07/07/2020 00:34
728 x 90

Ermənistan hər milyon nəfər hesabı ilə koronavirusdan ölüm sayına görə dünyada birinci yerdə - Erməni mediası Paşinyanı söküb-tökdü...

Məhəmməd Əsədullazadə: “Bütün bunlar işğalçı ölkə üçün ciddi fəlakət vəd edir”

img

Sərhədlər bağlıdır. Təyyarələr uçmur. Qatarlar işləmir. Daha heç yerə yol yoxdur. Bu barədə Naira Ayrumyan Ermənistanın Lragir.am nəşrindəki məqaləsində yazıb.

Müəllif qeyd edir ki, Ermənistan milyon nəfərə düşən koronavirusdan ölüm nisbətinin artması baxımından dünyada birinci yerdədir, yoluxmuş insanların sayının artması baxımından isə beşincidir: “Ermənistan artıq koronavirusla mübarizə, sosial və iqtisadi dəstək üçün təxminən 100 milyard dram xərcləyib və yeni bir karantin üçün kifayət qədər vəsaitin olub-olmadığı məlum deyil. Dünya açılır, ancaq məlum olur ki, Ermənistan ümidsiz halda ölənlərin sayına görə geridə qalır. Məsələn, Gürcüstan virusa yoluxanların çoxluğuna görə Ermənistanla sərhədi açmaqdan nəzakətlə imtina etdi. Ancaq ən pisi odur ki, ölkədə narazılıq və anlaşılmazlıq artır. Belə hallarda, ermənilər həmişə gedirdilər, amma indi sərhədlər bağlanıb və dünyadakı vəziyyət buna imkan vermir”.

O, yazısında xüsusi qeyd edib ki, kömək gözləmək üçün heç bir yer yoxdur: “Avropa ermənilərdən imtina etdi, hətta erməni aviaşirkətini qara siyahıya aldı. Rusiya da “vintləri sıxır”. 2020-ci ilin birinci rübündə 2019-cu ilin eyni dövrü ilə müqayisədə  Ermənistan vətəndaşları tərəfindən alınan köçürmələr 9,68% azalaraq 353.56 milyon dollar təşkil etdi. Bununla yanaşı, Rusiyadan köçürmələr 15,98% azalıb, mart ayında isə azalma 28.15% olub. Mart ayında Ermənistandan ABŞ-a və digər ölkələrə köçürülən vəsaitlərin miqdarı azaldı və Rusiyaya köçürülən pulun miqdarı isə 36,04 milyon dollar təşkil edərək 32,06% artdı. Ümumiyyətlə, günahlandırmaq üçün heç bir yer yoxdur”.

Görünən odur ki, Ermənistan çıxılmaz bir bataqlığa düşüb. Belə gedərsə, Ermənistanın bundan çıxacağı mümkün görünmür.

  • “Erməni ekspertlərin açıqlamalarından belə məlum olur ki, artıq əhali gündəlik çörəyə belə möhtac qalacaq”

Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Ermənistan uçuruma yuvarlanır: “Ermənistanda iqtisadi vəziyyətin ağırlaşması hər keçən gün daha da artır. Blokada və pandemiya ilə əlaqədar xaricdən pul köçürmələrinin həcmi azalmaqda davam edir. Hesab edirəm ki, bütün bunlar işğalçı ölkə üçün ciddi fəlakət vəd edir. Erməni ekspertlərin açıqlamalarından belə məlum olur ki, artıq əhali gündəlik çörəyə belə möhtac qalacaq. Həqiqətən də Ermənistanda vəziyyət buna doğru gedir. Nikol Paşinyanın apardığı siyasi xətt heç də iqtisadi islahatları özündə ehtiva etmədi. Yalnız hədəf olaraq “Qarabağ klanı”nın vurulması və köhnə hakimiyyət üzvlərinin təqibi oldu. Ona görə də iki il inqilabdan keşməsinə baxmayaraq, heç bir iqtisadi konsepsiya oratada yoxdur. Yalnız populizm və boş vədlər ictimaiyyətə təbliğ edilir. Rusiya, Avropa və ABŞ-da erməni lobbisi, iş adamları Paşinyana etibar etmirlər. Onun hakimiyyətinə vəsait ayırmırlar. Belə olan təqdirdə iqtisadi böhran və inflyasiya dərinləşir, sosial layihələr reallaşmır. Ermənistanı daha da ağır sosial problemlər gözləyir. Pandemiyadan sonra erməni əhalisi yenidən küçələrə çıxaraq etiraz edib çörək istəyəcək. Paşinyan erməniləri çörəklə sınağa çəkəcək. Bu da ölkədə siyasi vəziyyəti gərginləşdirəcək”.

Vidadi ORDAHALLI

Son xəbərlər