Xarici siyasətdə ciddi fiaskoya uğrayan Ermənistan üçün diqqət mərkəzində yer alan əsas məqamlardan biri də İsraillə əməkdaşlığı gücləndirməkdir. Irəvanda hesab edilir ki, bununla Ermənistan həm də yəhudi lobbisinin və iş adamlarının dəstəyini əldə edə bilər.
Ancaq bir sıra amillər və xüsusilə də Ermənistanda meydana çıxan faşizm sevgisi tamam fərqli bir durum yaradır. Indi Ermənistanda tüğyan edən faşizmə rəğbət məsələsinə bu mənada İsraildə də xüsusi diqqət yetirilməsi təsadüfi sayıla bilməz. İsraildə çıxan nüfuzlu “Israel HaYom” qəzetində dərc olunmuş məqalədə də bu xüsusda maraqlı məqamlara toxunulur. Burada xatırlanır ki, İkinci Dünya müharibəsi zamanı yəhudi xalqı dəhşətli, dözülməz faciə olan Holokost soyqırımını görüb:“Vəhşiləşmiş, qəddar faşist rejimi tərəfindən yəhudi xalqının kütləvi şəkildə məhv edilməsi ürəkağrısı, iztirab, alçaldılma, təhqir olunma deməkdir”. Qəzet bu xüsusda MDB-nin Aşqabad Zirvə görüşündə Azərbaycan Prezidenti İlham Əliyevin sözlərini sitat gətirir. Hesab edilir ki, İsrail cəmiyyətində məsələyə bu tərzdə yanaşma fonunda İrəvan, çətin ki, Təl-Əvivlə istədiyi münasibətləri qura bilsin. İsrail mediasının Ermənistana yönəlik bu demarşı gələcək üçün nə vəd edir?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, faşizm mövzusu İsrail dövləti və xalqı üçün xüsusi əhəmiyyət kəsb edən mövzudur:“Tarixdən bilirik ki, faşizmin zülmündən daha çox əziyyət çəkən xalq məhz yəhudilər olub. Bu baxımdan da İsrailin Ermənistana reaksiyası daha sərt olmalıdır. Ermənistan açıq-açığına faşistləri dəstəkləyən bir siyasət yürüdür. Azərbaycan Prezidenti səviyyəsində bu mövzunun ictimailəşdirilməsi daha böyük rezonansa səbəb oldu. Bunun fonunda, təəssüf ki, biz İsraildən Ermənistanı qınayan sərt bəyanata rast gəlmədik. Çünki Ermənistan xarici siyasət kursunda yeni xətt seçib. Azərbaycanın yaxın dostları ilə yaxınlaşmaq xətti çərçivəsində, hətta İsraildə səfirlik açmaq niyətini də gündəmə gətirdi. Hətta İsraildə keçirilən Holokostla bağlı tədbirdə Ermənistan Prezidenti yuxarı başa keçirilmişdi. Həmin vaxt bu addım Azərbaycanda ciddi narazılığa səbəb olmuşdu. Njdenin faşistlərlə əlbir olması faktlarla sübuta yetir və Ermənistan hakimiyyəti ona heykəl qoyubsa, bu, İsrail üçün yetərli olmalıdır ki, İrəvana yerini göstərsin. Dünyada faşizmi Ermənistan qədər əbədiləşdirən ikinci ölkə yoxdursa, niyə onun adı İsrail tərəfdən çəkilmirdi? Deməli, kimlərsə bu məsələdə ikili standarta yol verməyə çalışırdı. Artıq İsrail mediası bütün detalları öz adı ilə çağırmağa başlayıbsa, deməli irəliləyiş var. Hər dövlətin mətbuatı onun güzgüsüdür. Biz İsrailin bu “güzgü”sündə Ermənistanı necə varsa, elə də görməyə başlamışıqsa, deməli, həqiqət öz yerini tapır. İstərdik ki, buna İsrail dövləti səviyyəsində də rəsmi reaksiya verilsin”.
Məhəmmədəli QƏRİBLİ
