Ermənistanın “Qraparak” qəzeti yazır ki, koronavirus fırıldağı üzə çıxdığı Paşinyan Moskvaya getmir. Qeyd olunub ki, Baş nazir Nikol Paşinyan epidemiya səbəbilə Moskva səfərini ləğv etdiyini açıqlayıb. Ancaq nəşrin mənbələrinə görə, bu heç də Paşinyanın dediyi səbəblərlə bağlı deyil. Səfərin alınmaması daha çox Kremlin yaratdığı maneələrə görə baş verir.
Sözügedən məsələ ilə bağlı qəzet maraqlı məqamlara toxunub. Bildirilir ki, Rusiya tərəfi Paşinyanın Moskva hava limanında koronavirus testindən keçməsini tələb edib, çünki onun infeksiyadan tez sağalması ilə bağlı şübhələr var: “Ermənistan Paşinyanın İrəvanda keçirilən mənfi testinin cavabını göndərməyi təklif edib, lakin ruslar imtina edərək, Baş nazirin yerindəcə yoxlanılmasının lazım olduğunu söyləyiblər. Paşinyanın həqiqətən də koronavirusa yoluxmadığı ortaya çıxsa, o zaman Rusiyaya girişi rədd ediləcək, çünki Ermənistan koronavirusun yayılması baxımından bölgədəki ən təhlükəli ölkədir”.
Belə görünür ki, Paşinyan koronavirus yalanının rəsmən ortaya çıxacağından qorxduğu üçün sözügedən səfərdən imtina edib. Yoxsa, o, müəyyən məsələləri Putinlə müzakirə etməkdən ötrü həmin tədbirdən bir vasitə kimi istifadə edərdi.
Maraqlıdır, bəs ekspertlər bunu necə şərh edirlər?
“Son dövrlər münasibətlərdə gərginlik bir az da artıb”
Məsələyə münasibət bildirən AMİP funksioneri Əli Orucovun fikrincə, koronavirus yalanı üzündən Paşinyanın səfərdən imtina etməsi müəyyən mənada inandırıcı görünür: “Məsələ ondadır ki, Rusiyanın Paşinyanla münasibətləri yaxşı deyil. Son dövrlər münasibətlərdə gərginlik bir az da artıb. Düzdür, sözügedən gərginlik əsasən qapalı müstəvidə özünü göstərir. Ancaq bir sıra məsələlərdə tərəflər arasında olan ciddi fikir ayrılıqları heç kəsə sirr deyil. Paşinyan, zatən, Kreml üçün arzuolunmaz şəxsdir. Baxmayaraq ki, Ermənistan Rusiyanın patronajlığı altında olan Aİİ, KTMT kimi qurumlarda təmsil olunur, amma bu, Paşinyana münasibətin müsbət mənada dəyişəcəyi demək deyil. Son vaxtlar Paşinyanla bağlı Rusiya mətbuatında tez-tez tənqidi yazılar dərc olunur. Bəzi məlumatlara görə, Paşinyanın qanunsuz bir sıra ticarət fəaliyyəti ilə bağlı faktların üzə çıxmasında Rusiya xüsusi rol oynayıb. Hansı ki, bununla bağlı erməni mediasında dərc olunan məlumatlar böyük rezonansa səbəb oldu. Belə olan halda, Paşinyan qorxur ki, məlum testlər vasitəsilə Rusiya onun koronavirus yalanını həqiqətən də ortaya çıxara bilər. Bu da onun biabır olması deməkdir. Digər tərəfdən, Ermənistanda daxili siyasi vəziyyət də çox gərgindir. Bu aralar Paşinyan ona yönəlik çevrilişdən qorxur”.
Görünən odur ki, Paşinyan Rusiya ilə olan körpüləri yandırdığı üçün etimadı tam itirib. O üzdən, hər şeydən ehtiyat edir.
Vidadi ORDAHALLI
