15/07/2020 05:17
728 x 90

İsrail iki il əvvəl Azərbaycana satdığı raketləri indi sınaqdan keçirir? - Yeni erməni təxribatının mahiyyəti...

İbrahim Rüstəmli: “Ermənilərin İsraillə bağlı yaydıqları məlumat Azərbaycanın informasiya cəbhəsindəki mövqeyini sarsıltmağa yönəlib”

img

İsrailin "Israel Aerospace Industries" konserni yaxınmənzilli ballistik raketləri sınaqdan keçirib. İki ballistik raket dənizdə hədəfləri uğurla vura bilib. Onlardan biri 90 kilometr, digəri isə 400 kilometr məsafədə hədəfləri yüksək dəqiqliklə vurub. Şirkətdən qeyd ediblər ki, raketlər təhlükəsizlik baxımından dənizdə sınaqdan keçirilib.

Qeyd edək ki, "LORA" raket kompleksi "Israel Aerospace Industries" tərəfindən istehsal edilib. Raket kompleksinin sınağı ilk dəfə 2017-ci ildə baş tutub.

Maraqlıdır ki, erməni təbliğat maşını bu informasiya ilə də öz məqsədləri üçün manipulyasiya etməyə çalışır. Onlar qeyd edirlər ki, Azərbaycanın İsraillə hərbi sahədə ciddi əməkdaşlığı var və hazırda sınaqdan keçirilən raketlər iki il əvvəl Azərbaycana satılıb. Bu xüsusda erməni KİV-nin  təxribat yaratmaq istədiyi başlıca istiqamət budur ki, güya İsrail Azərbaycana satdığı silahların sınağını hələ indi keçirir. Bu məntiqlə demək istəyirlər ki, İsrail Azərbaycana sınaqdan keçməyən silah satıb. Ermənilərin bu yeni təxribatının mahiyyəti nədən ibarət ola bilər?

Ehtiyatda olan polkovnik-leytenant, hərbi ekspert İbrahim Rüstəmli “Bakı-Xəbər”ə açıqlamasında bildirdi ki, bütün bunlar Ermənistan təbliğat maşınının Azərbaycana qarşı apardığı hibrid informasiya müharibəsinin tərkib elementləridir:“Müharibə şəraitində yaşayan ölkə bu cür informasiya təxribatlarına daim hazır olmalıdır. Biz İsraillə hərbi sahədə əmkadaşlıq ediriksə, bu o demək deyil ki, aldığımız silahlarla bağlı Ermənistanın dolğun məlumatı olur. Qətiyyən belə deyil. Bununla Ermənistan informasiya blefi edir. Soyuq müharibə pik həddə çatıb. Ermənistan bütün vasitələrlə çox aktiv şəkildə hücuma keçib. Azərbaycanın xeyrinə olan istənilən məsələni hədəfə götürüb, ona uyğun təxribatlar həyata keçirirlər. Biz də çalışmalıyıq ki, informasiya cəbhəsində boşluqlar buraxmayaq. Azərbaycan tərəfinin həm diplomatik, həm də hərbi sahədə ciddi uğurları var. Biz öz torpaqlarımızı işğaldan azad etmək üçün ardıcıl iş aparırıq. Ordunun yeni silahlarla təchiz edilməsi də bu siyasətin tərkib komponentidir. Cənab Prezidentin atdığı addımlar bizim bütün istiqamətlər üzrə mövqeyimizin güclü olduğunu göstərir. Bir faktı da qeyd edim ki, müharibə şəraitində olan ölkədə heç vaxt daimi rahatlıq olmur. Bu, tam qələbəni əldə edəndə təmin olunur. Biz bu qələbəni əvvəlcə informasiya cəbhəsində qazanmalıyıq, sonra Azərbaycan əsgəri öz sözünü deməlidir. Hazırda bizim ordumuz Ermənistanı bütün parametrləri üzrə dəfələrlə üstələyir. Bu müqayisəni etmək belə gülüncdür. İnformasiya sahəsində isə görməli olduğumuz işlər çoxdur. Biz erməni təbliğatının yaydığı bütün informasiyalara dərhal reaksiya da verməməliyik. Çünki onların istəyi də budur ki, tirajladıqlarına reaksiya verilsin. Təəssüflər olsun ki, bizim ölkədə son vaxtlar müharibə ilə bağlı populist çıxışlar çoxalıb. Əksər hallarda müharibənin nə olduğunu bilməyənlər belə müharibə anonsu verirlər. Bu yöndə səslənən fikirlər bəzən  bizim əleyhimizə işləyir. Bu kampaniyanı  düzgün reallaşdırmaq üçün düşünülmüş təbliğat  aparmalıyıq. Ermənilərin İsraillə bağlı yaydıqları məlumat  Azərbaycanın informasiya cəbhəsindəki mövqeyini sarsıltmağa yönəlib. Bu, çoxgedişli, müxtəlif kombinasiyalı prosesdir. Bir niyyəti də Azərbaycanla müttəfiqlərinin arasını korlamağa istiqamətlənib. O qədər zərgər dəqiqliyi ilə bu məsələyə yanaşmalıyıq ki, hansısa fakt bizim əleyhimizə işləməsin. Azərbaycan kimdən hansı silahları aldığının fərqindədir. Bunun üçün narahatlığa əsas görmürəm”.

Məhəmmədəli QƏRİBLİ

Son xəbərlər