Paşinyanın xarici siyasətdə analoqsuz fiaskosu - Avroməkanda Ermənistan təyyarələrinin uçuşu yasaqlandı...
Avropa Komissiyası Ermənistan aviaşirkətlərinə məxsus təyyarələrin Avropa İttifaqına üzv olan ölkələrin ərazisi üzərindən bütün uçuşlarını qadağan edib. Bu barədə Avropa İttifaqının Avropa üzrə nəqliyyat komissarı Adina Valean bildirib.
Avropa Komissiyasının “qara siyahısı"na Ermənistanın “Aircompany Armenia”, “Armenia Airways”, “Armenian Helicopters”, “Atlantis Armenian Airlines”, “Atlantis European Airways”, “Mars Avia” və “Skyball” şirkətləri daxil edilib. Qadağa şirkətlər beynəlxalq təhlüksizlik üzrə standartlara uyğun fəaliyyət göstərmədikləri üçün tətbiq olunub.
Hazırda bu siyahıda dünyanın müxtəlif ölkələrinin yüzə yaxın aviaşirkətinin adı var. Bildirilib ki, Avropa İttifaqının ilk belə “qara siyahısı” 2006-cı ildə tərtib olunub. Həmin dövrdə siyahıya, əsasən Afrika ölkələrinin 90-dan çox aviaşirkətinin adı salınıb. Bunlar Konqo Demokratik Respublikası, Ekvatorial Qvineya, Liberiya, Sudan və başqa ölkələrə məxsus şirkətlərdir. Siyahı ildə iki dəfə Avropa İttiifaqındakı hava limanlarında aviaşirkətlərin təyyarələrinə baxış zamanı aşkarlanan nasazlıq və çatışmazlıqlara əsasən yenilənir.
Avropa Birliyinin bu qərarı Paşinyanın xarici siyasət kursunun növbəti fiaskosu kimi dəyərləndirilə bilərmi?
Politoloq Yeganə Hacıyeva “Bakı-Xəbər”ə açıqlamasında bildirdi ki, bu qadağa olduqca ciddi detallardan xəbər verir:“Paşinyan hakimiyyəti yalnız xarici siyasətdə deyil, bütün istiqamətlər üzrə fiaskoya uğrayıb. Daxildə ona inamsızlıq var və reytinqi kəskin aşağı düşüb. Küçədə vəd verib avantüra hesabına hakimiyyəti əlinə alan bu adam xalqın rifahı üçün heç bir irəliləyişə imza ata bilmədi. Dağlıq Qarabağ problemi ilə də bağlı qeyri-konstruktiv mövqe ortaya qoyur. Bunun da alternativi hərbi yol ola bilər ki, Ermənistan cəmiyyəti ondan çox ehtiyat edir. İqtisadiyyat ümumiyyətlə bərbad vəziyyətdədir və bunun da nəticəsində əhali kütəvi şəkildə ölkəni tərk edib. Ermənistan hakimiyyəti, xüsusilə də Paşinyan bütün uğursuzluqların səbəbini blokada şəraitində yaşamaqları ilə izah edir. Gəlin analiz edək ki, onlar blokadaya niyə düşüb. Bir tərəfdən Türkiyə ilə sərhədləri bağlıdır. Çünki həmin ölkəyə qarşı saxta “soyqırım” iddiaları irəli sürürlər. Azərbaycan üzərindən sərhədin bağlı olması da təsadüfi deyil. Çünki Ermənistan bizim torpaqlarımızı işğala məruz qoyub. Təsəvvür edin ki, belə vəziyyətdə olan ölkəyə Avropa üzərindən uçuşlara da qadağa qoyulur. Bunun günahı kimdədir? Paşinyanın stabil olmayan siyasi kursunda. Həmin “qara siyahıya” Ermənistanın və ya hansısa ölkənin bir aviaşirkətinin adının salınması normal ola bilərdi. Burada isə vəziyyət fərqlidir. Ermənistanın, demək olar ki, bütün şirkətlərinin adı həmin siyahıda yer alıb. Deməli, bu hal Ermənistanın onsuz da çətin olan vəziyyətini bir az da dərinləşdirəcək. Səbəb sadədir. Paşinyan hamını aldatmaq istəyir. Avropanın dəstəyi ilə hakimiyyətə gəlib, sonra onları Rusiyaya satanda belə də cavab olmalıydı. Burada dolayı yolla Paşinyana siyasi təzyiq amillərini də görmək mümkündür. Siyasi oyunbazlığına görə onu bu şəkildə cəzalandırırlar. Normal ölkə kimi idarə olnmayan dövlətlərin aqibəti hər zaman belə olur. Bu amil ölkənin daxilində də Paşinyana qarşı narazılıqları artıracaq. Yəqin ki, Avropanın bu təzyiqindən Rusiya da məharətlə istifadə etməyə çalışacaq”.
Məhəmmədəli QƏRİBLİ
