“Amnesty İnternational” hüquq-müdafiə təşkilatı Azərbaycana yönəlik növbəti qərəzli bəyanat qəbul edib. Bəyanatda iddia edilir ki, guya hakimiyyəti tənqid etdiyinə görə bəzi müxalif düşüncəli şəxslər məcburi qaydada psixiatriya xəstəxanasına yerləşdirilib və daha sonra onlara naməlum narkotik maddələr vurulub.
Bakıda psixiatriya xəstəxanasına yerləşdirilmiş müxalifətçi Aqil Hümbətov guya zorla ora aparılıb. Hakimiyyəti tənqid etdiyinə görə guya xəstəxanaya məcburi qaydada yerləşdirildikdən sonra ona naməlum narkotik maddələr vurublar. Bununla əlaqədar təşkilat psixiatriya xəstəxanasının baş həkimi Ağahəsən Rəsulova və Azərbaycanın ABŞ-dakı səfiri Elin Süleymanova etiraz məktubları yazmağa çağırıb. İddia edilir ki, guya aprel ayından xəstəxana administrasiyası A.Hümbətovun ailəsinə onunla görüşə imkan vermir. Mayın 12-də o, telefonla həyat yoldaşına şikayət edib ki, həkimlər onun iradəsinə zidd olaraq naməlum iynələr vururlar, buna görə də səhhəti pisləşib.
Göründüyü kimi, “Amnesty İnternational” təşkilatı uydurma siyasi motivli fikirlərə əsaslanaraq Azərbaycanı qaralamaqdadır. Düzdür, bu, sözügedən təşkilatın Azərbaycana yönəlik ilk qərəzli açıqlaması deyil. Hər dəfə müxtəlif ittihamlarla çıxış edirlər. Gah deyirlər Azərbaycanda media azadlığı məhdudlaşdırılır, siyasi azadlıqlar boğulur, gah da deyirlər ki, hökumət pandemiyanı bəhanə edib müxalif düşüncəli şəxsləri təqib edir. İndidə belə bir uydurma fikir irəli sürülüb ki, guya hakimiyyəti tənqid etdiyinə görə bəzi müxalif fikirli şəxslər məcburi qaydada psixiatriya xəstəxanasına yerləşdirilir.
“...təşkilatın son bəyanatı tamamilə absurddur”
Məsələyə münasibət bildirən Demokratik Jurnalistlər Liqasının rəhbəri, media eksperti Yadigar Məmmədlinin sözlərinə görə, bu təşkilatların məqsədi yalnız Azərbaycanı ləkələməkdir: “Artıq neçə vaxtdır dünya dövlətləri koronavirus pandemiyası ilə mübarizə aparırlar. Sözügedən bəladan qurtulmaq üçün yollar axtarılır. Ancaq çox təəssüflər olsun ki, insan haqlarının müdafiəsindən danışan bir sıra qurumlar belə vəziyyətdə müəyyən ölkələri qaralamaqla məşğuldurlar. Dəfələrlə bəyan etmişik ki, insan haqları adından danışa təşkilatlar öz təyinatlarına uyğun monitorinq aparmalıdırlar. Həmin monitorinqlərə uyğun hesabat hazırlamalıdırlar. Bu, istər fundamental insan haqları sahəsində olsun, istərsə də söz və mətbuat azadlığı sahəsində öz profilinə uyğun olmaldır. Ancaq çox təəssüf ki, insan haqlarından danışan bir sıra qurumlar bundan sui-istifadə edirlər. Hər vasitə ilə şəxsi maraqlarını, aldıqları sifarişləri önə çəkirlər. Belə qurumlardan biri də “Amnesty İnternational” təşkilatıdır. Bir vaxtlar sözügedən təşkilat insan hüquqlarının qorunması sahəsində hansısa işlər görüb. Ancaq indi adıçəkilən təşkilat yalnız müəyyən dairələrin sifarişlərini həyata keçirməklə məşğuldur. Son dövrlər “Amnesty İnternational” təşkilatı Azərbaycanla bağlı uydurma ittihamlarla çıxış edir. Təsadüfi deyil ki, artıq bu təşkilatın səsləndirdiyi ittihamlar ciddi qəbul olunmur, ritorika ilə qarşılanır. O baxımdan təşkilatın son bəyanatı tamamilə absurddur. Ölkədə siyasi fəaliyyətinə, müxalif düşüncəsinə görə kimsə məcburi qaydada psixiatriya xəstəxanasına yerləşdirilmir”.
Bir daha aydın oldu ki, insan haqlarından danışan bəzi təşkilatların Azərbaycanla bağlı tənqidləri qərəzlidir və ən başlıcası, müəyyən dairələrin siyasi sifarişi ilə ortaya atılır.
Vidadi ORDAHALLI
