Zamin Axundlu:”Bu hal yeni Ermənistan hakimiyyətinin də korrupsioner, cinayətkar mahiyyətli olmasına qəti şübhə yeri qoymur”
Ermənistanın Vatikandakı keçmiş səfiri Mikael Minasyan baş nazir Nikol Paşinyan barəsində ifşaedici çıxışlarından sonra istefalar başlayıb. Minasyan Paşinyanı siqaret, brilyant və silah qaçaqmalçılığında günahlandırıb, bu yöndə sensasion məlumatlar açıqlayıb.
Minasyanın sözlərinə görə, Paşinyan mayın 23-də özünün hərbi müşaviri, Ermənistan Müdafiə Nazirliyinin Kəşfiyyat idarəsinin keçmiş rəisi Arşak Karapetyanı gizlicə Rusiyanın Voronej şəhərinə ezam edib:“Məqsəd Nikol Paşinyan və onun ailəsi ilə bağlı ən iri qalmaqalı yatırmaqda kömək etməkdir. General Karapetyan Voronejdə Rusiya xüsusi xidmət orqanlarının əməkdaşları ilə danışıqlar aparıb, Paşinyan və ailəsi barəsində tütün qaçaqmalçılığı üzrə cinayət işi qaldırılmamasını xahiş edib”.
Bunun ardınca Ermənistan Dövlət Gəlirləri Komitəsinin (DGK) sədri David Ananyan istefa verib.
Erməni KİV-nin verdiyi məlumata görə, o, istefa ərizəsini baş nazir Nikol Paşinyana təqdim edib:“Mediada yayılan şayiələrə son qoymaq üçün bildirmək istəyirəm ki, işdən azad olunmaq barədə ərizəmi təqdim etdim”. Qeyd edək ki, David Ananyan DGK-nın rəhbəri vəzifəsinə 18 may 2018-ci ildə təyin edilib. O, keçmiş baş nazir Karen Karapetyanın biznesdən gətirdiyi mütəxəssislərdən biridir. Erməni KİV-i qeyd edir ki, Ananyanın Ermənistan Dövlət Gəlirləri Komitəsinin rəhbəri vəzifəsindən istefası çoxları üçün sürpriz olub. Maraqlıdır ki, hər şey haqqında dərhal açıqlama verməkdən çəkinməyən baş nazir Nikol Paşinyan bu istefaya hələ münasibət bildirməyib.
Yerli media isə Ananyanın qərarını respublikadakı son siqaret qaçaqmalçılığı ilə əlaqələndirir. Aprelin sonlarında Federal Təhlükəsizlik Xidməti gömrük və sərhəd xidmətləri ilə birlikdə Krasnodarda Ermənistan Fövqəladə Hallar Nazirliyinin 40 ton siqareti tranzit olaraq daşıdığı bildirilən hava gəmisini saxlamışdı. Sonra mediada Voronejdə böyük partiya erməni siqaretinin tutulması barədə məlumat yayıldı. Paşinyanın siyasi opponentləri iddia edirlər ki, Ermənistan hökuməti başçısının ətrafında olan bəzi şəxslər “istehlak malları” adı altında siqaret qaçaqmalçılığında iştirak ediblər. Bu fakt Paşinyan hakimiyyətinin həm də korrupsioner, qaçaqmalçı mahiyyətini ortaya qoymuş olurmu?
Politoloq Zamin Axundlu “Bakı-Xəbər”ə açıqlamasında bildirdi ki, bu məsələ Ermənistan gündəmində müzakirə olunurdu:“İttihamları səsləndirən şəxs isə Ermənistanın Vatikandakı keçmiş səfiri idi. O, konkret faktlar əsasında Paşinyanın siqaret və silah qaçaqmalçılığı ilə məşğul olduğunu bəyan etmişdi. Əslində, burada təəccüblü olan nəsə yoxdur. Çünki Ermənistandakı hakimiyyətlərin hamısı belə cinayətkar bizneslərin hesabına varlanıblar. Bunu elə indiki hakimiyyətin özü də sübut edir ki, ölkəni indiyə kimi idarə edənlər cinayətkar olub. Az qala 20 il ölkəni idarə edən adamların taleyinə baxın. Robert Köçəryan türmədə cəza çəkir, digər eks prezident Serj Sarkisyana cinayət işi qaldırılıb, ölkədən çıxışına qadağa qoyulub. Deməli, Ermənistan indiyə kimi cinayətkar mahiyyətli adamlar tərəfindən idarə edilib. Bunu biz bilirik, amma hazırkı erməni hakimiyyəti məlumatı öz əməlləri ilə təsdiq edir. İndiki hakimiyyətin də sələflərinin yolunu getdiyinə şübhə yeri qalmır. Bu istefa bir daha sübut etdi ki, Paşinyanın deyilən qaçaqmalçılıqda əli var. Ola bilər, Paşinyan yüksək çinli məmuru istefaya məcbur edib ki, diqqəti özündən yayındırsın. Çox güman ki, bir müddət sonra elə bu məmurun özü açıqlama verib, bütün detallara aydınlıq gətirəcək. Analoji hadisələri biz Paşinyan hakimiyyəti dönəmində artıq görmüşük. Bu hal yeni Ermənistan hakimiyyətinin də korrupsioner, cinayətkar mahiyyətli olmasına qəti şübhə yeri qoymur”.
Məhəmmədəli QƏRİBLİ
