Məlumdur ki, Ermənistanın çox aşağı maddi imkanları bu ölkəyə yalnız Rusiyadan silah almağa imkan verir. Amma Ermənistan baş naziri Nikol Paşinyanın Rusiyadan daxili qiymətlərlə aldığı silahı üçüncü ölkəyə ötürməsi artıq tamam fərqli bir vəziyyət yaratmaq üzrədir. Gözlənir ki, yaranmış durumda Rusiya artıq Ermənistana daxili qiymətlərlə silah satışına son qoyacaq. Artıq bu xüsusda Ermənistanın özündə belə çoxsaylı xəbərdarlıqlar edilir.
Bu barədə danışmazdan öncə xatırladaq ki, Paşinyanın silah alveri barədə ilkin məlumatlar Ermənistanın Vatikandakı keçmiş səfiri, sabiq prezident Serj Sarkisyanın kürəkəni Mikael Minasyan tərəfindən açıqlanıb. O bildirib ki, Ermənistan Rusiyadan aldığı silahları üçüncü ölkəyə satır və ölkə beynəlxalq silah ticarətində “qara bazar”da iştirak edir. Onun sözlərinə görə, bu fonda Ermənistan Silahlı Qüvvələri Baş Qərargahının kəşfiyyat şöbəsinin keçmiş rəhbəri, baş nazir Nikol Paşinyanın hazırkı müşaviri general Arşak Karapetyan Rusiya Müdafiə Nazirliyində vəzifəli şəxslərlə danışıqlar aparmaq üçün gizli şəkildə Rusiyaya göndərilib. Minasyan ölkəsinin təhlükəsizlik məsələlərini nəzərə alaraq tam açıq danışa bilmədiyini və diqqətli olacağını qeyd edib:“Nikol Paşinyan siqaret və brilyant qaçaqmalçılığı ilə bağlı qalmaqaldan sonra Ermənistanı beynəlxalq silah ticarətinin “qara bazar”ına cəlb edib. Ermənistan Rusiyadan daxili bazar qiymətlərinə silah və sursat almaq hüququna malikdir. Ermənistan Respublikası və Rusiya ordusu Federasiya istehsalçılarından silah və döyüş sursatlarını eyni qiymətlərlə ala bilər. Bu qiymətlər beynəlxalq qiymətlərdən 65 faizə qədər fərqlənir”. O deyib ki, N.Paşinyan bu işi biznesmen David Qalstyana həvalə edib:“Nikol Paşinyan ona Müdafiə Nazirliyi vasitəsilə Ermənistan Respublikası adından şərti olaraq 100 növ silah sifariş vermək imtiyazını verir. Bunun 60 növünün pulunu Ermənistan offşor təşkilatlarda ödəyir. 40 növünü isə Rusiyadan birbaşa üçüncü ölkəyə, məsələn, Birləşmiş Ərəb Əmirliklərinə göndərir. Oradan da silahlar 4-cü ölkədə meydana çıxa bilər". Keçmiş səfirin sözlərinə görə, Ermənistanla münasibətləri korlamamaq üçün Rusiya, Nikol Paşinyan istisna olmaqla, bu mafiozları cəzalandırmaq qərarına gəlib. Belə ki, rəsmi Moskva David Qalstyanı arzuedilməz şəxs elan edib və onun 10 il ərzində Rusiyaya girişi qadağan olunub. David Qalstyanın Rusiya ərazisinə 2029-cu ilə qədər girməsi qadağandır.
Amma Kreml məsələyə təkcə bununla son qoymağa hazırlaşmır. Ermənistan Milli Təhlükəsizlik Dövlət İdarəsinin keçmiş rəisi David Şahnazaryan bildirib ki, nəticələr Ermənistan üçün daha ağır olacaq:“Rusiya tərəfindən Ermənistan hakimiyyətinə böyük inamsızlıq var, Ermənistan artıq hər hansı ölkə üçün etibarlı tərəfdaş deyil və bu, ikitərəfli hərbi-texniki sövdələşmələr sahəsində nəzərə çarpır: ümumiyyətlə, bütün ölkələrlə münasibətlərimiz tarixi minimumdadır və Ermənistana etimad səviyyəsi heç vaxt bu qədər aşağı olmayıb”. O qeyd edib ki, beynəlxalq silah satışı bazarının öz qaydaları var və Ermənistanın son addımları - Rusiyadan daxili qiymətlərlə silah almaq və onu kənara çıxarmaq bütün razılaşmaların pozulmasıdır:“Bundan sonra həmin tərəfdaşla əməkdaşlığı davam etdirmək çətindir. Bu silah Ermənistandan Liviyaya baş nazirin birbaşa əmri və müdafiə nazirinin bilgisi ilə gedib”.
