Müdafiə nazirinin təsdiq etdiyi 2020-ci il üçün döyüş hazırlığı planına əsasən dağlıq ərazidə hücumun planlaşdırılması və aparılması tapşırıqlarının icrası üzrə Azərbaycan Ordusu bölmələrinin təlimi keçirilib.
Bu barədə Müdafiə Nazirliyi məlumat yayıb. Bildirilib ki, təlimə 800 nəfərədək şəxsi heyət, 100-dək zirehli döyüş və avtomobil texnikası, 40-dək müxtəlif çaplı artilleriya qurğusu, altı ədəd döyüş və nəqliyyat helikopteri cəlb olunub. Təlimin məqsədi komandirlərin dağlıq ərazidə döyüş bacarıqlarının təkmilləşdirilməsi, hücum döyüşlərinin aparılması zamanı bölmələrin idarəolunması, şəxsi heyətin fiziki dözümlülüyünün yoxlanması, eləcə də bölmələrin qarşılıqlı fəaliyyətinin təşkili olub. Həyəcan siqnalı ilə qaldırılan bölmələr ehtiyat rayonunun tutulması, dağ aşırımlarının və hakim yüksəkliklərin ələ keçirilməsi, əsas qüvvələrin hücumu üçün əlverişli şəraitin yaradılması tapşırıqlarını müvəffəqiyyətlə yerinə yetiriblər. Təlimin yekun mərhələsində döyüş atışları icra olunub.
Azərbaycan ordusunun dağlıq ərazidə hücumun planlaşdırılması və aparılması tapşırıqlarının icrası üzrə təlimlərinin hansı strateji əhəmiyyəti var?
Hərbi ekspert Ramil Məmmədli “Bakı-Xəbər”ə açıqlamasında bildirdi ki, son 6 ildə Azərbaycan Silahlı Qüvvələri hərbi təlimlərin sayını bir neçə dəfə artırıb: “Artıq Azərbaycan ordusu briqada və korpus səviyyəsində deyil, qoşun növləri, Ümumqoşun Ordusu səviyyəsində təlimlər keçirir. İldə 4-5 belə təlimin keçirildiyinin şahidi oluruq. Bu təlimlər fəsillər və relyef üzrə həyata keçirilir. Bunlardan biri də dağlıq ərazilərdə keçirilən təlimlərdir. Bu relyef üzrə keçirilən təlimlər də müxtəlif təyinatlı olur. Məsələn, hücum, əks hücum, müdafiə dərinliklərdə yerləşən düşmən mövqelərinin məhv edilməsi istiqamətində həyata keçirilir. Azərbaycan ordusunun dağlıq ərazidə keçirdiyi hazırkı təlimlər də mövcud situasiya ilə bağlıdır. Bizim ordumuzun qarşısına qoyulan başlıca məqsəd Azərbaycan ərazilərinin işğaldan azad edilməsidir. Bizim işğal altında olan ərazilərimizin çox böyük hissəsi, təxminən 80 faizi dağlıq əraziyə düşür. Bura Dağlıq Qarabağın öz ərazisini, Kəlbəcər, Laçın, Qubadlını, Füzuli rayonunun şimal hissəsini, Cəbrayılı aid edə bilərik. Bunların hər biri dağlıq olmaqla yanaşı, həm də çox sərt keçidləri olan ərazilərdi. Bu səbəbdən də, Azərbaycan ordusunun həmin istiqamətlərdə təlim keçərək döyüş bacarığını, taktiki döyüş vərdişlərini təkmilləşdirməsi çox vacibdir. Bundan başqa, Azərbaycan ordusunun silah, texnika parkına da baxdıqda biz görərik ki, ordunun son illərdə əldə etdiyi silahların böyük əksəriyyəti məhz dağlıq ərazilərdə qarşıya qoyulan tapşırıqların yerinə yetirilməsinə hesablanıb. Ordunun yeni, müasir bölməsinin də yaradılması məhz bu məqəsədə xidmət edir. Söhbət pilotsuz uçuş aparatlarının ordunun istifadəsində olmasından gedir. Bu da çətin keçidli dağlıq ərazilərdə kəşfiyyat və zərbə tədbirlərinin həyata keçirilməsinə yönəldilib. Bundan başqa, ordumuzun xüsusilə cəbhə xətti boyunca yerləşən bir çox bölmələri məhz dağlıq ərazilərdə xidmət aparır və onlar belə şəraitdə döyüş tapşırıqlarını yerinə yetirmək üzrə ixtisaslaşıblar. Yenə qeyd edirəm, məqsəd işğal altında olan ərazilərimizin azad edilməsi istiqamətində effektiv nəticənin əldə edilməsidir. Bunun üçün şəxsi heyət məlum istiqamətdəki təlimlərə cəlb edilir. Eyni zamanda, aldığımız sulahların bu döyüş şəraitində istifadəsi öyrənilir”.
Məhəmmədəli QƏRİBLİ
