Prezident İlham Əliyev iyunun 3-də Tərtər Olimpiya İdman Kompleksi ilə tanışlıqdan sonra rayonun bir qrup idmançısı ilə görüşündə çıxışı zamanı indiki Ermənistanın tarixi Azərbaycan torpaqlarında yaradılmasından danışıb:
"İndiki Ermənistan ərazisində tarixi Azərbaycan adları, şəhərlərin, kəndlərin adları dəyişdirilib. Bu adlar neçənci ildə dəyişdirilib? Ona görə biz deyəndə ki, indiki Ermənistan tarixi Azərbaycan torpağında yaradılıb, tam həqiqəti deyirik. Biz yaxşı bilirik ki, ermənilər bizim torpağımıza, o cümlədən indiki Ermənistan ərazisinə XIX əsrin əvvəllərində köçürülüblər, Rus-İran müharibəsindən sonra. Tərtərlilər yaxşı bilirlər və Azərbaycan xalqı da bilir ki, 1978-ci ildə keçmiş Dağlıq Qarabağ Muxtar Vilayətinin ərazisindəki kəndlərin birində ermənilərin bu bölgəyə gəlməsinin 150 illiyini əks etdirən abidə ucaldılıb. 1978-ci ildən 150 ili çıxın, deməli 1828-ci ildə gəliblər. Müharibə başlayan kimi o abidəni dağıdıblar, amma onun qalıqları qalıb və indi istənilən adam gedib baxa bilər. Onun şəkillərini də göstərmək lazımdır. Onlar gəlmədirlər, Şərqi Anadoludan və İrandan bizim torpaqlarımıza köçürülüblər. Bu proses XIX əsrin əvvəllərindən başlanmışdır və sonralar daha geniş vüsət almışdır. Mən deyəndə ki, İrəvan bizim qədim torpağımızdır, tam həqiqəti deyirəm. Bunu hər kəs bilir. Əgər belə olmasaydı, Azərbaycan Demokratik Respublikası nə üçün onda qərar qəbul edib ki, İrəvanı Ermənistana versin, bağışlasın. Özü də nə vaxt? Müstəqillik elan olunandan bir gün sonra. Müstəqillik 1918-ci il mayın 28-də elan edilib. 1918-ci il mayın 29-da isə qərar qəbul edilib, özü də yekdilliklə yox. Bu qərarın əleyhinə çıxanlar da olubdur, amma onların rəyi nəzərə alınmayıb. Azərbaycan Demokratik Respublikası tərəfindən qərar qəbul edilib ki, İrəvan Ermənistana bağışlansın, verilsin. Bunu unutmaq olmaz və bunu bağışlamaq da olmaz. Hər kəs bunu bilsin. Guya ki, bundan sonra Ermənistan Azərbaycana qarşı digər iddialarından əl çəkəcəkdi. Amma əl çəkdimi? Yox! Bizim qədim diyarımız Zəngəzur da Ermənistana verildi. Zəngəzurun verilməsi ilə böyük türk dünyasında coğrafi parçalanma baş verdi, Azərbaycanın əsas hissəsi Türkiyə ilə sərhəddən məhrum edildi. Bizim Türkiyə ilə sərhədimiz yalnız Naxçıvan Muxtar Respublikasındadır. İrəvan onlara veriləndən sonra ermənilər öz iddialarından əl çəkdilərmi?
