19/09/2020 08:53
728 x 90

Ağstafa və İmişlinin yeni gənc icra başçıları çox ağır mirasın üstünə göndərildilər, onlara iki ən yaxşı uğur reseptini də Prezident özü göstərdi - Aydın QULİYEV yazır...

img

Yeni təyin olunmuş gənc icra başçılarına Prezidentin tapşırıq və tövsiyələrinin mahiyyətində  mövcud vəziyyətdən və perspektivdən asılı olaraq dəyişikliklər görünməkdədir. Dəyişiklik, konkret olaraq, bir neçə istiqamətdə özünü göstərir.

Prezidentin yeni başçılar təyin edilmiş iki rayonun sabiq başçılarının həbs edildiyini gənclərlə söhbətin lap əvvəlində xatırlatması təsadüf deyil. Yeni gənc başçılar bunu, xüsusilə rüşvət və korrupsiya faktlarına görə heç bir halda güzəştin edilməyəcəyinə aşkar işarə kimi qəbul etməlidirlər. Gənc icra başçılarının qarşısında qoyulan "rayonda rüşvətin kökünü kəsməlisiniz" kimi birmənalı tapşırıq şəxsi məsuliyyəti bir neçə qat gücləndirən təsirli motivdir.

Prezident iki rayonun başçısının həqiqətən çox ağır miras üstünə getdiklərini dəqiq ifadə etməklə metodoloji olaraq tamamilə doğru üsul seçdi. İki gənc icra başçısının sonradan "rayonda vəziyyətin belə ağır olduğunu bilmirdik" kimi uğursuz özünümüdafiə mövqeyi tutmasına əsas qalmayacaq .

Əslində İmişli və Ağstafanın yeni başçılarına görməli olduqları işlərə dair əsas yol xəritəsi təqdim edildi. Rüşvətdən uzaq durmaq, xalqın içinə getmək, kəndlərdə olmaq, sahibkarlara qanunsuz şəriklik hallarına son qoymaq, kasıbın boğazına şərik olmamaq, qeyri-neft sahələrinə diqqət yetirmək, ədalətli olmaq, suvarma su israfçılığından və "adamsızların" əkin sahələrini "yezidcəsinə yandırmaqdan" uzaq olmaq - başçılara Prezidentin Yol Xəritəsinin aydın detallarıdır.

Açıq deyək ki, indiyə qədər rayon, şəhər icra başçılarının fəaliyyətlərinin xarakterik əlaməti əsasən ictimaiyyətin üzərində "neqativ təcrübələri" sınaqdan çıxarmaqdan ibarət olub.Təbii ki, Prezident bunu bilir və buna görə də gənc başçılara neqativlərlə mübarizəyə ictimaiyyəti cəlb etməyi vacib amil kimi tövsiyə etdi. Yeni başçılar, ictimaiyyət üzərində neqativ təcrübələri sınaqdan çıxaran köhnə başçılardan fərqli olaraq, məhz ictimaiyyətlə birlikdə işləməli olacaqlar. Hər halda, məhz bu yeni üsul dəyişikliyini onlardan Prezident tələb etdi.

Hər şeyi rayonda vəziyyətin təhlilindən başlamaq Prezidentin ən konkret tövsiyələrindən biridir. Rayonlarda real vəziyyətin təhlili həm də əvvəlki başçıların fəaliyyətlərini qiymətləndirmək deməkdir.

İcra başçılarının həm vəzifə fəaliyyətində, həm də məişətdə nümunə olması həqiqətən çox vacib amildir. Prezident, məhz vacibliyini nəzərə alaraq, Ağstafa və İmişlinin yeni başçılarına bunu konkret şəkildə dedi. Əgər yeni başçılar da əvvəlkilər kimi kabinetində oturub öz biznesinin perspektivləri barədə dərin xəyallara dalacaqlarsa və ya kabinetdə "krasovka", "çəkələklə" işləyəcəklərsə, deməli Prezidentin konkret tövsiyəsini pozmuş olacaqlar. Ardını düşünmək artıq onların tale məsələsidir...

Yeni icra başçılarına tələb və tövsiyələrin məzmununda edilmiş dəyişikliklərdən biri də rayona digər rayonlardan investisiya və sahibkarların cəlb edilməsi ilə bağlıdır. Prezident əslində bütün icra başçılarına və həmişə kənardan investisiya gətirməyi tapşırır. Ancaq koronavirusa qarşı sistemli mübarizəyə qədər Prezidentin bu istiqamətdə tapşırığı əsasən  xarici ölkələrdən investisiya cəlb edilməsi ilə bağlı olurdu. Hazırkı şərait xaricdən rayonlara investisiya cəlbini müvəqqəti olaraq mümkünsüz etdiyi üçün sahibkarların və investisiyaların yalnız başqa rayonlardan cəlb edilməsi yeganə real mənbəyə çevrilir.

Yeni icra başçıları ilə Prezidentin görüşünün ən mühüm məqamlarından biri ümumiyyətlə yerli icra hakimiyyətləri sisteminin fəaliyyətsizliyi, səmərəsiz fəaliyyəti və nüfuzunu itirməsi ilə bağlıdır. Prezidentin dəqiq ifadə etdiyi fikirlərdən anlaşılan budur ki, yerli icra hakimiyyəti sistemi müəyyən sistemsizlik içindədir. Bu ağır neqativlər başqa rayonlarda da var və araşdırılır  aztəminatlılar üçün həm binaların tikintisində, həm də mənzillər paylananda pul yığılır, işlərin 90 faizi Prezidentin sayəsində görülüb, icra başçıları daşı daş üstünə qoymayıb kimi ifadələr sadəcə tənqid jestləri deyil. Bu geniş məzmunlu ifadələr ölkədə yerli  icra hakimiyyətləri susteminin  və əsl başçı personasının itirilmiş nüfuzunun hökmən bərpasına yönəldilmiş çağırışlardır.

Doğrudur ki,yerli icra hakimiyyətləri sisteminin hazırkı nüfuz itkisi Aqstafa və İmişlinin yeni başçıları ilə heç bir halda əlaqəli deyil. Ancaq yeni başçılar heç olmasa öz rayonlarında icra hakimiyyətinin itirilmiş nüfuzunu bərpa edə bilməsələr, uğurlu nəticələrdən danışmaq mümkün olmayacaq. Razılaşaq ki, hər iki rayonda icra hakimiyyətlərinin nüfuzu "yerlə bir olub". Rüşvətlə həbs edilmiş başçılardan sonra rayonda fərqli mirasın qalması heç mümkün də deyildi.Yeni icra başçıları öz rayonlarında nüfuz etibarilə bələdiyyələrin səviyyəsinə düşmüş icra hakimiyyətlərini yerdən qaldırmaq kimi ağır bir vəzifənin icrası ilə üz-üzədirlər.

Gənc başçıların vəzifəsi nə qədər ağır olsa da, işlərini xeyli asanlaşdıran faktorlar da var. Onlara ən asanlaşdırıcı və həlledici iki resepti də Prezident özü söylədi - Dövlət arxanızdadır və ictimaiyyəti bu işlərə geniş cəlb edin...

Əlamətlər göstərir ki, kadr dəyişikliklərindən sonra növbəti mərhələ kimi ölkədə yerli icra hakimiyyətlərinin özünü bir struktur olaraq dəyişdirmək, yeniləşdirmək və islah etmək ərəfəsindəyik...

Aydın QULİYEV

Son xəbərlər