Özünün bütün nümunəvi davranışları ilə örnəyə çevrilən Prezident İlham Əliyevin Qarabağ bölgəsinə səfəri zamanı açılış mərasimlərində, eləcə də başqa tədbirlərdə ictimaiyyət qarşısına tibbi maskada çıxması, sözün həqiqi mənasında, diqqəti cəlb edib.
Azərbaycan Prezidenti İlham Əliyevin tibbi maskadan istifadəsi bir nümunədir və onun bu addımı cəmiyyətdə maskadan istifadənin necə zəruri olduğunu, onun əhəmiyyətini göstərdi. Əhalinin hazırkı durumda ölkə başçısının maskadan istifadə nümunəsindən yararlanması zərurəti böyükdür.
Prezidentin Tərtərə və Ağcabədiyə səfəri zamanı tibbi maskadan istifadə etməsinin cəmiyyətin bütün sferaları üçün nümunə olduğunu deyən ekspertlərin fikrincə, cəmiyyət Prezidentin bu davranışlarını özünə bir örnək sayır. Ekspertlər qeyd edirlər ki, maskadan istifadə məsələsində Prezident səviyyəsində vətəndaşlara nümunə göstərilməsi olduqca təqdirəlayiqdir. Onlar bildirirlər ki, Qarabağ bölgəsinə səfəri çərçivəsində bütün görüşlərdə tibbi maskadan istifadə edən dövlət başçısı bununla vətəndaşlara “bu məsələdə kimsə istisna ola bilməz və bütün vətəndaşlar bu vacib qərara əməl etməlidir” - mesajını verib.
Əpoş Vəliyev: “Cənab Prezident İlham Əliyev qoruyucu maska taxmaqla həm nümunəvi davranış sərgilədi, həm də bununla yanaşı, cəmiyyətə mesaj verdi ki...”
AMEA Folklor İnstitutunun aparıcı elmi işçisi, filologiya üzrə fəlsəfə doktoru Əpoş Vəliyev baki-xeber.com-a açıqlamasında ölkə başçısının bu nümunəvi davranışının təqdir edildiyini vurğuladı.
“Ölkəmizdə koronavirusun ilk yoluxmaları başlayan gündən ölkə başçısı cənab İlham Əliyev vətəndaşlara müraciət edərək Nazirlər Kabineti yanında Operativ Qərargahın COVID-19-la bağlı bütün qaydalarına riayət etməyə, hər kəsi vətəndaş məsuliyyətini yerinə yetirməyə səslədi. Ölkə başçısı koronavirus pandemiyasının təhlükəli bir bəla olduğunu bilirdi və vətəndaşları qorumaq, pandemiyaya yoluxmamaq üçün vətəndaşlara qoruyucu maskadan istifadəni tövsiyə edirdi. Eyni zamanda, Birinci vitse-prezident Mehriban xanım Əliyeva da Azərbaycan xalqına belə bir müraciət etdi. Vətəndaşlar ölkə başçısının və birinci xanımın çağırışlarına qoşularaq karantin qaydalarına riayət etməyə başladılar. Qısa zamanda ölkəmizdə koronavirusa yoluxanların sağalma sayı xəstələnənlərin sayını üstələdi, yoluxma sayı minimuma enməyə başladı. Amma karantin qaydaları yumşaldılandan sonra vətəndaşlarımız karantin qaydalarına ciddi əməl etməyərək, maskadan istifadəni azaltdılar və qısa zamanda koronavirusa yoluxanların statistikasında ciddi artım oldu. Hazırda bəzi vətəndaşlarımızın məsuliyyətsizliyi sayəsində epidemiyaya yoluxma halı günbəgün artmağa başlayıb.
Ölkə başçısı yoluxmanın hazırkı statistikasından narahatdır. Onun Tərtərdəki və ondan əvvəlki görüşlərdə əhali qarşısına maska ilə çıxması əhaliyə nümunə və mesajdır. Ümumiyyətlə, cənab Prezident İlham Əliyev qoruyucu maska taxmaqla həm nümunəvi davranış sərgilədi, həm də bununla yanaşı, cəmiyyətə mesaj verdi ki, sosial statusundan asılı olmayaraq, hər bir insan qanun qarşısında eyni məsuliyyəti daşıyır və bərabərdir. Vətəndaşlar ölkə başçısından nümunə götürməlidirlər. Hər kəs bilməlidir ki, koronavirusla mübarizəyə dövlət və cəmiyyət birgə qoşulmalıdır. Bilirsiniz, qaydalara hər kəs əməl etməsə, onda pandemiya ilə mübarizə nəticə verməz. Əgər ölkə başçısı maska taxırsa, sosial məsafəni qoruyursa, bütün vətəndaşlar Operativ Qərargahın maskasız daxil olmağı qadağan etdiyi yerlərdə maska taxmalı və karantin qaydalarına ciddi əməl etməlidirlər. Bu bəladan qurtulmağın yeganə yolu dövlət və xalq birliyidir” - deyə Ə.Vəliyev qeyd etdi.
