15/07/2020 05:51
728 x 90

Azərbaycanın heç vaxt indiki qədər olmayan gücü, müstəqilliyi və azadlığı – Prezident nələri nəzərdə tutur...

Seyid Camal Əzimbəyli: “Reallıq ondan ibarətdir ki, dünya gücləri ölkəmizlə hesablaşırlar”

img

“Mən tam əminliklə deyə bilərəm ki, Azərbaycan tarixdə heç vaxt indiki qədər güclü, indiki qədər müstəqil və azad olmamışdır”.

Məlum olduğu kimi, bunu Prezident İlham Əliyev Tərtər Olimpiya İdman Kompleksi ilə tanışlıqdan sonra rayonun bir qrup idmançısı ilə görüşündə çıxışı zamanı deyib.

Ölkə başçısının fikrincə, Azərbaycanın bölgələrində idman qurğularının tikintisi geniş vüsət alıb: “Hesab edirəm ki, Azərbaycan bu parametr üzrə dünya miqyasında qabaqcıl yerlərdədir. Bölgələrdə tikilmiş Olimpiya komplekslərinin sayı artıq 46-ya çatıbdır. Onu da bildirməliyəm ki, 5 rayonda Olimpiya İdman komplekslərinin tikintisi davam edir. O layihələr də başa çatandan sonra, ümumiyyətlə, rayonlarda 51 idman kompleksimiz olacaqdır”.

Prezident onu da qeyd edib ki, bütövlükdə ölkəmizin idman infrastrukturu istənilən beynəlxalq yarışın keçirilməsi üçün imkan yaradır:“Bakı şəhərində artıq iki çox böyük beynəlxalq idman yarışı keçirilib. Deyə bilərəm ki, Yay Olimpiya Oyunlarından sonra öz miqyasına görə Avropa Oyunları ikinci yeri tutur. Bildiyiniz kimi, Avropa Oyunları heç vaxt tarixdə keçirilməyib və birinci Avropa Oyunları məhz Azərbaycanda keçirilib. Çünki bir çox ölkələr bundan imtina edib, çünki bu bir yenilik idi. Bu gün müasir və müstəqil Azərbaycan dövləti ən yüksək zirvədədir. Mən tam əminliklə deyə bilərəm ki, Azərbaycan tarixdə heç vaxt indiki qədər güclü, indiki qədər müstəqil və azad olmamışdır”.

Bütün bunlarla yanaşı, ölkə başçısı “Azərbaycan tarixdə heç vaxt indiki qədər güclü, indiki qədər müstəqil və azad olmayıb” deməklə nələri nəzərdə tutur?

  • “Prezidentin apardığı uğurlı siyasət nəticəsində böyük güc mərkəzlərinin maraqları Azərbaycanda toqquşmur”

Məsələyə münasibət bildirən şərqşünas Seyid Camal Əzimbəylinin sözlərinə görə, burada bir sıra məqamlardan söhbət gedir:“Əvvəla, Azərbaycan 90-cı illərin əvvəllərindəki ölkə deyil. Ötən illər ərzində ölkə xeyli güclənib. Xüsusən də İlham Əliyev prezident seçiləndən sonra Azərbaycanın qüdrəti daha da artıb. Ölkədə infrastruktur əsaslı şəkildə yenilənib. Əhalinin həyat səviyyəsi, rifahı əhəmiyyətli dərəcədə yaxşılaşıb. Böyük enerji və nəqliyyat layihələri reallaşdırılıb. Azərbaycan regionda arbitr rolunu oynayır. Ötən illər ərzində ordumuzun döyüş qabiliyyəti artıb. Silahlı Qüvvələrimiz ən müasir silahlarla təchiz olunub. 2016-cı ilin aprelində ordumuz cəbhədə bir sıra uğurlara imza atdı. Azərbaycan bir sıra beynəlxalq tədbirlərə uğurla ev sahibliyi edir. Artıq beynəlxalq tədbirlərin ölkəmizdə keçirilməsi ənənə halını alıb. Reallıq ondan ibarətdir ki, dünya gücləri ölkəmizlə hesablaşırlar. Prezident İlham Əliyevin apardığı uğurlı siyasət nəticəsində böyük güc mərkəzlərinin maraqları Azərbaycanda toqquşmur. Koronavirus pandemiyası ilə əlaqədar əksər dünya ölkələri beynəlxalq maliyyə qurumlarına yardım üçün müraciət edib. Azərbaycan isə indiyə qədər belə bir müraciət etməyib. Əksinə, dövlətimiz bir sıra ölkələrə yardım edir. Hesab edirəm ki, bu və digər məsələlər Azərbaycanın gücünü, müstəqilliyini xeyli artırıb”.

Vidadi ORDAHALLI

Son xəbərlər