Ermənistanda hazırkı hakimiyyətin rəqibləri ilə bağlı maraqlı proseslər cərəyan edir. Ermənistan Apelyasiya Məhkəməsinin 2 milyard dram(4,1 milyon ABŞ dolları) müqabilində azadlığa – zaminə buraxılması barədə qərarına uyğun olaraq, həmin məbləğdə girov ödənildikdən sonra eks-prezident Robert Köçəryan sərbəst buraxılıb.
Erməni mediası girov məbləğini ödəməkdə Köçəryan ailəsinə yardım etmiş iş adamlarının siyahısını əldə edib.
Samvel Karapetyan - Rusiyada qeydiyyatda olan, fəaliyyət göstərən və Qarabağın məskunlaşmasına fəal dəstək verən “Taşir” şirkətlər qrupunun rəhbəri.
Sergey Ambarsumyan - “Monarx” şirkətlər qrupunun sahibi.
Vladimir Yevtuşenkov - R.Köçəryanın da müstəqil direktor qismində İdarə Heyətinin üzvü olduğu Rusiyanın məşhur “AFK Sistema” şirkətinin əsas sahibi.
Gennadi Stepanyan - rusiyalı iş adamı və xeyriyyəçi.
Yardım siyahısında adları çəkilən şəxslərin Rusiya ilə birbaşa bağlılığı üzə çıxır, hətta onların arasında milliyyətcə rus olanı da var. Qeyd edək ki, Paşinyan digər rəqibi, “Çiçəklənən Ermənistan” partiyasının lideri Qaqik Tsarukyanı da həbs etdirməyə nail ola bilməyib. İrəvan məhkəməsi onunla bağlı həbs qətimkan tədbiri seçməkdən imtina edib. Partiya rəhbərinin vəkili Yerem Sarkisyan deyib ki, məhkəmənin siyasi proseslərdən üstün olmasından məmnundurlar. Bu mənada, vəkil məhkəmə iclasına rəhbərlik edən hakim Robert Papoyanın qərarını təqdir edib. Qeyd olunur ki, Tsarukyan hələlik azadlıqda olsa da, onunla bağlı proses qapadılmayıb. Həm Köçəryana, həm də Tsarukyana Rusiyadakı müəyyən dairələrdən də dəstəyin verildiyi iddiaları var. Ermənistanda Paşinyanın siyasi rəqibləri ilə bağlı baş verən prosesi necə dəyərləndirmək olar?
Politoloq Yeganə Hacıyeva “Bakı-Xəbər”ə açıqlamasında bildirdi ki, Paşinyan iqtidarının Köçəryana yönəlik təqibi və onun adının ətrafındakı manipulyasiyası onun xeyrinə işlədi:“Həmin ölkədə son bir neçə ayda aparılan sorğuların nəticəsində hazırda Köçəryanın ölkədə ən nüfuzlu siyasi lider kimi qəbul edilməsi faktı əksini tapdı. Yəni Ermənistanın həbsdəki keçmiş prezidenti yenidən reabilitasiya olundu. Eyni yanaşma bir az zəif formada Serj Sarkisyana da aid olunur. Məsələ ondadır ki, Sarkisyan və Köçəryan dövlət aparatına nəzarət və rəhbərlik etmiş şəxs kimi hakimiyyətə küçələrdən deyil, səngərlərdən gəliblər. Hər iki şəxs, Paşinyandan fərqli olaraq, Qarabağda hərbi əməliyyatlarda (cinayətlərdə-Y.H) iştirak edib, yəni erməni dövlətinin maraqlarına xidmət etmiş şəxslərdir. Son iki ildə hakimiyyətdə olan və erməni cəmiyyəti üçün heç bir real iş görməyən Paşinyan öz səriştəsizliyi ilə onların daha böyük nüfuz toplamasına səbəb oldu. Onlara qarşı aparılan repressiya, siyasi həbslər isə yenidən onları erməni cəmiyyətinin gözündə daha cəlbedici fiqurlara çevirir”.
Politoloqun sözlərinə görə, Ermənistan daxilində gedən siyasi proseslərin analizi onu göstərir ki, son iki ildə hər iki keçmiş prezident və ümumilikdə “Qarabağ klanı” Paşinyan hakimiyyətinə qarşı gücləndi, baş verənləri öz xeyrinə çevirərək itirdiyi gücünü bərpa etdi:“Əlbəttə, burada Rusiya faktorunu da gözardı edə bilmərik. İqtisadiyyat və sənayesinin yetmiş faizi Rusiyaya məxsus olan bir ölkədə Moskvanın adamları kimi tanınan, Rusiyaya yaxınlığı ilə seçilən şəxslərin təqibi Paşinyan üçün məntiqi nəticələr verəcəkdi. Bununla erməni cəmiyyətinin ictimai-siyasi şüurundakı Rusiya stereotipi və bu mövzunun sakrallığı sındırılırdı ki, iqtisadiyat və sənayesinin yetmiş faizinin sahibi Rusiya buna imkan verməyəcəkdi.