Amma Paşinyanın qanunsuz alver məsələsinə görə təkcə Rusiya ilə problemi yaranmayıb. Gürcüstanla da artıq müəyyən problemlər üzə çıxır. Belə ki, Minasyanın Gürcüstan adı altında Abxaziyaya ixrac olunan erməni siqaretləri ilə bağlı açıqlaması Gürcüstan mətbuatında yayılaraq geniş müzakirə mövzusuna çevrilib. “Commersant.ge” saytı Minasyanın sözlərini sitat gətirərək qeyd edib ki, Nikol Paşinyanın ailəsi işğal olunmuş Abxaziya vasitəsilə Rusiyaya qanunsuz yolla siqaret tədarükü ilə bağlı qalmaqalda iştirak edib. Sayt Gürcüstan tərəfinin bu qalmaqala sərt reaksiya verəcəyini yazır. Ermənistanın “politik.am” nəşrinin baş redaktoru Boris Murazi isə gürcü portalına bildirib:“Paşinyanın siyasəti barədə danışarkən nəzərə almaq lazımdır ki, Ermənistanda heç bir inqilabi dəyişiklik baş verməyib. Paşinyan əvvəlki sistemin dövründə formalaşan bir fiqur kimi keçmiş sistemin dilini mənimsəyib. Bu qaçaqmalçılıq hadisəsi Paşinyan və komandasının hərəkətlərinin korrupsiya xarakterli olduğunu göstərir. Məsələn, Paşinyanın həyat yoldaşı korrupsiya olayları ilə tanınmış iş adamları və yüksək vəzifəli məmurlar tərəfindən ianələr köçürülən iki fond yaradıb. Güman etmək olar ki, həmin insanlar bu köçürmələri gələcəkdə digər ümidlərini qarşılamaq üçün edirlər”.Murazinin sözlərinə görə, hökumətin səssizliyi də qəribədir. Gürcüstan qanunlarına əsasən işğal olunmuş ərazilərlə hər hansı şəkildə münasibətlərin qurulmasının qadağan edildiyi, belə olan halda tütün ixracatının Ermənistan-Gürcüstan münasibətlərinə təsiri barədə suala cavabında Boris Murazi belə deyib:“Hazırda bununla bağlı daha hansı məsələlərin ortaya çıxacağı bilinmir. Ancaq Ermənistanın səhiyyə naziri Arsen Torosyanın Gürcüstanla bağlı verdiyi son açıqlamaları nəzərdən keçirdikdə məlum olur ki, bu insanlar qonşuları ilə münasibət qaydalarını da bilmirlər”. Bu çərçivədə Murazi, Gürcüstanın Ermənistan üçün əhəmiyyətini nəzərə alaraq, bu hadisənin Ermənistan-Gürcüstan münasibətlərinə mənfi təsir göstərdiyi halda çox ağrılı olacağını qeyd edib.
Onu da xatırladaq ki, silah məsələsi ilə yanaşı, Minasyan Paşinyanı qanunsuz brilyant ticarəti ilə əlaqəli mafiya sistemi yaratmaqda da ittiham edib. O bildirib ki, Hindistandan qanunsuz yolla gətirilən brilyantlar 2-3 fabrikə göndərilir. Orada məhsullara "erməni istehsalı" adı qoyulur və heç bir gömrük ödəməsi olmadan xaricə çıxarılır. Xatırladaq ki, Minasyana qanunsuz yolla var-dövlət əldə etmək, çirkli pulların yuyulması, gəlir hesabatında saxta məlumatlar verməsi ilə bağlı cinayət işi açılıb. Məhkəmə Minasyanın həbsinə qərar verib, lakin o, hazırda Ermənistandan kənarda olduğu üçün barəsində axtarış elan edilib.
Nahid SALAYEV
