusa yoluxma nəticəsində ölənlərin sayı 372 nəfərə çatıb. Paşinyan pandemiyanın yaxın günlərdə ölkədə daha geniş miqyas alacağından qorxur. Nəticədə həm virusa yoluxanların, həm də bundan ölənlərin sayı qat-qat çox olacaq. Paşinyan bir qədər əvvəl demişdi ki, vəziyyət kritikdir. Koronavirus xəstələri üçün ayrılan 1857 çarpayıdan 1551-i tutulub, 236 reanimasiya çarpayısından 204-ü məşğuldur. O hesab edir ki, proses belə davam etsə, xəstələri qəbul etməyə çarpayı çatmayacaq. O üzdən, belə narahatdır. Narahatlığın digər səbəbi ölkədəki gərgin siyasi vəziyyətlə bağlıdır. Məlum olduğu kimi, siyasi vəziyyət hər keçən gün daha da gərginləşir. Paşinyanın rəqibləri güc toplamaqda və ona qarşı hücumları artırmaqdadır. Bütün bunların üst-üstə düşməsi ölkədə hər an sabitliyin pozulması risqini artırır. Bu səbəbdən Paşinyanın sabaha inamı yoxdur”.
Ermənistan koronavirus bataqlığına batdıqca, Paşinyan hakimiyyətinin problemləri bir az da artır. Gör vəziyyət nə yerə gəlib çatıb ki, Paşinyan hər an ölkədə sabitliyin pozulacağından ehtiyat edir.
Vidadi ORDAHALLI
