Prezident İlham Əliyev iyunun 3-də Ağcabədidə “ASAN Həyat” kompleksinin açılışında çıxışı zamanı bildirib ki, “ASAN xidmət” sadəcə bir xidmət mərkəzi deyil, tamamilə yeni bir təfəkkürün ortaya qoyulması, ictimai münasibətlərdə tamamilə yeni fəlsəfənin tətbiq edilməsidir:
“Ölkəmizin müasir inkişafı ilə tam uzlaşan bir təşəbbüsdür, böyük bir layihədir. Bunun çox böyük ictimai mənası var. Əlbəttə ki, burada işləyən insanlar öz xidmətləri, öz işləri ilə “ASAN xidmət”i bu yüksək səviyyəyə qaldırdılar. Çünki hətta ən yaxşı bir layihə, ən yaxşı bir təşəbbüs əgər düzgün icra edilmirsə, onun səmərəsi olmur”.
Prezident vurğulayıb ki, “ASAN xidmət” mərkəzlərində işləyənlərin mütləq əksəriyyəti, demək olar ki, hamısı gənclərdir, o cümlədən könüllülər bütün mərkəzlərdə fəaliyyət göstərirlər:“Mənə verilən məlumata görə, Ağcabədi “ASAN xidmət” mərkəzində 200-dən çox işçi və 45 könüllü fəaliyyət göstərəcək. Əslində, Azərbaycanda könüllülər hərəkatı “ASAN xidmət”dən başlamışdır. O vaxta qədər Azərbaycanda könüllülər hərəkatı olmamışdır. “ASAN xidmət”dən sonra digər sahələrdə də könüllülər fəaliyyətə başladılar. O cümlədən, ölkəmizdə keçirilmiş böyük beynəlxalq idman yarışlarında – Avropa və İslam Həmrəyliyi oyunlarında könüllülər böyük xidmət göstərmişlər. Könüllülərsiz biz bu böyük yarışları keçirə bilməzdik. Bu gün mənim göstərişimlə digər sahələrdə də könüllülər fəaliyyət göstərir. Mən göstəriş vermişəm ki, dövlət təşkilatlarında, nazirliklərdə, dövlət şirkətlərində könüllülər işə cəlb edilsin, onlar təcrübə keçsinlər. Çünki bugünkü könüllülər sabahın rəhbərləridir. Təsadüfi deyil ki, mənim Sərəncamımla bu il “Könüllülər ili” elan edilmişdir. Bu bir daha bizim könüllülərin fəaliyyətinə göstərdiyimiz diqqəti və münasibəti əks etdirir”.
Ölkə başçısının qeyd etdiyi “Asan Xidmət”i ictimai münasibətlərin yeni fəlsəfəsinə çevirən əsas əlamətlər hansılardır?
İqtisadçı ekspert Günay Hüseynova “Bakı-Xəbər”ə açıqlamasında bildirdi ki, bu yenilik doğrudan da ictimai münasibətlərdə yeni yanaşmanı ortaya qoydu: “Bizim cəmiyyətdə hansısa sənədi düzəltmək, hardansa qeydiyyatdan çıxıb, harasa qeydiyyata düşmək və başqa sənədləşmə işləri çətin keçilən sədd kimi qəbul edilirdi. Bu yöndə vətəndaşlarımız süründürməçiliklə üzləşirdi. Belə amillərdən yaxa qurtarmaq üçün bəzən insanlar qanuni işlərinin düzəlməsi üçün də arada olan vasitəçilərə “xidmət haqqı” ödəməyə məcbur qalırdılar. Bütün bunlar da haqlı olaraq vətəndaş narazılığına səbəb olurdu. Bu yeniliyin bizə həm də iqtisadi faydası dəyir. Çünki müasir dövrdə iqtisadiyyatın inkişaf edən sahələrindən biri də xidmət sektorudur. Cənab Prezident İlham Əliyev 3 iyun tarixində Ağcabədi “Asan Xidmət “ Mərkəzinin açılışı zamanı da bildirdi ki, bu sahə təkcə xidmət sahəsi deyil, həm də ictimai münasibətlərdə yeni fəlsəfənin tətbiq edilməsidir. İctimai münasibətlərin yeni fəlsəfəsi cəmiyyətin, vətəndaşın prioritedir. Dünyanın inkişaf etmiş ölkələrində olduğu kimi, Azərbaycanda da xidmət sahələri yüksək inkişaf mərhələsinə çatıb. Xidmət sahəsi faydalı effektə malik olan və insanın hər hansı bir tələbatını ödəyən əmək fəaliyyətinin nəticəsidir. Belə xidmət sahələrindən ən öndə olanı məhz “ASAN Xidmət”dir. 2012 - ci ildən fəaliyyət göstərən “ASAN Xidmət” mərkəzlərinə indiyə kimi 40 milyondan çox müraciət daxil olub. “ASAN Xidmət” mərkəzlərinin açılması korrupsiya, rüşvətxorluq, özbaşınalığa qarşı mübarizə metodlarından ən effektlisi olduğunu üzə çıxardı. Vətəndaşların əlavə xərclərinin və vaxt itkisinin azaldılması, dövlət strukturlarına etimadın gücləndirilməsi, şəffaflığın olması baxımından olduqca əhəmiyyətlidir. Bu mərkəzlərin fəaliyyəti iqtisadi baxımdan faydalıdır. İşsizliyin müəyyən qədər aradan qaldırılması, dövlət büdcəsinə daxilolmalar baxımından iqtisadi effektə malikdir. Təsəvvür edin ki, kimsə xaricə tez bir zamanda getmək üçün pasportunu dəyişmək istəyir. Bunun üçün müxtəlif zamanlara görə fərqli rüsumlar təklif edilir. Sənədi daha operativ düzəltmək istəyən əlavə rüsum ödəməklə istəyinə nail olur. Əvvəl isə bu işi müəyyən “qanorar”ın müqabilində vasitəçilər görürdü. Rüsum kimi ödənilən pul dövlət büdcəsinə gedirsə, dəlallar vasitəsilə həyata keçirilən əməliyyatlardan əldə edilən vəsait şəxsi ciblərə axırdı. Bax, budur “ASAN Xidmət”in əsl mahiyyəti”.
Məhəmmədəli QƏRİBLİ