Əkbər Qoşalı: “Dövlət başçısı özü artıq tibbi maskadan istifadə edərək vətəndaşlara həm də bir nümunə göstərmiş oldu”
Azərbaycanda Atatürk Mərkəzinin şöbə müdiri, Milli QHT Forumu İdarə heyətinin üzvü Əkbər Qoşalı baki-xeber.com-a bildirdi ki, Prezident İlham Əliyevin pandemiya dövründə qoruyucu maskadan istifadə edərək nümunəvi davranış sərgiləməsi təqdirəlayiq haldır və eyni zamanda da bu, cəmiyyətə verilən böyük mesajdır. O hesab edir ki, ölkə başçısı yalnız indi deyil, həmişə cəmiyyət, xalq üçün böyük nümunə olub və onun davranışları ictimaiyyət üçün gerçək nümunələrə çevrilib. Ə.Qoşalının sözlərinə görə, hələ pandemiya bitməyib və bu halda insanların Prezidentdən örnək götürərək kütləvi şəkildə maska taxması vacib və zəruridir.
“İlk növbədə, deməliyəm ki, cənab Prezidentin Bakının Qaradağ rayonu ərazisindəki yaşayış kompleksinin açılışında səsləndirdiyi fikirlər və mesajlardan sonra cəbhəyanı bölgəyə səfəri zamanı Tərtərdə, Ağcabədidə, Ağdamda bir sıra əhəmiyyətli obyektlərin açılışında iştirakı çox əhəmiyyətlidir. Bunların hamısı göstərir ki, bütün şərtlərə, şərtsizliklərə, pandemiyanın törətdiyi ciddi problemlərə baxmayaraq, Azərbaycan öz yolu ilə irəliləməkdədir, bu yolun bizi Şuşa, Xankəndinə aparacağı şübhə doğurmur.
Ali Baş Komandanın məhz bu səfərlər, açılışlar fonunda günümüzün ən aktual məsələlərinə diqqət yetirməsi, karantin rejiminə riayət olunmasında özünün nümunə göstərməsi daha böyük bir müzakirə mövzusudur. Ölkəmizdə artıq xeyli müddətdir cənab Prezidentin özünün açılışını etdiyi tibbi maska zavodu fəaliyyət göstərir, iş adamlarımız xaricdən də ölkəyə tibbi maska gətirirlər. Bir sözlə, bizim ölkədə tibbi maska ilə bağlı problem həll olunub. Bu gün vətəndaşların kütləvi surətdə tibbi maskadan istifadə etməsinə ciddi ehtiyac var. Vətəndaşlar cənab Prezidentin bu örnək davranışından nümunə görürməlidirlər və karantin rejimi müddətində bu maskalardan istifadə etməlidirlər. Bilirsiniz ki, karantin qaydaları yumşaldılıb. Ölkəmizdə koronavirusa yoluxanların sayının artması hər birimizi ciddi düşündürür, narahat edir”.
Ə.Qoşalı hesab edir ki, Prezidentin tibbi maska taxması həm də xalqla dövlətin, Prezidentlə xalqın həmrəy olmasının böyük örnəyidir. “Dövlət başçısının bilavasitə atdığı addımlar nəticəsində bir çox ölkə, xüsusən yaxın əlaqədə olduğumuz dövlətlər və qonşu respublikalarla müqayisədə Azərbaycanda vəziyyət çox yaxşı idi. Amma karantin rejiminin yumşaldılmasından sonra görürük ki, bizdə də artıq həyəcan təbili çalmaq ehtiyacı yarana bilər. Biz, əlbəttə, əhalini qorxutmuruq, özümüz də qorxmuruq. Lakin emosiyaya, hissə və həyəcana deyil, elmi yanaşmaya, tibbi prosedura, ümumvətəndaş diqqətinə əsaslanmalıyıq. Bunun da çox sadə bir yolu var - sosial məsafə saxlamaq, tibbi maskalardan istifadə etmək, gigiyenamıza fikir vermək, ehtiyac olmayan yerlərə hərəkətlər etməmək, virtual əlaqəyə üstünlük vermək. Bir müddət sonra, inişallah, bu öz nəticəsini verəcək. Cənab Prezidentin bir çox əməli fəaliyyət sahəsində olduğu kimi, bu sadə yanaşmanın özündə belə şəxsi nümunələr göstərməsi təqdirəlayiqdir. Bu, hər hansı bir bəhanə ilə maska taxmamağa cəhdlər göstərənlərin özlərini də tutduğu yoldan yayındırdı. Dövlət başçısı özü artıq tibbi maskadan istifadə edərək vətəndaşlara həm də bir nümunə göstərmiş oldu. Bu elə bir sadə, həm də eyni dərəcədə vacib yanaşmadır ki, bundan, məncə, təhsil səviyyəsindən, siyasi mövqeyindən, yaşından, statusundan, ölkəmizin, yaxud dünyanın harasında yaşamasından asılı olmayaraq, vətəndaşlarımız, soydaşlarımız nümunə götürməlidirlər. Nəzərə alsaq ki, virusdan qorunmaq sahəsində tibbi maskadan istifadə ən sadə, həm də ən vacib amildir, biz bununla həm özümüzü, həm ailə üzvlərimizi, qohumlarımızı, çevrəmizi, nəticə etibarilə, cəmiyyətimizi, xalqımızı və bəşəriyyəti qorumağa xidmət etmiş oluruq. Təsəvvür edin ki, bir adamın diqqətsizliyi nəticəsində virus həndəsi silsilə ilə yayılır. Bunun qarşısında durmaq çox çətin olar. Ona görə də mən bir vətəndaş olaraq, yazar olaraq, mənim fikirlərimi oxuyan, duyan, sözümə sayğı göstərən hər kəsə səslənirəm, bütün insanlarımızı təhlükələrdən qorunmağa və cəmiyyəti qorumağa çağırıram” - deyə Ə.Qoşalı qeyd etdi.
İradə SARIYEVA