Bu həftə isə Apelyasiya Məhkəməsi Ermənistanın ikinci prezidenti Robert Köçəryanın 4 milyon girov müqabilində həbsdən azad olunması barədə qərar çıxarıb. Həmçinin parlamentdə mövcud hökumətin dəyişdirilməsi labüdlüyünə dair çağırışlarından sonra həbs olunan, haqqında bir sıra cinayət işləri başladılan, parlamentdəki 132 mandatdan 25-nin sahibi FEP- partiya tərəfdarları siyasi təqiblərə məruz qalan Qaqik Tsarukyan da azad edildi.
Qaqik Tsarukyana qarşı irəli sürülmüş iddialardan biri də 2017-ci il parlament seçkilərində seçiciləri pulla ələ alınması iddiasıdır ki, seçkilərin total saxtalaşdırıldığı bir ölkədə belə iddia ilə məhkəmə başlatmağın özü bir qeyri-ciddi təşəbbüs idi. Cavab olaraq isə Firavan Ermənistan Partiyasının partiya üzvləri sosial mediada Nikol Paşınyanın yaratdığı və həyat yoldaşı Anna Hakobyan tərəfindən idarə olunan korrupsiya sxemi üzrə müxtəlif fondlar adı altında öz siyasi rəqibləri və devirdiyi hökumətin nüfuzlu simalarından rüşvət alması, köçürmələr, bank hesabları, vəsaitlər və fərdi hesabların olduğu məlumatları paylaşırlar. Məlumat üçün qeyd edim ki, 2019 -cu ilin yanvar ayında Davos Forumunda iştirak adı ilə Sürixdə olan Anna Hakobyan bu korrupsiya fondlarının yaradılması və idarə olunmasında birbaşa iştirak edib. Anna Hakobyana bu məsələlərdə Ermənistanın bir sıra nüfuzlu rəsmiləri ilə uzun illərdir şübhəli kontaktda olan isveçrəli bir iş adamı vasitəçilik edib. 2019-cu il 1 mart tarixinə olan məlumatlara əsasən, Ermənistan baş nazirinin həyat yoldaşı Anna tərəfindən birbaşa və ya dolayısı ilə nəzarət edilən hesablarda ümumi məbləğ nə az, nə çox - 1,5 milyard avroya çatmışdı. Aradan il yarım vaxt keçdiyinə görə bu fondlarda toplanmış məbləği ancaq ehtimal etmək olar. Bir sözlə, istər daxili, istərsə də xarici siyasətdə hakimiyyətə “facebook”dan, küçədən gəlmiş Paşınyanın səriştəsizliyi prosesləri idarəolunmaz bir səmtə yönəldib”.
Politoloqun sözlərinə görə, son azad olunmaların içində, əlbəttə, diqqəti çəkən əsas məqam Robert Köçəryana qarşı tətbiq olunmuş həbs qətiimkan tədbirinin dəyişdirilməsi üçün vəsaitin kimlər tərəfindən ödənilməsi faktıdır:”Koçəryan üçün girov məbləği ödəyənlərin əksəriyyətinin Rusiya biznes nümayəndəsi və birinin də milliyyətcə rus olması maraqlıdır. Onu da qeyd edim ki, Köçəryanın necə azad olunması Rusiya Xarici işlər naziri Sergey Lavrovla Ermənistan Xarici işlər naziri Zöhrab Mnatsakanyan arasında keçən ay baş tutan telefon danışığında müəyyənləşib. Erməni mediasında Lavrovun Mnatsakanyanla danışıqlarında Köçəryanın həbsdə saxlanmasına sərt münasibət bildirməsi, rəsmi Ermənistan-Rusiya münasibətlərinin birbaşa Köçəryanın sərbəst buraxılmasına bağlı olması, onun iki dövlət arasında münasibətlərin memarlarından biri adlandırılması iddia olunan yazılar gedib. Zöhrab Mnatsakanyan isə Köçəryanın azad edilməsini Rusiya ilə bir sövdələşmə elementi olaraq istifadə etməyə cəhd edib”.
Məhəmmədəli QƏRİBLİ
