Məlum olduğu kimi, Prezident İlham Əliyevlə “Microsoft” şirkətinin vitse-prezidenti Filip Roq, Mərkəzi və Şərqi Avropa bölgəsinin korporativ əlaqələr və hüquqi məsələlər üzrə rəhbəri Nanna-Luize Linde və “Microsoft” şirkətinin digər nümayəndələri arasında videokonfrans keçirilib. Müasir informasiya texnologiyaları sahəsində dünyanın ən nəhəng şirkətlərindən biri olan “Microsoft”la Azərbaycan dövlətinin uğurlu əməkdaşlıq nümunələri mövcuddur.
Qeyd edək ki, mayın 22-də isə “Signify” (əvvəlki adı “Philips Lighting”) şirkətinin təşəbbüsü ilə Prezident İlham Əliyevlə bu şirkətin baş icraçı direktoru Erik Rondolat, MDB üzrə baş meneceri Erik Benedetti və “Signify” rəhbərliyinin digər nümayəndələri arasında videokonfrans keçirilmişdi.
Hər iki şirkətin rəqəmsal texnologiyalar sahəsində məşhur olduğu məlumdur. Bu amil Azərbaycanın rəqəmsal texnologiyalarla gələcək inkişafı üçün nə vəd edir?
İKT üzrə tanınmış mütəxəssis Şaiq Muradov “Bakı-Xəbər”ə bildirdi ki, son zamanlar Azərbaycan dövləti rəqəmsal texnologiyanın ölkəmizdə geniş tətbiqi üçün dünyanın tanınmış aidiyyəti şirkətləri ilə yaxından əməkdaşlıq edir.
Fərqli vaxtlarda “Signify və “Microsoft” şirkətlərinin təmsilçiləri ilə Prezidentin keçirdiyi videogörüşlərin yeni rəqəmsal texnologiyaların Azərbaycana daşınmasına böyük imkan və şərait yaratdığını deyən mütəxəssis hesab edir ki, bu bizə bu sahənin gələcək inkişafı üçün böyük perspektiv vəd edir: “İstənilən böyük texnologiya şirkətlərinin Azərbaycana investisiyası və ya marağı bizim üçün müsbət göstəricidir. Dövrümüzdə texnologiyanın nə dərəcədə əhəmiyyətli olduğu pandemiya zamanında da göründü. Əvvəldən buna hazırlıqlı olan, texnoloji cəhətdən güclü bünövrəsi olan şirkətlər bu dövrdən daha rahat çıxdı. Digər şirkətlər isə texnologiyanın əhəmiyyətinin canlı şahidi oldular. Eyni zamanda, “Microsoft” şirkəti ilə Təhsil Nazirliyinin də əməkdaşlığı sayəsində distant təhsil mümkün oldu. Bu böyük şirkətlərlə sıx əməkdaşlıq həm təhsil, həm səhiyyə, həm də iqtisadiyyat sahələrində müsbət dəyişikliklərə səbəb olacaq. Xarici şirkətlərlə yanaşı, yerli texnologiya şirkətlərinin də böyüməsi üçün təhsil sistemimizdə də texnologiyanın rolu daha da artarsa, düşünürəm ki, bizlər üçün daha faydalı olacaq”.
İradə SARIYEVA