Dağlıq Qarabağ münaqişəsi. Yenə də torpaq iddiası. Əl çəkdimi? Kim əsaslandıra bilər ki, azərbaycanlıların tikdikləri İrəvan - qədim şəhərimiz Ermənistana verilsin. Kim bunu əsaslandıra bilər? Hansı adam? Qoy dursun, desin mən hesab edirəm ki, Azərbaycan Demokratik Respublikası düz edib bu işi görüb. Qoy desin. Ona görə, bilirsiniz, mifologiyaya düçar olmaq ən axırıncı şeydir. Siz gənclər, bütün gənclər tarixi olduğu kimi bilməlisiniz. Onu da bildirməliyəm. Bu hadisə 1918-ci ildə baş verib. Ancaq ilk dəfə bu tarixi faktla bağlı məsələni mən qaldırdım. Mənə qədər heç kim bunu qaldırmayıb. Bizim tarix kitablarımızda buna rast gəlmək bəlkə nadir hallarda mümkündür. Sanki belə bir fakt olmayıb. Mən bunu qaldırdım. Müxtəlif kürsülərdən, o cümlədən xaricdə olarkən qaldırdım və dedim ki, bu bizim şəhərimizdir, bizim torpağımızdır. Hər kəs tarixini bilməlidir”.
Göründüyü kimi, artıq necənci dəfədir ki, Prezident Ermənistan dövlətinin tarixi Azərbaycan ərazilərində yaradıldığını konkret faktlarla sübut edir. Ermənistan təcavüzünün ifşasında Prezident Əliyevin bu yöndə olan bəyanatının gücünü necə qiymətləndirmək olar?
Tarix üzrə fəlsəfə doktoru Səyyar Əliyev “Bakı-Xəbər”ə açıqlamasında bildirdi ki, ölkə başçısı bu ciddi mövzuya necənci dəfədir müxtəlif tədbirlərdəki çıxışları zamanı toxunur:“Hazırkı Ermənistanın tarixi Azərbaycan torpaqlarında qurulmuş dövlət olması elementar tarixi bilikləri olan adam üçün də aydındır. O qədər də uzaq keçmişi əhatə etməyən bu reallığı təkzib etmək mümkün deyil. Prezident İlham Əliyev bundan əvvəlki çıxışlarında da qeyd etmişdi ki, bizim tarixi torpaqlarımız İrəvan xanlığıdır, Zəngəzur, Göyçə mahallarıdır. Bu hər bir azərbaycanlının bilməsi vacib olduğu tarixi gerçəkliklərdəndir. Prezidentin İrəvan xanlığı ilə bağlı həqiqətlərin dünyaya çatdırılmasının vacibliyini bildirməsi hər bir azərbaycanlını, planetin harasında yaşamasından asılı olmayaraq, bu istiqamətdə koordinasiyalaşmış şəkildə fəaliyyət göstərməsini zəruri edir.
Ermənistanın ərazisi tarixi Azərbaycan dövlətləri və xanlıqlarının tərkibinə daxil olub. Bu dövlətlərə nəzər salarkən İrəvan şəhərinin və ətraf ərazilərin etnik tərkibinin hansi qruplardan ibarət olması, orada yaşayan əhalinin hansı dinə qulluq etməsi və danışdıqları dil heç kimdə şübhə oyatmır”.
Tarixçi alimin sözlərinə görə, ermənilər hər yerdə olduğu kimi, bu istiqamətdə də tarixin saxtalaşdırılmasına çalışırlar:“2018-ci ildə İrəvan şəhərinin 2800 illiyini qeyd etmələri onların növbəti tarixi uydurmalarından biridir. Bununla da onlar növbəti dəfə özlərinin guya qədim dövlətçilik ənənələrinə və mədəniyyətə sahib olduqlarını bildirmək istəyirlər. Bununla da ermənilər dünyaya bəyan edirlər ki, İrəvan şəhəri, hətta qədim Romadan da 30 yaş "böyük" imiş. Bütün bunlar bir daha sübut edir ki, ermənilər saxtakarlıqla, kimlərəsə arxalanaraq özlərinə dövlət yaradıblar. Məhz həmin irsin davamı olaraq onlar sonra da zaman-zaman Azərbaycan torpaqlarını ilhaq ediblər. Onların tarixi işğalçılıq, saxtakarlıq sifətlərini dünyaya çatdırmaq baxımından Prezidentin çıxışını çox əhəmiyyətli sayıram. Prezidentin bu yöndə olan çıxışını biz bir tezis olaraq dünyada təbliğ etməliyik”.
Məhəmmədəli QƏRİBLİ
