Məlum olduğu kimi, artıq neçə vaxtdır Ermənistan hakimiyyəti İsraildə səfirlik açılması istiqamətində səylərini artırıb. Bununla bağlı Ermənistan və İsrail rəsmiləri arasında görüşlər olub. Ermənistan rəsmiləri və diplomatları İsraildə səfirliyin açılması mümkünlüyünü istisna etməyiblər.
Ermənistan ona görə İsraildə səfirlik açmaq istəyir ki, İsrail-Azərbaycan əməkdaşlığına mane olsun. Çünki İrəvan bu əlaqələrdən narahatdır. İsrailin Azərbaycana müasir silahlar və hərbi texnika satması Ermənistanda böyük təşviş yaradır. Buna görə də Ermənistanın hakimiyyət nümayəndələri İsraildə səfirlik açmaq və bu yolla İsrail-Azərbaycan hərbi əməkdaşlığına mane olmaq istəyirlər.
Lakin müşahidələr göstərir ki, ermənilərin nə etməsindən asılı olmayaraq, İsrail Azərbaycanla əlaqələrə xüsusi önəm verir. Bu baxımdan İsrail Prezidenti Reuven Rivlinin Azərbaycan Prezidenti İlham Əliyevə məktubu diqqəti cəlb edir. Məktubda belə bir hissə var: “Gələn il Azərbaycan və İsrail diplomatik münasibətlərin yaradılmasının 30 illiyini qeyd edəcək. Cənab Prezident, fürsətdən istifadə edib münasibətlərimizdəki bu əlamətdar hadisəni qeyd etmək üçün Sizi İsrail dövlətinə tarixi səfərə dəvət edirəm”. Məktubun ikinci hissəsindəki fikir də maraqlıdır: “Azərbaycanın yaxın gələcəkdə İsraildə səfirliyinin açılmasına səmimi qəlbdən ümid edirəm. Hər iki ölkədə diplomatik nümayəndəliklərin olması münasibətlərimizin möhkəmlənməsi və dərinləşməsi istiqamətində daha böyük addımlar atmağa təkan verəcək və bu da xalqlarımıza böyük fayda gətirəcək”.
Bütün bunlar onu göstərir ki, Ermənistanın İsraildə səfirlik açması istiqamətində, bu ölkə ilə yaxınlamaqla bağlı canfəşanlığına rəğmən, İsrail Azərbaycana daha çox önəm verir. Ermənistan İsraildə səfirlik açsa belə, bu ölkənin Azərbaycanla olan əlaqələrinə mane ola bilməyəcək.
“Hesab edirəm ki, bu ölkədə diplomatik korpusumuz olmalıdır”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu: “Əvvəla İsrail-Azərbaycan əlaqələrinin dərin kökləri var. Məhz iki ölkə arasında dərin münasibətlər səfirlik səviyyəsindən də yüksək səviyyəyə malikdir. Qeyd edim ki, səfirliyin olması bir ölkə ilə münasibətlərin yüksək səviyyədə olması demək deyil. Məsələn, elə ölkələr var, münaqişə vəziyyətindədirlər, amma səfirlikləri fəaliyyət göstərir. Məsələn, Ukrayna və Rusiyada ölkələri təmsil edən səfirliklər fəaliyyət göstərir. Ermənistanın İsraildə səfirlk açmasına gəldikdə isə, bu, iki ölkə arasında əlaqələrin yüksək inkişafına gətirməyəcək. Çünki Ermənistan İsrail üçün əhəmiyyət kəsb edən ölkə deyil. Azərbaycanın müsəlman aləmində yeri, coğrafi yerləşməsi və iki xalq arasında minilliyə dayanan dostluq bu münasibətlərin təməl prinsipləridir. Məhz bu aspektdən yanaşaraq İsrail Prezidentinin İlham Əliyevə məktubunda qeydləri siyasi, tarixi əhəmiyyət daşıyır. Hesab edirəm ki, İsrail bununla Azərbaycana dəyər verdiyinin və bundan sonra da sözügedən münasibətlərdə maraqlı olduğunun mesajını verir. Ermənistan-İsrail əlaqələri, sadəcə, görünütüdür və bu heç bir iqtisadi, mədəni əlaqələrə söykənmir. Hesab edirəm ki, İsraildə diplomatik korpusumuz olmalıdır. İki ölkə arasında diplomatik münasibətlərin 30 illiyi Bakıda İsrail Prezidentinin iştirakı ilə keçirilməlidir. Düşünürəm, belə bir variant ola bilər”.
Vidadi ORDAHALLI
